ପୁରୀ ଅଫିସ, ୬ା୧୧୧: ଶ୍ରୀମନ୍ଦିରରେ ବୁଧବାର ଜଣେ ବୋଝିଆ ଗୁରୁତର ଭାବେ ଆହତ ହୋଇଛନ୍ତି। ତାଙ୍କ ନାମ ଦୁଃଶାସନ ଜେନା (୪୫)। ସାତପାହାଚରେ ଗୋଡ଼ ଖସିଯିବାରୁ ସେ ତଳେ ପଡ଼ିଯାଇଥିଲେ। ତାଙ୍କ ଅଣ୍ଟା ଓ ଆଣ୍ଠୁରେ ଗଭୀର ଆଘାତ ଲାଗିଛି।
ସୂଚନା ମୁତାବକ, ଉତ୍ତରଣା ମଠ ସାହିର ଦୁଃଶାସନ ଶ୍ରୀମନ୍ଦିରରେ ବୋଝିଆ କାମ କରନ୍ତି। ବୁଧବାର ଅପରାହ୍ନରେ ସେ ଭଅଣ୍ଡ ଘରୁ ଏକ ବେତାରେ ଡାଲି, ଅନ୍ନ ଧରି ଆସୁଥିଲେ। ସାତ ପାହାଚରୁ ତଳକୁ ଗୋଡ଼ ପକାଉଥିବାବେଳେ ତାଙ୍କ ଗୋଡ଼ ଖସିଯାଇଥିଲା। ଫଳରେ ଅବଢା ଢାଳି ହୋଇଯିବା ସହ ସେ ପଡ଼ିିଯାଇଥିଲେ। ତାଙ୍କ ଅଣ୍ଟାରେ ଶକ୍ତ ଆଘାତ ଲାଗିଥିଲା। ଡାହାଣ ଗୋଡ଼ ଆଣ୍ଠୁ ମଧ୍ୟ ମାଡ଼ ହୋଇଥିଲା। ତୁରନ୍ତ ସାଥୀ ବୋଝିଆମାନେ ତାଙ୍କୁ ଶ୍ରୀମନ୍ଦିର ଆମ୍ବୁଲାନ୍ସରେ ଜିଲା ମୁଖ୍ୟ ଚିକିତ୍ସାଳୟକୁ ଆଣିଥିଲେ। ସେଠାରେ ତାଙ୍କର ଚିକିତ୍ସା କରାଯାଉଥିବା ଜଣାପଡ଼ିଛି। ଏ ସମ୍ପର୍କରେ ଶ୍ରୀମନ୍ଦିର ମହାପ୍ରସାଦ ବାହକ ସଂଘ ସଭାପତି ରୋହିତ ଦାସ କହିଛନ୍ତି, ଯିବା ଆସିବା ଦ୍ୱାରା ଭଅଣ୍ଡଘର ପାହାଚ ସମେତ ସାତପାହାଚ ମସୃଣ ହୋଇଗଲାଣି। ବାରମ୍ବାର ବୋଝିଆଙ୍କ ଗୋଡ଼ ଖସି ଦୁର୍ଘଟଣା ଘଟୁଛି। ମସୃଣ ପଥର ବଦଳାଇବାକୁ ସେମାନେ ଦାବି କରୁଥିଲେ ମଧ୍ୟ କୌଣସି ପଦକ୍ଷେପ ନିଆଯାଉ ନାହିଁ। ଫଳରେ ଦୁର୍ଘଟଣା ବଢୁଛି।
