ଗଣିଆ,୧୦ା୧୧(ଡି.ଏନ.ଏ.): ପ୍ରାକୃତିକ ପର୍ଯ୍ୟଟନସ୍ଥଳୀ ସାତକୋଶିଆ ସ୍ୟାଣ୍ଡ ରିସୋର୍ଟର ପର୍ଯ୍ୟଟକମାନଙ୍କୁ ଆକୃଷ୍ଟ କରୁଥିବା ବିଦେଶୀ ପକ୍ଷୀ ଇଣ୍ଡିଆନ ସ୍କିମର ପ୍ରତିବର୍ଷ ଭଳି ଚଳିତବର୍ଷ ମହାନଦୀର ବଡମୂଳଠାରେ ଶୁକ୍ରବାର ଦୃଶ୍ୟ ହୋଇଛନ୍ତି। ଶୀତଋତୁ ଆସିଲେ ବିଶେଷ କରି ନଭେମ୍ବର ଆରମ୍ଭରୁ ଫେବୃୟାରୀ ପର୍ଯ୍ୟନ୍ତ ମହାନଦୀର ସାତକୋଶିଆ ଗଣ୍ଡର ତଳିଆ ବଡମୂଳ ଅଞ୍ଚଳରେ ୪୨ ପ୍ରକାରର ବିଦେଶାଗତ ପକ୍ଷୀ ଦେଖାଯାଇଥାନ୍ତି। ଏଠାକୁ ଆସୁଥିବା ରଙ୍ଗବେରଙ୍ଗ ଦେଶୀୟ ଓ ବିଦେଶୀ ପକ୍ଷୀମାନଙ୍କ ମଧ୍ୟରେ ଏହି ଇଣ୍ଡିଆନ ସ୍କିମର ମୁଖ୍ୟ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛନ୍ତି। ସାତକୋଶିଆ ଗଣ୍ଡର ନୀଳ ଜଳରାଶିରେ ଦଳ ଦଳ ହୋଇ ସନ୍ତରଣ କରିବା ସହ ଏହି ପକ୍ଷୀମାନଙ୍କର କାକଳୀ ବେଶ୍ ରୋମାଞ୍ଚକର। ଗଣ୍ଡମଧ୍ୟରେ ଅବା ମହାନଦୀର ବାଲୁକା ଶଯ୍ୟାରେ ପ୍ରତିଟି ଦଳରେ ୫୦ରୁ ୬୦ ପକ୍ଷୀ ରହିଥାନ୍ତି। ଏହି ପକ୍ଷୀମାନେ ହିମାଳୟ ଓ ସାଇବେରିଆ ଅଞ୍ଚଳରୁ ଆସୁଥିବା ବିଶେଷଜ୍ଞମାନେ ମତ ଦେଇଛନ୍ତି। ଅନୁକୂଳ ଜଳବାୟୁ ଓ ପରିବେଶ ଯୋଗୁ ପୂର୍ବରୁ ଏହି ପକ୍ଷୀମାନେ କଟକସ୍ଥିତ ମୁଣ୍ଡୁଳି, ସାତକୋଶିଆ ଗଣ୍ଡର ଟିକରପଡା ଅଞ୍ଚଳକୁ ଆସୁଥିବାବେଳେ ବିଗତ ୫ବର୍ଷ ହେଲା ବଡମୂଳ ଅଞ୍ଚଳକୁ ଆସୁଥିବା ଦେଖିବାକୁ ମିଳୁଛି। ସାତକୋଶିଆ ଗଣ୍ଡକୁ ଆସୁଥିବା ଇଣ୍ଡିଆନ ସ୍କିମରମାନଙ୍କ ସମ୍ପର୍କରେ ଜାଣିବା ପାଇଁ ମହାନଦୀ ବନ୍ୟପ୍ରାଣୀ ବିଭାଗ ତରଫରୁ ୨୦୧୭ ମସିହାରେ ପକ୍ଷୀ ବିଶେଷଜ୍ଞଙ୍କ ଦ୍ୱାରା ବାର୍ଡ ରିଙ୍ଗିଙ୍ଗ (ଚିହ୍ନଟ ପ୍ରକ୍ରିୟା) କରାଯାଇଥିଲା। ଚିହ୍ନଟ ହୋଇଥିବା ପକ୍ଷୀମାନେ ପ୍ରତିବର୍ଷ ଆସୁଥିବା ଦେଖାଯାଉଛି ା ମହାନଦୀର ମଣିଭଦ୍ରା ଓ ଚକ୍ରଗଡଠାରେ ଏହି ପକ୍ଷୀମାନେ ଗତବର୍ଷ ବସାବାନ୍ଧି ରହିଥିବା ବନ୍ୟପ୍ରାଣୀ ବିଭାଗର ଜଣେ କର୍ମଚାରୀ ପ୍ରକାଶ କରିଛନ୍ତି।
