ମୁମ୍ବାଇ,୧୬।୩: ବର୍ତ୍ତମାନ ଇଣ୍ଟରନେଟର ହାଇପର କନେକ୍ଟିଭିଟି ଯୋଗୁ ବିଭିନ୍ନ କାମ ଅନ୍ଲାଇନରେ ସହଜ ଏବଂ ତ୍ୱରିତ ଭାବେ ହୋଇପାରିଛି। ଏହା ଅନ୍ଲାଇନର ଏକ ଭଲ ଦିଗ ହୋଇଥିବା ବେଳେ ବଢୁଥିବା ସାଇବର ବିପଦ ପ୍ରତି ସଚେତନତା ଜରୁରୀ ରହିଛି। ଏହାର ଅଭାବରେ ଲୋକଙ୍କୁ ବିଭିନ୍ନ ସମସ୍ୟା ସାମ୍ନା କରିବାକୁ ପଡୁଛି। ଅନ୍ଲାଇନରେ ଷ୍ଟୋର ହୋଇ ରହିଥିବା ବ୍ୟାଙ୍କିଙ୍ଗ ଡାଟା ଚୋରିର ଭୟ ଲୋକଙ୍କ ମନରେ ରହୁଥିବାବେଳେ ହ୍ୟାକିଂ, ଅନଲାଇନ ଠକେଇ ଭଳି ଘଟଣା ସାମ୍ନାକୁ ଆସୁଛି। ଅନଲାଇନରେ ଗ୍ରାହକଙ୍କୁ ସ୍କୁଫ ଏସ୍ଏମ୍ଏସ୍, ଫିସିଂ ଲିଙ୍କ, ମିଥ୍ୟା ଆଇଡି, ମିଥ୍ୟା ଅନଲାଇନ ପ୍ରୋଫାଇଲ ଦ୍ୱାରା ଲୋକଙ୍କୁ ଠକେଇ କରାଯାଇଛି। ସାଇବର କ୍ଷେତ୍ରରେ ଭାରତୀୟ ବଜାରକୁ ଅଧିକ ବିପଦ ରହିଛି ବୋଲି ବଜାର ବିଶେଷଜ୍ଞ କହିଛନ୍ତି। ଓ୍ବାନାକ୍ରାଇ, ପେଟ୍ୟା ଭଳି ସାଇବର ଆଟାକ ମାମଲା ଏଠାରେ ଦେଖାଯାଇଛି। ସେହିଭଳି ମାଲ୍ଓ୍ବେର,ସ୍ପାମ୍, ରାନଶନଓ୍ବେର ବିଶ୍ୱଲାଗି ବିପଦ ସୃଷ୍ଟି କରିଛି। ଓ୍ବାନାକ୍ରାଇଯୋଗୁ ଦେଶର ୪୮ ହଜାର ସିଷ୍ଟମ ପ୍ରଭାବିତ ହୋଇଥିଲା। ସାଇବର ନିରାପତ୍ତା ବଜାୟ ରଖିବା ଲାଗି ଦୃଢ ଫାୟାର ଓ୍ବାଲ ଏବଂ ଏନ୍କ୍ରିପଶନ ବ୍ୟବସ୍ଥା ଗ୍ରହଣ କରିବାକୁ ହେବ। ଦୃଢ ଆଣ୍ଟିଭାଇରସ ବ୍ୟବହାରକୁ ଧ୍ୟାନ ଦେବାକୁ ପଡିବ। ବ୍ରାଉଜିଂ ବେଳେ ସତର୍କତା ଅବଲମ୍ବନ ଏବଂ ଦୃଢ଼ ପାସଓ୍ବାର୍ଡ ବ୍ୟବସ୍ଥା କରିବାକୁ ହେବ ବୋଲି ବିଶେଷଜ୍ଞ କହିଛନ୍ତି। ବଢୁଥିବା ସାଇବର ନିରାପତ୍ତାକୁ ଧ୍ୟାନରେ ରଖି ସତର୍କତା ଅବଲମ୍ବନ କରିବା ଉପରେ ବଜାଜ ଆଲିଆଞ୍ଜ ଜେନେରାଲ ଇନସ୍ୟୁରାନ୍ସର ମୁଖ୍ୟ ଟେକ୍ନିକାଲ ଅଧିକାରୀ ଶଶି କୁମାର ଆଦିଦମୁ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ, ଏଥିଲାଗି ଲୋକମାନେ ବୀମା ସୁବିଧା ମଧ୍ୟ ନେଇ ପାରିବେ। ଆର୍ଥତ୍କ କ୍ଷତି କ୍ଷେତ୍ରରେ ଲୋକମାନଙ୍କୁ ବୀମା କଭର ମିଳିପାରିବ।
