ମାଞ୍ଚେଷ୍ଟର,୧୭।୬- ଭାରତ ବିପକ୍ଷରେ ଥିବା ଖରାପ ବିଶ୍ୱକପ୍ ରେକର୍ଡକୁ ପାକିସ୍ତାନ ଦଳ ପରିବର୍ତ୍ତନ କରିପାରି ନାହିଁ। ସମସ୍ତ ବିଭାଗରେ ଭଲ ପ୍ରଦର୍ଶନ କରିଥିବା ଭାରତୀୟ ଦଳ ବର୍ଷା ବାଧାପ୍ରାପ୍ତ ମ୍ୟାଚ୍କୁ ୮୯ ରନ୍ରେ ଜିତିନେଇଛି। ଏହାପରେ ପାକିସ୍ତାନ ଅଧିନାୟକ ସର୍ଫରାଜ ଅହମ୍ମଦଙ୍କୁ ପ୍ରଶଂସକଙ୍କଠାରୁ ଆରମ୍ଭ କରି ପୂର୍ବତନ କ୍ରିକେଟର ସମାଲୋଚନା କରିଛନ୍ତି। ଏମାନଙ୍କ ମଧ୍ୟରେ ପୂର୍ବତନ ପେସର ଶୋଏବ ଅଖତର ମଧ୍ୟ ରହିଛନ୍ତି। ପାକିସ୍ତାନ ଦଳର ପରାଜୟ ପରେ ସେ ଏକ ୟୁଟ୍ୟୁବ ଚ୍ୟାନେଲରେ ନିରାଶ ଜାହିର କରିଛନ୍ତି। ସେ ବିଶେଷକରି ଅଧିନାୟକ ସର୍ଫରାଜ ଅହମ୍ମଦ ଓ ହାସନ ଅଲିଙ୍କୁ ସମାଲୋଚନା କରିଛନ୍ତି। ବୁଦ୍ଧିହୀନ ସର୍ଫରାଜ ଟସ୍ ଜିତି ବିନା କାରଣରେ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲେ। ୨୦୧୭ ଆଇସିସି ଚାମ୍ପିୟନ୍ସ ଟ୍ରଫି ଫାଇନାଲରେ ଭାରତୀୟ ଦଳ ଯେଉଁ ଭୁଲ୍ କରିଥିଲା, ତାହାକୁ ପାକିସ୍ତାନ ଟିମ୍ ଦୋହରାଇଥିଲା। ତାଙ୍କ ଦଳ ରନ୍ ପିଛା କରିବାରେ ଭଲ ନୁହେଁ, ଯାହାକି ସେ ଭୁଲିଯାଇଥିଲେ। ଏତେ ବୁଦ୍ଧିହୀନ କେମିତି ଜଣେ ଅଧିନାୟକ ହୋଇପାରିବ। ପାକିସ୍ତାନ ପ୍ରଥମେ ବ୍ୟାଟିଂକରି ୨୬୦ ରନ୍ ମଧ୍ୟ କରିଥିଲେ ଯଥେଷ୍ଟ ହୋଇଥାନ୍ତା। ଦଳ ନିକଟରେ ଦକ୍ଷ ବୋଲିଂ ଲାଇନଅପ ଥିଲା। ଆଉ ହାସନ ଅଲି ଓ୍ବାଘା ବର୍ଡରଠାରେ ଭଲ ଡେଉଁଛନ୍ତି। କିନ୍ତୁ ଠିକଣା ସମୟରେ ପ୍ରାୟ ଶର୍ଟ ପିଚ୍ ବଲ ପକାଇଛନ୍ତି ବୋଲି ପୂର୍ବତନ ପେସର କହିଛନ୍ତି।
