ସମନ୍ବିତ ଶିଶୁ ବିକାଶ ପ୍ରକଳ୍ପରେ ଅର୍ଥ ହେରଫେର ଘଟଣା; ତଦନ୍ତ ନିର୍ଦ୍ଦେଶ ଦେଲେ ଉପଜିଲାପାଳ
8:16 amAugust 18, 2019 / 21

ତାଳଚେର,୧୮ା୮(ନି.ପ୍ର.)  ତାଳଚେର ସମନ୍ବିତ ଶିଶୁ ବିକାଶ ପ୍ରକଳ୍ପରେ କଣ୍ଟିଜେନ୍ସି ବାବଦ ଅର୍ଥ ହେରଫେର ଘଟଣାର ତଦନ୍ତ କରବିାକୁ ଉପଜିଲାପାଳ ନିର୍ଦ୍ଦେଶ ଦେଇଛନ୍ତି। କଣ୍ଟିଜେନ୍ସି ଅର୍ଥ ହଡପ, ଇସିସିଇ ଟ୍ରେନିଂ ମମତା ଯୋଜନା, ସ୍ବୟଂ ସହାୟକ ଗୋଷ୍ଠୀ ତାଲିମ ଓ ଅନ୍ୟାନ୍ୟ ରିଫ୍ରେସର ଟ୍ରେନିଂ ବାବଦକୁ ଆସୁଥିବା ଅର୍ଥର ଠିକ ବିନିଯୋଗ କରାଯାଉ ନ ଥିବା ଅଙ୍ଗନଓ୍ବାଡ଼ି ସଂଘ ପକ୍ଷରୁ ଉପଜିଲାପାଳଙ୍କ ନିକଟରେ ଅଭିଯୋଗ ହୋଇଥିଲା। ତେବେ ଉପଜିଲାପାଳଙ୍କ ତଦନ୍ତ ନିର୍ଦ୍ଦେଶ ପରେ ସିଡିପିଓ, ସୁପରଭାଇଜରମାନେ ତରବରିଆଭାବେ ପୌରାଞ୍ଚଳର ସମସ୍ତ କେନ୍ଦ୍ରକୁ ୮ଟି ସେଟ୍‌ ଲେଖାଏଁ ପ୍ଲାଷ୍ଟିକ ସାମଗ୍ରୀ ଯୋଗାଇ ଦେଇ ଏକ ସାଦା କାଗଜରେ ସମସ୍ତ କର୍ମୀମାନଙ୍କ ଠାରୁ ଦସ୍ତଖତ କରାଇ ନେଇଥିବା ସଂଘ ଅଭିଯୋଗ କରିଛି। କିଛି କେନ୍ଦ୍ରକୁ ୪/୫ ଟି ସେଟ୍‌ ଦିଆଯାଇଛି। କିନ୍ତୁ ଗ୍ରାମାଞ୍ଚଳର କୌଣସି କେନ୍ଦ୍ରକୁ ପ୍ଲାଷ୍ଟିକ ସାମଗ୍ରୀ ଯୋଗାଣ ହୋଇନାହିଁ। ଏହି କଣ୍ଟିଜେନ୍ସି ବାବଦକୁ ଲକ୍ଷ ଲକ୍ଷ ଟଙ୍କା ହଡ଼ପ ହୋଇଥିବା ସଂଘ ଅଭିଯୋଗ ଆଣିଛି। ଘଟଣାରେ ବିଡିଓ ଓ ସହକାରୀ ଜିଲାପାଳ ଯୁଗ୍ମସ୍ତରୀୟ ତଦନ୍ତ କରାଯିବା ନେଇ ପତ୍ର ସଂଖ୍ୟା ୬୩୮୩ରେ ଗତ ୧୯ା୦୭ା୧୯ ତାରିଖରେ ଲିଖିତ ନିର୍ଦ୍ଦେଶ ଦିଆଯାଇଛି। ଅପରପକ୍ଷେ ଏହାର ଭିଜିଲାନ୍ସ ତଦନ୍ତ କରିବାକୁ ସଂଘ ଦାବି କରିଛି। ଏ ସମ୍ପର୍କରେ ସିଡିପିଓ ଲୀଳାବତୀ ନାଗଙ୍କୁ ଯୋଗାଯୋଗ କରିବାରେ କହିଛନ୍ତି, କଣ୍ଟିଜେନ୍ସି ଅର୍ଥର ଠିକ ବିନିଯୋଗ କରାଯାଇଛି ା ଅଭିଯୋଗର କୌଣସି ସତ୍ୟତା ନାହିଁ।