ଗ୍ରାହକଙ୍କୁ ଯିଏ ଯେତେ ଆକୃଷ୍ଟ କରିପାରେ ତା’ର ବ୍ୟବସାୟ ସେତେ ବଢିଥାଏ। ସେଇଥିପାଇଁ ତ କିଏ କେତେପ୍ରକାର ଉପାୟ ଅବଲମ୍ବନ କରିଥାଆନ୍ତି ଗ୍ରାହକଙ୍କୁ ନିଜ ପାଖକୁ ଟାଣିବା ପାଇଁ। ମହାରାଷ୍ଟ୍ରର ପୁଣେରେ ଏକ ଅଟୋ ଡ୍ରାଇଭର୍ ତ ଏଭଳି ପନ୍ଥା ଆପଣେଇଛନ୍ତି ଯେ, ସାରା ଭାରତରେ ଏବେ ସେ ଚର୍ଚ୍ଚାର ପରିସରକୁ ଆସିଛନ୍ତି। ପ୍ରଚଣ୍ଡ ଖରା ଯୋଗୁ ଲୋକେ ଗଛ ଛାଇ ଟିକେ ଖୋଜନ୍ତି। ତେଣୁ ସେ ନିଜ ଅଟୋକୁ ହିଁ ସବୁଜିମାରେ ଭରି ଦେଇଛନ୍ତି। ଆଉ ତାହା ଏତେ ଆକର୍ଷକ ଲାଗୁଛି ଯେ, ଲୋକେ ଆପେ ଟାଣି ହୋଇ ଚାଲି ଆସୁଛନ୍ତି ତାଙ୍କ ଅଟୋ ନିକଟକୁ। ଯଦିଓ ସେହି ଗଛ ଲତା ଓ ଫୁଲ ବାସ୍ତବିକ ନୁହେଁ ତଥାପି ସେହି କୃତ୍ରିମ ଲତାଫୁଲର ସାଜସଜ୍ଜା ଲୋକଙ୍କୁ ବାଧ୍ୟ କରୁଛି ଘଡିଏ ଅଟକି ଅଟୋକୁ ଦେଖିବାକୁ। ଅଟୋର ଛାତ, ସିଟଠାରୁ ଆରମ୍ଭ କରି ସବୁ ଅଂଶକୁ ସେ କୃତ୍ରିମ ଲତା,ଘାସ ଓ ଫୁଲରେ ସଜାଇଛନ୍ତି। ଆଉ ତାହା ସତସତିକା ଘାସ, ଫୁଲ, ଲତା ପରି ହିଁ ଦେଖାଯାଏ। ଅଟୋ ମାଲିକ ଇବ୍ରାହିମ ଇସ୍ମାଇଲ ତମ୍ବୋଲିଙ୍କ ଏହି ପ୍ରୟାସକୁ ସମସ୍ତେ ବେଶ୍ ପ୍ରଶଂସା କରୁଛନ୍ତି।
