ଭଦ୍ରକ ଅଫିସ, ୨୫ା୪- ଭଦ୍ରକ ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ବଢି ଚାଲିଥିବାରୁ ସବୁ ସ୍ତରରେ ଚିନ୍ତା ବଢିଛି। ଜିଲାବାସୀ ଏକ ପ୍ରକାର ଭୟ ଓ ଆତଙ୍କ ମଧ୍ୟରେ କାଳାତିପାତ କରୁଛନ୍ତି। ଶୁକ୍ରବାର ଏକାଦିନେ ୫ ପଜିଟିଭ ଚିହ୍ନଟ ହେବା ପରେ ଏହି ଭୟ ଆହୁରି ବଢିଯାଇଛି। ସଂକ୍ରମଣ ନ ବ୍ୟାପିବା ପାଇଁ ଜିଲାରେ ୬୦ ଘଣ୍ଟିଆ ଶଟ୍ ଡାଉନ କରାଯାଇଛି। ଫଳରେ ଜିଲାସାରା ଲୋକେ ଘରୁ ବାହାରକୁ ବାହାରୁ ନାହାନ୍ତି। ରାସ୍ତାଘାଟ ଶୂନ୍ଶାନ୍ ହୋଇ ପଡ଼ିବା ସହ ଜିଲାରେ ନିରବତାର ରାଜୁତି ଚାଲିଥିବା ପ୍ରତୀୟମାନ ହୋଇଛି।
ଶୁକ୍ରବାର ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରେ ବାସୁଦେବପୁର ବ୍ଲକ ଅଞ୍ଚଳର ଜଣେ ହୋଇଥିବା ବେଳେ ଧାମନଗରରୁ ୨ ଓ ତିହିଡ଼ି ବ୍ଲକ ଅଞ୍ଚଳରୁ ୨ ଜଣ ଥିବା ରାଜ୍ୟ ସ୍ବାସ୍ଥ୍ୟ ପରିବାର କଲ୍ୟାଣ ବିଭାଗ ସୂଚନା ଦେଇଛି। ଏହି ସମସ୍ତ୫ ଜଣଙ୍କ କଲିକତା ଲିଙ୍କ୍ ରହିଥିବା କୁହାଯାଇଛି। ଜିଲାରେ ପଜିଟିଭ ରୋଗୀଙ୍କ ସଂଖ୍ୟା ୧୬ ଛୁଇଁଛି। ଏଥିପୂର୍ବରୁ ୨ ଜଣ ସୁସ୍ଥ ହୋଇଥିବା ଜଣାପଡ଼ିଛି। ଜିଲାରେ ଗୁରୁବାର ରାତି ୧୦ ଟାରୁ ୬୦ ଘଣ୍ଟିିଆ ଶଟ୍ ଡାଉନ ଘୋଷଣା କରାଯାଇଛି। ଫଳରେ ରାସ୍ତାଘାଟ ଶୂନଶାନ ସାଙ୍ଗକୁ କେବଳ ଅତ୍ୟାବଶ୍ୟକ ଆମ୍ବୁଲାନ୍ସ, ପୋଲିସ ଓ ନିର୍ଦ୍ଦିଷ୍ଟ କିଛି ଗାଡ଼ି ଚଳାଚଳ କରୁଛି। ଭଦ୍ରକ ପୌରାଞ୍ଚଳ ତଥା ଜିଲାର ସମସ୍ତ ଅଞ୍ଚଳର ପ୍ରବେଶ ପଥଗୁଡ଼ିକରେ ପୋଲିସ କଡ଼ା ପହରା ଦେଉଛି। ଏହି ଶଟ୍ ଡାଉନ ସମୟରେ ସ୍କ୍ରିନିଙ୍ଗ କରାଯାଇ ସ୍ବାବ ପରୀକ୍ଷା ନିମନ୍ତେ ୪ଟି ସ୍ବତନ୍ତ୍ର ଟିମ୍ ଜିଲାର ବିଭିନ୍ନ ଅଞ୍ଚଳରେ କାର୍ଯ୍ୟ କରୁଛି। ରାଜ୍ୟ ସରକାରଙ୍କ ଦୁଇଜଣ ବରିଷ୍ଠ ଅଧିକାରୀ ଭଦ୍ରକ ଜିଲା ଗସ୍ତ କରି କଣ୍ଟେନମେଣ୍ଟ ଜୋନ୍ ଅଞ୍ଚଳ ସମେତ ଜିଲାସ୍ତରୀୟ ଅଧିକାରୀମାନଙ୍କ ସହ ଆଲୋଚନା କରିଛନ୍ତି। ପ୍ରଶାସନିକ ବିଧି ବ୍ୟବସ୍ଥା ଓ କଟକଣାର ସମୀକ୍ଷା କରି ଫେରିଥିବା ଜଣାପଡ଼ିଛି। କୋଭିଡ଼-୧୯ ର ନୋଡାଲ ଅଫିସର୍ ତଥା ସ୍ବତନ୍ତ୍ର ସଚିବ ଏସ୍କେ ଲୋହାନୀ, ଅତିରିକ୍ତ ପୋଲିସ ମହାନିର୍ଦ୍ଦେଶକ ସୌମେନ୍ଦ୍ର ପ୍ରିୟଦର୍ଶୀ ଜିଲା ଗସ୍ତ କରି ଜିଲାସ୍ତରୀୟ ଅଧିକାରୀ ଓ ବାସୁଦେବପୁର ବ୍ଲକର କଣ୍ଟେନମେଣ୍ଟ ଜୋନ୍ ଅଞ୍ଚଳ ପରିଦର୍ଶନ କରିଥିଲେ। ଜିଲାପାଳଙ୍କ ସଦ୍ଭାବନା ସଭାଗୃହ ପରିସରରେ ଜିଲାପାଳ ଡ. ଜ୍ଞାନ ରଞ୍ଜନ ଦାସ, ଏସ୍ପି ରାଜେଶ ପଣ୍ଡିତ, ଅତିରିକ୍ତ ଜିଲାପାଳ ଶ୍ୟାମଭକ୍ତ ମିଶ୍ର, ଉପଜିଲାପାଳ ପୀତାମ୍ବର ସାମଲଙ୍କ ସହ ଏହି ଦୁଇ ଅଧିକାରୀ ଆଲୋଚନା କରିଥିଲେ। ଆଲୋଚନା ସମୟରେ ଜିଲାରୁ କେତେ ସ୍ବାବ ପଠାଯାଇଥିଲା, ସେଥିମଧ୍ୟରୁ କେତେ ପରୀକ୍ଷା ହୋଇ ଫେରିଛି, ପଶ୍ଚିମବଙ୍ଗ ଫେରନ୍ତା କେତେ, ସଂଘରୁଦ୍ଧ ଗୃହରେ କେତେ ରହିଛନ୍ତି, ହୋମ କ୍ୱାରାଣ୍ଟାଇନରେ କେତେ ରହିଛନ୍ତି ଓ ଜିଲାରେ ଶଟ୍ ଡାଉନ ସମୟର ଆଇନ ଶୃଙ୍ଖଳା ବ୍ୟବସ୍ଥା ପଚାରି ବୁଝିଥିଲେ। ଏହାପରେ ବାସୁଦେବପୁର ଅଞ୍ଚଳରେ ଅତିରିକ୍ତ ଏସ୍ପି ବିକାଶ ଦାସ, ତହସିଲଦାର ସୌମ୍ୟଶ୍ରୀ ପାଣିଗ୍ରାହୀ, ବିଡିଓ ପ୍ରଣବ କୁମାର ବେହେରା, ଥାନାଧିକାରୀ ମଧୁମିତା ମହାନ୍ତି ପ୍ରମୁଖଙ୍କ ସହ ଗସ୍ତ ସମୟରେ ଏହି ଦୁଇ ଅଧିକାରୀ ଆଲୋଚନା କରିଥିଲେ। ପ୍ରଥମେ ଅତିରିକ୍ତ ପୋଲିସ ମହାନିର୍ଦ୍ଦେଶକ ପଦ୍ମପୁର, ମେଳକସାହି, ଅଗାପୁର, ଲୁଙ୍ଗା, ବିନାୟକପୁର ଅଞ୍ଚଳ ସହ ଜୟକୃଷ୍ଣ ଉଚ୍ଚ ବିଦ୍ୟାଳୟଠାରେ କରୋନା ସହାୟତା କେନ୍ଦ୍ର ବୁଲି ଦେଖିଥିଲେ। ପ୍ରଶାସନ ପକ୍ଷରୁ ଧାମନଗର ବ୍ଲକର କଲ୍ୟାଣୀ ଓ ଖଡ଼ିପଦା ପଞ୍ଚାୟତ ସମେତ ତିହିଡ଼ି ବ୍ଲକର କାଁପଡ଼ା ଓ ବାମନବିନ୍ଧା ପଞ୍ଚାୟତ ଅଞ୍ଚଳ ପ୍ରତି ତୀକ୍ଷ୍ଣ ନଜର ରଖାଯାଇଥିତ୍ବା ସୂଚନା ମିଳିଛି।
