ନୂଆଦିଲ୍ଲୀ,୨୬।୪: କରୋନା ମହାମାରୀର ମୁକାବିଲା ପାଇଁ ବିଶ୍ୱର ଅଧିକାଂଶ ଦେଶ ଲକ୍ଡାଉନରେ ଥିବାବେଳେ ବ୍ୟବସାୟ ଗୁରୁତର ବାଧାପ୍ରାପ୍ତ ହୋଇଛି। ଏହାସତ୍ତ୍ୱେ ଏହି ମହାମାରୀ ଅନେକ ବ୍ୟବସାୟ ପାଇଁ ବଡ଼ ସୁଯୋଗର ଅବକାଶ ଆଣିଛି। ଅସାଧାରଣ ଆବଶ୍ୟକତା ପୂରଣ ଲାଗି ଦ୍ରୁତ ଟେଣ୍ଡର ପ୍ରକ୍ରିୟା, ସାଧାରଣ ଯାଞ୍ଚ ଓ ଆଇନଗତ ପ୍ରକ୍ରିୟା ବିନା ଦ୍ରବ୍ୟ ପରିବହନ ଆଦି କଥାକୁ ବିଚାର କରାଯାଉ। ଲାଭର କଳା ଆବଶ୍ୟକତାର ଉପଯୋଗ ଉପରେ ନିର୍ଭର କରିଥାଏ। ସଂଗଠିତ ଅପରାଧ ବ୍ୟତୀତ ଅନ୍ୟ କେହି ଏହି ଅନ୍ଧକାର କଳାକୁ ଅଧିକ ଭଲ ଭାବେ ସିଦ୍ଧ କରିନାହିଁ। କୋଭିଡ୍-୧୯ ମହାମାରୀ ଏହାକୁ ସ୍ପଷ୍ଟ କରିଛି।
ନିକଟ ଦଶକରେ ଅପରାଧ ସଂଗଠନଗୁଡ଼ିକ ସେମାନଙ୍କ ବ୍ୟବସାୟ ବିଚକ୍ଷଣତା ସହିତ ଅନେକ କମ୍ପାନୀରେ ପୁଞ୍ଜିନିବେଶ କରିଛନ୍ତି। ବର୍ତ୍ତମାନର ସଙ୍କଟ ସମୟରେ ଲଣ୍ଡ୍ରି, ପରିବହନ, ଫନେରାଲ ହୋମ୍, ବର୍ଜ୍ୟ ସଂଗ୍ରହ, ଖାଦ୍ୟ ବିତରଣ ଓ ସ୍ବାସ୍ଥ୍ୟସେବା ଆଦି ବିଭିନ୍ନ ସେବା ପ୍ରଦାନକାରୀ କମ୍ପାନୀଗୁଡ଼ିକର ଚାହିଦା ବଢ଼ିଛି। କିଛି ସପ୍ତାହ ହେଲା ଏହି ସେକ୍ଟରଗୁଡ଼ିକ ବଞ୍ଚତ୍ବା ଲାଗି ଅତି ଜରୁରୀ ହୋଇପଡିଛି। ଫଳରେ ମାଫିଆମାନେ ଏହି ସେକ୍ଟରରେ ପୁଞ୍ଜିନିବେଶ କରିବା ଲାଗି ଆଗେଇ ଆସିଥିବା ଦେଖିବାକୁ ମିଳିଛି। ଇଟାଲୀରେ ମାଫିଆ ସଂସ୍ଥାଗୁଡ଼ିକ ମାସ୍କ, ହ୍ୟାଣ୍ଡ ସାନିଟାଇଜର, ଲାଟେକ୍ସ ଗ୍ଲୋଭ୍ ଆଦି ମହାମାରୀ କିଟ୍ ଉତ୍ପାଦନ ଓ ବିତରଣ ସଂସ୍ଥାରେ ପୁଞ୍ଜିନିବେଶ କରୁଥିବା ନେଇ ସ୍ଥାନୀୟ ପୋଲିସ ସତର୍କ କରାଇଦେଇଛି। ମହାମାରୀ ଯୋଗୁ ଏହିସବୁ ସାମଗ୍ରୀର ଚାହିଦା ବଢ଼ିଯିବାରୁ ଦାମ୍ ଆକାଶଛୁଆଁ ହୋଇଛି। କାଲାବ୍ରିୟାର ମାଫିଆମାନେ ଔଷଧ ଓ ସ୍ବାସ୍ଥ୍ୟସେବା ସେକ୍ଟରରେ ପୁଞ୍ଜିନିବେଶ କରିଛନ୍ତି।
ମହାମାରୀ ବେଳେ କେବଳ ଏହିସବୁ ସେକ୍ଟର ଅପରାଧୀ ସଂଗଠନଗୁଡ଼ିକ ଲାଗି ସୁଯୋଗ ଆଣିନାହାନ୍ତି, ନୀରବତାରୁ ମଧ୍ୟ ସେମାନେ ଫାଇଦା ଉଠାଉଛନ୍ତି। ସାଧାରଣ ଜନତାଙ୍କ ଦୃଷ୍ଟି ସମ୍ପୂର୍ଣ୍ଣ ଭାବେ ମହାମାରୀ ଉପରେ କେନ୍ଦ୍ରୀଭୂତ ହୋଇଥିବାବେଳେ ମାଫିଆ ସିଣ୍ଡିକେଟ ଅବାଧରେ ଏହାର ପେସା ଚଳାଇପାରୁଛି। ସେମାନଙ୍କ ଅସାଧୁ କାର୍ଯ୍ୟ ପ୍ରତି କେହି ଦୃଷ୍ଟି ଦେଉନାହାନ୍ତି, କାରଣ ଭୂତାଣୁ ଏବେ ଲୋକମାନଙ୍କର ଏକ ନମ୍ବର ଶତ୍ରୁ ପାଲଟିଛି। ଫେବୃୟାରୀ ତୁଳନାରେ ଡ୍ରଗ୍ ସେବନ ଯୋଗୁ ଅଧିକ ଲୋକଙ୍କ ଜୀବନ ଯାଇଥିବାବେଳେ ଅଧିକାଂଶ ଖବରକାଗଜରେ ତାହା ସ୍ଥାନ ପାଇନାହିଁ। ଚିହୁଆହୁଆ ରାଜ୍ୟରେ ଏପ୍ରିଲ ପ୍ରଥମ ଭାଗରେ ଗୁଳିକାଣ୍ଡ ଘଟି ୧୯ ଜଣଙ୍କ ଜୀବନ ଯାଇଥିଲା। ହେଲେ କେହି ଏହାକୁ ଅନ୍ତର୍ଜାତୀୟ ରାଜନୈତିକ ଏଜେଣ୍ଡା କଲେ ନାହିଁ। ସୁରକ୍ଷା କର୍ମୀ ଲକ୍ଡାଉନ କାର୍ଯ୍ୟକାରିତାରେ ବ୍ୟସ୍ତ ଥିବାରୁ ଡ୍ରଗ୍ କାରବାର ଉପରୁ ଧ୍ୟାନ ହଟାଇଦେଇଛନ୍ତି। ଫଳରେ ମାଫିଆମାନଙ୍କ ପାଇଁ ଭଲ ସୁଯୋଗ ସୃଷ୍ଟି ହୋଇଛି।
ଇଟାଲୀର କେତେକ ଅଞ୍ଚଳରେ ଋଣ ଚାହିଦା ବଢ଼ିଥିବାରୁ ମାଫିିଆମାନେ ପୂର୍ବାପେକ୍ଷା କମ୍ ସୁଧରେ ଋଣ ଯୋଗାଇଦେବାକୁ ଆଗେଇ ଆସିଛନ୍ତି। କେତେକ ସ୍ଥାନରେ ସେମାନେ ଭୋକିଲାଙ୍କୁ ଖାଦ୍ୟ ଯୋଗାଇଦେଇ ସେମାନଙ୍କର ନିକଟତର ହେବାକୁ ଉଦ୍ୟମ କରୁଛନ୍ତି। ଏହାଦ୍ୱାରା ଲୋକେ ସେମାନଙ୍କ ପ୍ରତି କୃତଜ୍ଞ ରହିବେ। ପରବର୍ତ୍ତୀ ସମୟରେ ମାଫିଆମାନେ ଏହାର ଫାଇଦା ଉଠାଇବେ। ମେକ୍ସିକୋର ମାଫିଆ ସଂଗଠନଗୁଡ଼ିକ ଏହି ପଦ୍ଧତି ଆପଣାଇଛନ୍ତି।
