ବଅଁରପାଳ, ୨୬।୪ (ଡି.ଏନ୍.ଏ.)- ଗ୍ରୀଷ୍ମ ପ୍ରବାହକୁ ଦୃଷ୍ଟିରେ ରଖି ସରକାରୀ କାର୍ଯ୍ୟାଳୟଗୁଡ଼ିକୁ ସରକାର ସକାଳୁଆ କରିଛନ୍ତି। ବିଭିନ୍ନ କାର୍ଯ୍ୟ ପାଇଁ ଆସୁଥିବା ହିତାଧିକାରୀମାନେ ଯେପରି ତାତିରୁ ରକ୍ଷା ପାଇବା ସହ ସୁବିଧାରେ କାମ ହାସଲ କରି ଫେରିପାରିବେ ସେଥିପାଇଁ ସରକାର ଏପରି ବ୍ୟବସ୍ଥା କରିଛନ୍ତି। କିନ୍ତୁ ବଅଁରପାଳ ବ୍ଲକ କାର୍ଯ୍ୟାଳୟରେ ଏହାର ବ୍ୟତିକ୍ରମ ଦେଖିବାକୁ ମିଳୁଛି। ଗୁରୁବାର ମଧ୍ୟାହ୍ନ ପର୍ଯ୍ୟନ୍ତ ବ୍ଲକ ଅଫିସର ବିଭିନ୍ନ ବିଭାଗୀୟ ଅଧିକାରୀଙ୍କ ଚୌକି ଖାଲି ପଡ଼ିଥିବାରୁ କାର୍ଯ୍ୟାଳୟକୁ ଆସିଥିବା ହିତାଧିକାରୀମାନେ ଏ ନେଇ ଅସନ୍ତୋଷ ବ୍ୟକ୍ତ କରିଥିବା ଦେଖାଯାଇଛି।
ସକାଳ ୭ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ସରକାରୀ କାର୍ଯ୍ୟାଳୟ ଚାଲିବ ବୋଲି ସରକାର ସମୟ ଧାର୍ଯ୍ୟ କରିଛନ୍ତି। କିନ୍ତୁ ଗୁରୁବାର ପୂର୍ବାହ୍ନ ୧୧ଟାରୁ ୧୨ଟା ୧୦ ପର୍ଯ୍ୟନ୍ତ ବଅଁରପାଳ ବ୍ଲକ କାର୍ଯ୍ୟାଳୟରେ ବହୁ ଅଧିକାରୀଙ୍କ ଚୌକି ଖାଲି ପଡ଼ିଥିଲା। ବିଡିଓଙ୍କ କାର୍ଯ୍ୟାଳୟ ବନ୍ଦ ଥିବାବେଳେ ପ୍ରଗତି ସହାୟକ, ସାମାଜିକ ଶିକ୍ଷା ସଙ୍ଗଠକ ଓ ମଙ୍ଗଳ ସମ୍ପ୍ରସାରଣ ଅଧିକାରୀ, ବ୍ଲକ ଶିକ୍ଷା ଅଧିକାରୀ, ଶିଶୁ ବିକାଶ ପ୍ରକଳ୍ପ ଅଧିକାରୀଙ୍କ ଚୌକିରେ କେହି ନ ଥିଲେ। ସେହିପରି କାର୍ଯ୍ୟାଳୟରେ କେତେବେଳେ କେଉଁ ଅଧିକାରୀ ରହୁଛନ୍ତି କିମ୍ବା କେଉଁ ଅଧିକାରୀ ଟୁର୍ ଓ ଟ୍ରେନିଂରେ ଯାଉଛନ୍ତି ସେ ନେଇ କାର୍ଯ୍ୟାଳୟ ସମ୍ମୁଖରେ ଏକ ସୂଚନା ମରାଯିବାର ନିୟମ ଥିଲେ ବି ତାହା ପାଳନ ହେଉନାହିଁ। ଫଳରେ ବ୍ଲକ କାର୍ଯ୍ୟାଳୟକୁ ଆସୁଥିବା ହିତାଧିକାରୀ ଅଧିକାରୀମାନଙ୍କୁ ନ ପାଇ ହଇରାଣ ହରକତ ହେଉଥିବା ବେଳେ ଅଫିସରେ କେଉଁ ଅଧିକାରୀ ରହୁଛନ୍ତି ଓ କେଉଁ ଅଧିକାରୀ ବାହାରକୁ ଯାଇଛନ୍ତି ତାହା ଜଣାପଡ଼ୁ ନାହିଁ। ବ୍ଲକରେ ଦୀର୍ଘ ଦିନ ହେଲା ଅତିରିକ୍ତ ବିଡିଓ ପଦବୀ ଖାଲି ପଡ଼ିଛି। ୩୫ ପଞ୍ଚାୟତ ନିର୍ବାହୀ ଅଧିକାରୀଙ୍କ ସ୍ଥାନରେ ୨୬ ଜଣ ରହିଛନ୍ତି। ୨ ଜଣ ଆସିଷ୍ଟାଣ୍ଟ ଇଞ୍ଜିନିୟରଙ୍କ ସ୍ଥାନରେ ଜଣେ ରହିଛନ୍ତି। ତେଣୁ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି। ଏ ସମ୍ପର୍କରେ ବଅଁରପାଳ ବିଡିଓ ସ୍ବରୂପା ନନ୍ଦ ସାହୁଙ୍କ ସହ ଯୋଗାଯୋଗ ହୋଇପାରି ନ ଥିବାରୁ ମତାମତ ମିଳିପାରି ନାହିଁ। ଅତିରିକ୍ତ ଶିକ୍ଷା ଅଧିକାରୀ ମନୋରମା ମାଝି କହିଛନ୍ତି, ବିଡିଓ ଅନୁଗୋଳଠାରେ ବୈଠକକୁ ଯାଇଛନ୍ତି। ସରକାରୀ କାର୍ଯ୍ୟରେ ମଁୁ ବାହାରେ ଥିବାରୁ ବ୍ଲକକୁ ଯାଇପାରି ନାହିଁ।
