ନୂଆଦିଲ୍ଲୀ,୩୦-୧୦: ଭାରତରେ ଏକ ଶକ୍ତିଶାଳୀ ଷ୍ଟାର୍ଟଅପ୍ ଇକୋସିଷ୍ଟମ ରହିଥିବା ବେଳେ ଏହାର ସୁବିଧା ନେବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବିଶ୍ୱସ୍ତରର ନିବେଶକଙ୍କୁ ମଙ୍ଗଳବାର ଆହ୍ବାନ ଜଣାଇଛନ୍ତି। ଭାରତର ଷ୍ଟାର୍ଟଅପ ବ୍ୟବସ୍ଥା ସାରା ବିଶ୍ୱରେ ତୃତୀୟ ସର୍ବବୃହତ୍ତ। ଏଭଳି ସ୍ଥିତିରେ ଦେଶର ଉଦ୍ଭାବନ କ୍ଷେତ୍ରରେ ନିବେଶ ଦ୍ୱାରା ବୃହତ୍ତ ପରିମାଣର ରିଟର୍ନ ଆସିବ ବୋଲି ସୌଦି ଆରବଠାରେ ଅନୁଷ୍ଠିତ ହେଉଥିବା ଫ୍ୟୁଚର ଇନଭେଷ୍ଟମେଣ୍ଟ ଇନିସିଏଟିଭ(ଏଫ୍ଆଇଆଇ) କାର୍ଯ୍ୟକ୍ରମରେ ଅଭିଭାଷଣ ରଖି ମୋଦି ଏହା କହିଛନ୍ତି।
ଦେଶର ଷ୍ଟାର୍ଟଅପ୍ ଉପରେ ମତ ରଖି ସେ ଆହୁରି କହିଛନ୍ତି ଯେ, ଦେଶର ଟାୟାର-୨ ଏବଂ ୩ ସହରଗୁଡିକରେ ଷ୍ଟାର୍ଟଅପ୍ଗୁଡିକ ପ୍ରତିଷ୍ଠା ହେଉଛି। ଉକ୍ତ ସଂସ୍ଥାଗୁଡିକରେ ବିଶ୍ୱ ସ୍ତରୀୟ ନିବେଶ ହେଉଛି। ଦେଶର ଛୋଟଛୋଟ ସହରଗୁଡିକ ଏବେ ଅଭିବୃଦ୍ଧି ଇଞ୍ଜିନ ଭାବେ ଉଭା ହୋଇଛନ୍ତି। ଭାରତରେ ଦକ୍ଷ ମାନବ ସମ୍ବଳ ରହିଥିବାରୁ ଏଠାକୁ ନିବେଶ ଲାଗି ବିଶ୍ୱସ୍ତରୀୟ କମ୍ପାନୀ ପସନ୍ଦ କରୁଛନ୍ତି।
ସେ କହିଛନ୍ତି, ଦେଶରେ ପାଇପ ଲାଇନ, ଗ୍ୟାସ ଟର୍ମିନାଲ ଏବଂ ରିଫାଇନିଂ ଭଳି କ୍ଷେତ୍ରରେ ୨୦୨୪ ସୁଦ୍ଧା ୧୦୦ ବିଲିୟନ ଡଲାର ନିବେଶ ହେବ। ସୌଦି ଆରବର ଆରାମକୋ କମ୍ପାନୀ ଦେଶର ଓ୍ବେଷ୍ଟ କୋଷ୍ଟ ରିଫାଇନେରୀ ପ୍ରକଳ୍ପରେ ନିବେଶ ଲାଗି ନିଷ୍ପତ୍ତି ନେଇ ଥିବାରୁ ଖୁସି ଥିବା ସେ ମତ ରଖିଛନ୍ତି। ଆଗାମି ୪ ବର୍ଷରେ ଦେଶର ୪୦୦ ନିୟୁତ ଲୋକଙ୍କୁ ଦକ୍ଷତା ତାଲିମ ଦିଆଯିବ। ଏହା ଦ୍ୱାରା କମ୍ପାନୀଗୁଡ଼ିକ ଦକ୍ଷ ମାନବ ସମ୍ବଳ ପାଇପାରିବେ। ଭାରତକୁ ୫ ଟ୍ରିଲିୟନ ଡଲାର ଅର୍ଥନୀତି ଭାବେ ଗଢି ତୋଳିବାକୁ ସରକାର ପ୍ରତିଶ୍ରୁତିବଦ୍ଧ ବୋଲି ସେ ମତ ରଖିଛନ୍ତି।
