ସୋହେଲା,୯ା୫(ଡି.ଏନ.ଏ.): କିଛି ଦିନ ତଳେ ରାଜ୍ୟ ଶ୍ରମ ଓ ଗ୍ରାମ୍ୟ ଉନ୍ନୟନ ମନ୍ତ୍ରୀ ସୁଶାନ୍ତ ସିଂ ଶ୍ରମିକମାନଙ୍କ ପାଇଁ ନିଜେ ଡ୍ରାଇଭର ସାଜି ରାତିରେ ସୋନପୁର ନେଇ ଛାଡିଥିଲେ। ଶନିବାର ସାରେ ପୁଣି ଥରେ ସେ ପିକ୍ଅପ୍ ଭ୍ୟାନ ଚଳାଇ ଶ୍ରମିକମାନଙ୍କୁ ନେଇ ସେମାନଙ୍କ ଗନ୍ତବ୍ୟସ୍ଥଳରେ ଛାଡିବା ଚର୍ଚ୍ଚାର ବିଷୟ ହୋଇଛି। ପ୍ରକାଶ ଯେ, ବରଗଡ ଜିଲା ପଦ୍ମପୁର, ବଲାଙ୍ଗୀର ଜିଲା ପଟଣାଗଡ଼ ଓ ସୁବର୍ଣ୍ଣପୁର ଜିଲା ରାମପୁର ଅଞ୍ଚଳର ଶ୍ରମିକମାନେ ଇଟା ଗଢିବା ପାଇଁ କଟକ ଅଞ୍ଚଳକୁ ଯାଇଥିଲେ। ଲକ୍ଡାଉନ ଯୋଗୁଁ ୩୦ରୁ ୩୫ଜଣ ଶ୍ରମିକ ପିଲାଛୁଆଙ୍କ ସହ ସେଠାରେ ଫଶି ରହିଥିଲେ। ଶନିବାର ଅପରାହ୍ନରେ ଏକ ବସ୍ ସମସ୍ତଙ୍କୁ ଆଣି ସୋହେଲା ଥାନା ଛକରେ ଛାଡି ପଳାଇ ଯାଇଥିଲା। ଶ୍ରମିକମାନେ ସେଠାରୁ ସେମାନଙ୍କ ଘରକୁ କିପରି ଯିବେ ଚିନ୍ତାରେ ପଡି ଯାଇଥିଲେ। ଖବର ପାଇ ମନ୍ତ୍ରୀ ସିଂ ଥାନା ଛକକୁ ଯାଇ ସେମାନଙ୍କ ଭଲ ମନ୍ଦ ବୁଝିବା ସହିତ ବିସ୍କୁଟ ଓ ପାଣି ଦେଇଥିଲେ। ପରେ ସେମାନଙ୍କ ଗନ୍ତବ୍ୟସ୍ଥଳକୁ ନେଇ ଯିବା ପାଇଁ ସେ ୨ଟି ପିକଅପ ଭ୍ୟାନ ଓ ଗୋଟିଏ ଅଟୋର ବ୍ୟବସ୍ଥା କରିଥିଲେ। ଅଟୋରେ ୨
ଜଣ ଶ୍ରମିକ ରାମପୁର ଯାଇଥିବାବେଳେ ପିକଅପ ଭ୍ୟାନ ଚଳାଇବାକୁ କେହି ଡ୍ରାଇଭର ମିଳି ନ ଥିଲେ। ଶେଷରେ ମନ୍ତ୍ରୀ ଗାଡି ନିଜେ ଚଳାଇ ଶ୍ରମିକାମନଙ୍କୁ ପଦ୍ମପୁର ନେଇ ଯାଇଥିଲେ। ଅନ୍ୟ ଗାଡିଟି ପାଟଣାଗଡ଼ ଯାଇଥିବା ଜଣାପଡିଛି।
