ବୋଲଗଡ଼,୨୬ା୭(ଡି.ଏନ.ଏ.): ବୋଲଗଡ଼ ବ୍ଲକ ବଡକୁମାରୀ-ହାଟବସ୍ତ ରାସ୍ତା ମଧ୍ୟବର୍ତ୍ତୀ ଧୋବାପଡିଆଠାରେ ରହିଛି ଏକ ପୁରୁଣା ଦୁର୍ବଳ ପୋଲ। ପିଚୁ, କଂକ୍ରିଟ ଉଠିଯାଇଥିବାରୁ ପୋଲଟି ଦୁର୍ବଳ ଓ ବିପଜ୍ଜନକ ଅବସ୍ଥାରେ ରହିଛି। ତେବେ ବାରମ୍ବାର ଅଭିଯୋଗ ସତ୍ତ୍ୱେ ପୋଲ ଓ ସଂଲଗ୍ନ ରାସ୍ତାଟିକୁ ମରାମତି କରାଯାଉ ନ ଥିବାରୁ ଜନ ଅସନ୍ତୋଷ ଦେଖାଦେଇଛି। ସୂଚନାଯୋଗ୍ୟ, ତିତ୍ଲି ବାତ୍ୟା ସମୟରେ ବୋଲଗଡ଼ ବ୍ଲକ ଅଞ୍ଚଳରେ ପ୍ରବଳ ବର୍ଷା ଅର୍ଥାତ୍ ୨ ଦିନ ମଧ୍ୟରେ ୨୬୦ ମିଲିମିଟର ବର୍ଷା ହୋଇଥିଲା । ଏହି ସମୟରେ ଉକ୍ତ ପୋଲ ଉପରେ ପ୍ରାୟ ୪ ଫୁଟ ଉଚ୍ଚତାର ବର୍ଷାଜଳ ପ୍ରବାହ ହୋଇ ରାସ୍ତା ଉପରୁ ପିଚୁ ଉଠି ଯାଇଥିଲା । ଏ ପର୍ଯ୍ୟନ୍ତ ଏହାର ମରାମତି ହେଉ ନ ଥିବାରୁ ଲୋକେ ଅସୁବିଧାର ସମ୍ମୁଖୀନ ହେଉଛନ୍ତି। ଅନେକ ସମୟରେ ଛୋଟବଡ଼ ଦୁର୍ଘଟଣା ମଧ୍ୟ ଘଟୁଛି। ଏହି ପୋଲ ଉପର ରାସ୍ତାଟିକୁ ମରାମତି ନିମନ୍ତେ ସ୍ଥାନୀୟ ଲୋକେ ବାରମ୍ବାର ଦାବି କରିବା ସତ୍ତ୍ୱେ ରାସ୍ତାଟିକୁ ପ୍ରଶାସନ ପକ୍ଷରୁ ନିର୍ମାଣ କରାଯାଉନାହିଁ। ଏହା ଉପରେ ଭାରି ଯାନ ଚଳାଚଳ କରିବା ଦ୍ୱାରା ପୋଲର ପୂର୍ବ ପାର୍ଶ୍ୱ ଅଂଶ କଂକ୍ରିଟ ଫାଟି ଦିନକୁ ଦିନ ଦୁର୍ବଳ ଓ ଶୋଚନୀୟ ହୋଇପଡ଼ୁଛି। ବନ୍ୟା ସମୟରେ ଏହା ଉପରେ ଜଳ ପ୍ରବାହିତ ହୋଇ ଅଧିକ ସମୟ ଜମା ହୋଇ ରହିଲେ ପୋଲଟି କେତେବେଳେ ଯେ ଧନଜୀବନ ପ୍ରତି ବିପଦ ପାଲଟିିବ ସେ ନେଇ ଯାତାୟାତକାରୀ ଆଶଙ୍କାରେ ରହିଛନ୍ତି। ତେଣୁ ତୁରନ୍ତ ପୋଲ ଉପର ରାସ୍ତା ମରାମତି କରିବା ଅତ୍ୟନ୍ତ ଜରୁରୀ ବୋଲି ବିଭିନ୍ନ ମହଲରେ ମତ ପ୍ରକାଶ ପାଇଛି।
