ନୂଆଦିଲ୍ଲୀ,୧। ୪: କରୋନା ପ୍ରଭାବକୁ କମ୍ କରିବା ଲାଗି ସରକାର ନିକଟରେ ୧.୭ ଲକ୍ଷ କୋଟିର ଏକ ପ୍ୟାକେଜ ଘୋଷଣା କରିଛନ୍ତି। ଏହି ପ୍ୟାକେଜ ବିଶେଷ କରି ଲୋକମାନଙ୍କ ପାଇଁ ଆସିଛି। ଶିଳ୍ପ ଜଗତ ଉପରେ ଏବେ କରୋନା ଭୂତାଣୁର ପ୍ରଭାବ ରହିଥିବା ବେଳେ ଲକ୍ଡାଉନ ଯୋଗୁ ଦେଶ ମଧ୍ୟରେ ଆର୍ଥତ୍କ କାର୍ଯ୍ୟକଳାପ ଠପ୍ ହୋଇ ଯାଇଛି। ୨୧ ଦିନର ଲକ୍ଡାଉନ ସମୟରେ ଘରୋଇ ବଜାରକୁ ପ୍ରାୟ ୯ ଲକ୍ଷ କୋଟି ଟଙ୍କାର କ୍ଷତି ସହିବାକୁ ପଡିବ ବୋଲି ଏକ ପ୍ରାରମ୍ଭିକ ଆକଳନରେ କୁହାଯାଇଛି। ଏପଟେ ଶିଳ୍ପ ଜଗତ ଲାଗି କୌଣସି ପ୍ୟାକେଜ ଘୋଷଣା ହୋଇନାହିଁ। କୋଭିଡ-୧୯ ଦ୍ୱାରା ପ୍ରଭାବିତ ଶିଳ୍ପ କ୍ଷେତ୍ରକୁ ସହାୟତା କରିବା ଲାଗି ସରକାର ଶୀଘ୍ର ପ୍ୟାକେଜ ଘୋଷଣା କରିପାରନ୍ତି ବୋଲି ଶୁଣାଯାଉଛି। ଏହି ସମୟରେ ଶିଳ୍ପ ଜଗତକୁ ଟିକସ ରିହାତି ପ୍ରଦାନ କରାଯାଇପାରେ ବୋଲି ଆଶା କରାଯାଉଛି।
କୋଭିଡ-୧୯ ଲାଗି ଅଣୁ,କ୍ଷୁଦ୍ର ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ), ସର୍ଭିସ ଏବଂ ରପ୍ତାନି କ୍ଷେତ୍ର ବେଶି କ୍ଷତିଗ୍ରସ୍ତ ହୋଇଛି। ବିଭିନ୍ନ ଋଣ ପ୍ରଦାନକାରୀ ସଂସ୍ଥା ସହାୟତା ଲାଭ କରିବା ଲାଗି ଭାରତ ସରକାର ଜାତିସଂଘ ସହ ଆଲୋଚନା ଆରମ୍ଭ କରିଛନ୍ତି। ଏହା ଦ୍ୱାରା ଆବଶ୍ୟକ ସ୍ବାସ୍ଥ୍ୟ ଭିତ୍ତିଭୂମି ସ୍ଥାପନ ବାଦ ଅନ୍ୟ କିଛି କ୍ଷେତ୍ରକୁ ସହାୟତା ଯୋଗାଇ ଦେବା ନେଇ ଲକ୍ଷ୍ୟ ଧାର୍ଯ୍ୟ ହୋଇଛି। ଏହି ଦିଗରେ ସରକାର କାର୍ଯ୍ୟକ୍ରମ ଜାରି ରଖିଛନ୍ତି। ଏହି ଯୋଜନା ଉପରେ ବିସ୍ତୃତ ଘୋଷଣା ଶୀଘ୍ର ହେବ ବୋଲି ପ୍ରକ୍ରିୟା ସହ ଜଡିତ ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି। ଅନ୍ୟ ଜଣେ ସରକାରୀ ଅଧିକାରୀ କହିଛନ୍ତି ଯେ, ରପ୍ତାନି କ୍ଷେତ୍ରରେ ପରଫରମାନ୍ସ ଭିତ୍ତିକ ପ୍ରୋତ୍ସାହନ ପ୍ୟାକେଜ ଆସିପାରେ। ସୂଚନା ଯୋଗ୍ୟ ମାର୍ଚ୍ଚ ୨୫ରେ ଘୋଷଣା ହୋଇଥିବା ଲକ୍ଡାଉନ ପାଇଁ ରପ୍ତାନି, ରିଟେଲ, କଞ୍ଜ୍ୟୁମର ଡ୍ୟୁରେବଲ ସମେତ ବିମାନ, ହସ୍ପିଟାଲିଟି, ଫୁଡ, ଟ୍ରାଭେଲ ଏବଂ ଟୁରିଜିମ କ୍ଷେତ୍ର କ୍ଷତିଗ୍ରସ୍ତ ହୋଇଛି।
ବେଶି କ୍ଷତିଗ୍ରସ୍ତ ହୋଇଥିବା କ୍ଷେତ୍ରଗୁଡିକ ପ୍ୟାକେଜ ମଧ୍ୟରେ ସାମିଲ କରାଯିବ। ଏହି ପ୍ରକ୍ରିୟାକୁ ତ୍ୱରାନ୍ବିତ କରିବା ସ୍ବରୂପ ଏବେ ଅର୍ଥ ମନ୍ତ୍ରଣାଳୟ, ଅଂଶୀଦାର ମନ୍ତ୍ରଣାଳୟ ଏବଂ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ(ପିଏମ୍ଓ) ଆଲୋଚନା କରୁଥିବା ଅଧିକାରୀ କହିଛନ୍ତି। ନିକଟରେ ସୀତାରାମନ ଘୋଷଣା କରିଥିବା ପ୍ୟାକେଜରେ ଖାଦ୍ୟଶଷ୍ୟ ଏବଂ ଜରୁରି ଭିତ୍ତିରେ ଅର୍ଥରାଶିକୁ ସାମିଲ କରାଯାଇଛି। ରିଜର୍ଭ ବ୍ୟାଙ୍କ ଶୁକ୍ରବାର କିଛି ପଦକ୍ଷେପ ଘୋଷଣା କରିଛି। ଏହା ୭୫ ବେସିସ ପଏଣ୍ଟ ରେପୋ କମାଇବା ସହ କ୍ୟାଶ ରିଜର୍ଭ ରେସିଓରେ ୧୦୦ ବେସିସ ପଏଣ୍ଟ ହ୍ରାସ କରିଛି। ମିଆଦି ଋଣ ଉପରେ ୩ ମାସର ଆଶ୍ୱସ୍ତି ପ୍ରଦାନ କରାଯାଇଛି। ପ୍ୟାକେଜ ଆସିଲେ ଏହା ଶିଳ୍ପ ଜଗତକୁ ଟ୍ରାକ୍କୁ ଫେରିବାରେ ସହାୟକ ହେବ ବୋଲି ବଜାର ବିଶେଷଜ୍ଞମାନେ ଆଶା ପ୍ରକଟ କରିଛନ୍ତି।
୨ ଲକ୍ଷ କୋଟିର ପ୍ୟାକେଜ ନେଇ ଶିଳ୍ପ ଆଶାବାଦୀ
ସରକାରଙ୍କ ଆର୍ଥତ୍କ ପ୍ରୋତ୍ସାହନ ପ୍ୟାଜେକ ଦେଶର ଜିଡିପିର ୧% ବା ୨ ଲକ୍ଷ ହେଉ ବୋଲି ଶିଳ୍ପଜଗତ ଆଶାବାଦି ରହିଛି। ଏହାବାଦ ଦୀର୍ଘ କାଳୀନ ପୁଞ୍ଜି ପ୍ରାପ୍ତି ଟିକସ ହ୍ରାସଏବଂ ରପ୍ତାନି କ୍ଷେତ୍ରକୁ ପ୍ରୋତ୍ସାହନ ପ୍ୟାକେଜ ପ୍ରଦାନ କରାଯିବା ନେଇ ଇଣ୍ଡିଆ ଇଙ୍କ ଆଶା ରଖିଛି। ଏଭଳି ସ୍ଥିତିରେ ଅଧିକାଂଶ ରେଟିଂ ଏଜେନ୍ସି ଭାରତର ବିକାଶ ଅନୁମାନକୁ କମାଇଛନ୍ତି।
