ନୂଆଦିଲ୍ଲୀ,୪-୭: ଶିଳ୍ପପତି କୁମାର ମଙ୍ଗଳମ ବିର୍ଲାଙ୍କ ଜେଜେବାପା ତଥା ବି.କେ.ବିର୍ଲା ଗ୍ରୁପ୍ ଅଫ୍ କମ୍ପାନୀର ଅଧ୍ୟକ୍ଷ ବି.କେ.ବିର୍ଲାଙ୍କର ୯୮ ବର୍ଷରେ ବୁଧବାର ମୁମ୍ବାଇରେ ପରଲୋକ ହୋଇଯାଇଛି। ୧୯୨୧ ଜାନୁୟାରୀ ୧୨ରେ ଜନ୍ମିତ ବସନ୍ତ କୁମାର ବିର୍ଲା ଶିଳ୍ପ ଜଗତରେ ବି.କେ. ନାମରେ ପରିଚିତ ଥିଲେ। ମହାନ ଉଦ୍ୟୋଗପତି ଘନଶ୍ୟାମ ବିର୍ଲାଙ୍କର ସେ ସର୍ବକନିଷ୍ଠ ପୁତ୍ର ଥିଲେ। ମାତ୍ର ୧୫ ବର୍ଷ ବୟସରେ ସେ ବ୍ୟବସାୟ ସହ ଜଡ଼ିତ ହୋଇଥିଲେ। ତାଙ୍କର ତିନୋଟି ସନ୍ତାନଙ୍କ ମଧ୍ୟରୁ ଏକମାତ୍ର ପୁତ୍ର ଆଦିତ୍ୟ ବିକ୍ରମ ବିର୍ଲାଙ୍କର ୧୯୯୫ରେ ପରଲୋକ ହୋଇଯାଇଛି। କେସୋରାମ ଇଣ୍ଡଷ୍ଟ୍ରିଜର ୮୮ତମ ବାର୍ଷିକ ସାଧାରଣ ବୈଠକରେ ଯୋଗ ଦେଇ ସେ କହିଥିଲେ ଯେ, ୯୦ ବର୍ଷ ବୟସରେ ଅବସର ନେବେ। ସେ ତାଙ୍କ ଅବସର ସମୟ ଆର୍ଟ ଓ କଲ୍ଚର ପାଇଁ ବିନିଯୋଗ କରିବେ ବୋଲି ଜାହିର କରିଥିଲେ। ନିଜର ବିଶାଳ କାରବାର ଲାଗି ଉତ୍ତରାଧିକାରୀ ଚୟନ କରିଥିଲେ। କୁମାର ମଙ୍ଗଳମ ବିର୍ଲାଙ୍କୁ ଏହାର ଦାୟିତ୍ୱ ନେବାକୁ ସେ ଚାହୁଁଥିଲେ। ନିଜର ଅଦମ୍ୟ ପ୍ରୟାସ ବଳରେ ସେଞ୍ଚୁରୀ ଟେକ୍ସଟାଇଲକୁ ଦେଶର ଅଗ୍ରଣୀ କମ୍ପାନୀ ଭାବେ ପ୍ରତିଷ୍ଠିତ କରିପାରିଥିଲେ। ୧୯୪୦ରେ ସେ କେସୋରାମ ଇଣ୍ଡଷ୍ଟ୍ରିଜ୍ରେ ଡାଇରେକ୍ଟର ଭାବେ ଦାୟିତ୍ୱ ଗ୍ରହଣ କରିଥିଲେ। ବି.କେ. ବିର୍ଲା ବିଶେଷ କରି କପା, ଭିସ୍କୋସ୍, ପଲିଷ୍ଟର, ନାଏଲନ ସୂତା, କାଗଜ, ସିପିଂ, ପାରଦର୍ଶୀ କାଗଜ, ସିମେଣ୍ଟ, ଚା’, କଫି, ଅଳେଇଚ, ରସାୟନ, ପ୍ଲାଇଉଡ୍ ଭଳି କ୍ଷେତ୍ରରେ ମିଳିଥିବା ସୁଯୋଗର ସଦ୍ବ୍ୟବହାର କରିଥିଲେ। ବ୍ୟବସାୟ ଜଗତରେ ତାଙ୍କର ୭୦ ବର୍ଷର ଅଭିଜ୍ଞତା ଥିଲା। ବି.କେ. ବିର୍ଲା ଦେଶ ବିଦେଶରେ ପ୍ରତିଷ୍ଠିତ ପ୍ରାୟ ୨୫ ଶିକ୍ଷା ପ୍ରତିଷ୍ଠାନ ଓ ଚାରିଟେବୁଲ ଟ୍ରଷ୍ଟ ପ୍ରତିଷ୍ଠା କରି ଏହାର ପରିଚାଳନା ଦାୟିତ୍ୱରେ ରହିଥିଲେ।
