ସଜନାଗଡ଼, ୮।୮(ଡି.ଏନ.ଏ.)-ଶିଶୁ କନ୍ୟା ପ୍ରତି ଘୃଣା ଭାବ ପୋଷଣ ନ କରିବା ପାଇଁ ବିଭିନ୍ନ ପ୍ରକାର ସଚେତନତା କାର୍ଯ୍ୟକ୍ରମ କରାଯାଉଥିଲେ ମଧ୍ୟ ତାହା ସମ୍ପୂର୍ଣ୍ଣ ସଫଳ ହୋଇପାରିନି। ଏବେ ବି ଶିଶୁକନ୍ୟାକୁ ଅଲୋଡା ଭାବି ଅତି ନିର୍ଦ୍ଦୟ ଭାବେ ରାସ୍ତାକଡରେ ଛାଡି ଚାଲିଯିବାକୁ ପଛାଉନାହାନ୍ତି। ଏଭଳି ଏକ ଅଭାବନୀୟ ଘଟଣା ଘଟିଛି ବାଲେଶ୍ୱର ଜିଲା ନୀଳଗିରି ବ୍ଲକ ଅଧିନ ମହିଷାପଟା ଗ୍ରାମପଞ୍ଚାୟତ ଶାଳବଣି ଗ୍ରାମରେ। ବୁଧବାର ବିଳମ୍ବିତ ରାତିରେ କେହି ଅତି ନିର୍ଦ୍ଦୟ ଭାବେ ଅନ୍ଧାର ରାତିର ସୁଯୋଗ ନେଇ ଏକ ସଦ୍ୟଜାତ ଶିଶୁ କନ୍ୟାକୁ ଶାଳବଣି ଗ୍ରାମ ଛକ ନିକଟସ୍ଥ ଦୋକାନଘର ଚାଳିଆରେ ଛାଡ଼ି ପଳାଇଯାଇଥିଲେ। କନ୍ୟାର କାନ୍ଦ ଶୁଣି ସ୍ଥାନୀୟ ଅଞ୍ଚଳର ଆରତୀ ସିଂ ନାମ୍ନୀ ମହିଳା ଘଟଣାସ୍ଥଳକୁ ଆସି ଶିଶୁକନ୍ୟାକୁ ଉଦ୍ଧାର କରିଥିଲେ। ଉକ୍ତ ଶିଶୁକନ୍ୟା ଜୀବିତ ଥିବା ଜାଣିବା ପରେ ଆରତୀ ରାତିରେ ଗ୍ରାମବାସୀଙ୍କୁ ଜଣାଇଥିଲେ। ଗ୍ରାମବାସୀ ଚାଇଲ୍ଡ ଲାଇନ୍ ସଦସ୍ୟଙ୍କୁ ଫୋନ୍ କରିଥିଲେ ହେଁ ଯୋଗାଯୋଗ ହୋଇପାରି ନ ଥିଲା। ଶିଶୁକନ୍ୟା ଆରତୀଙ୍କ ପାଖରେ ଥିଲେ। ଆଶାକର୍ମୀ ଭାରତୀ ସିଂଙ୍କ ସହଯୋଗରେ ଶିଶୁକୁ ଗୁରୁବାର ଆମ୍ବୁଲାନ୍ସ ଯୋଗେ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ସୂଚନା ମିଳିଛି।
