ଶବ ସତ୍‌କାର ଲାଗି ନାକ୍‌ଟେକଲେ ଜାତିଭାଇ: ସହଯୋଗ୍‌ର ହାତ୍‌ ବଢ଼ାଲେ ସାମାଜିକ କରମୀ
8:19 amAugust 21, 2019 / 21

ବିଜେପୁର, ୨୧।୮ (ଡି.ଏନ୍‌.ଏ.): ମୁନୁଷ୍‌ ପୁର୍‌ଥିରୁ ଯାଇ ଚଁଦର୍‌ରେ ପୁହୁଁଚିଲାନ। ହେଲେ ଆଏଜ୍‌ ବି ଆମର ସମାଜରୁ ଅଁଧ୍‌ ବିଶୁଆସ, କୁସଂସ୍କାର ନାଇଁ ଯିବାର। ମୁନୁଷ୍‌ ମରିଗଲା ଉତାରୁ ବି ଶବ ସତ୍‌କାର କରବାକେ ଜାତି ଭାଇ ନାକ୍‌ ଟେକୁଛନ୍‌। ଏନ୍‌ତା ପରିସ୍ଥିତିରେ ରାତାରାତି ଶବ ସତ୍‌କାର କରବାକେ ଅଁଟା ଭିଡି ଝନେ ସାମାଜିକ୍‌ କରମୀ ସମାଜ ଲାଗି ଉଦାହରନ୍‌ ସୁରୁଷ୍‌ଟି କରିଛନ୍‌।
ସୂଚନା ହିସାବେ ବରଗଡ଼ ଜିଲା ବିଜେପୁର ବ୍ଲକ ସମଲାଇପଦର ପଁଚେତ୍‌ ସଦରଥି ଏନ୍‌ତା ଗୁଟେ ଦୁଖଦ୍‌ ଘଟନା ଦେଖ୍‌ବାକେ ମିଲିଛେ। ସମଲାଇପଦରର ଉପାସୀ ଭୁଏ(୭୫)। ଆଏଜ୍‌କେ ଦୁଇ ବଛର ହେଲା ସେ ବେମାର ପଡ଼ିଥିଲେ। ଯେତେ ଉଷୋକଷା କଲେ ବି ସେ ଭଲ ନାଇଁ ହେଉଥାଇ। ଗଲା ମାସେ ତଲେ ତକର କାନେ ଗୁଟେ ଘା’ ହେଇଥିଲା। ହେଲେ ସେବା ଯତନ୍‌ ଅଭାବୁ ଘା’ରେ ପୋକ୍‌ ହେଇଯାଇଥିଲେ। ଗଲା ରଏବାର ବେଲବୁଡର ୫ ବଜେ ସବୁଦିନର ଲାଗି ତାକର ନିଶାସ୍‌ ବଁଦ୍‌ ହେଇଗଲା। ଶବ ସତ୍‌କାର କରବାର ଲାଗି ଉପାସୀର ପୁଓ ମଗଶିର ଭୁଏ(୩୨) ଆର ନାତି ସୁଦାମ ଖଣ୍ଡା(୨୦) ଜାତି ଭାଇମାନକୁ ବିନ୍‌ତି କଲେ। ହେଲେ ଜାତି ଭାଇମାନେ ବୁଢ଼ୀର ଶବ୍‌କେ ଛିଁଲେ ଜାଏତ୍‌ ହେବାକେ ପଡ଼ବା ବଲି କେହି ପାସ୍‌କେ ନାଇଁ ଆଏଲେ। ଏନ୍‌ତାଥି ମଗଶିରକେ ଚାରହିକୁତି ଅଁଧାର ଦିଶ୍‌ଲା। ୫ ଘଁଟା ତକ୍‌ ମୁରଦାର ଘରେ ପଡ଼ି ରହେଲା। ଇ ଖବର ପାଇ ପାର୍ବତୀ ଗିରୀ ବୃଦ୍ଧାଶ୍ରମର ପରିଚାଲକ ଜଳନ୍ଧର ପଟେଲ ଆର ତାକର ପୁଓ ବିକାଶ ପଟେଲ ମଗଶିରକେ ସାହାଯ୍‌ କରବାକେ ଅଁଟା ଭିଡ଼ିଥିଲେ। ପୁଓ ନାତି ସଂଗେ ଦୁଇ ବାପ୍‌ପୁଓ ମିଶି ରାତାରାତି ଶବ ସତ୍‌କାର ଲାଗି ମଶାନ୍‌ପଦାକେ ନେଇଥିଲେ। ସାମାଜିକ୍‌ କରମୀକଁର ଇ ମହତ୍‌ କାଯ୍‌କେ ପାସର ଆସର ପଁାଚ୍‌ପାଲି ଗଁାର ଲୋକ୍‌ ବଡ଼ଭାରି ପରଶଁସା କରିଛନ୍‌।