ପାରାଦୀପ,୩ା୩(ସ୍ବ.ପ୍ର.): ପାରାଦୀପ ପିପିଏଲ ଟାଉନଶିପରେ ରହୁଥିବା ମେଧାବୀ ଛାତ୍ରୀ ଶ୍ୱେତରୂପା ମିଶ୍ର ଏବେ ଲଣ୍ଡନର ସୋଆସ(ସ୍କୁଲ ଅଫ୍ ଓରିଏଣ୍ଟାଲ ଆଣ୍ଡ୍ ଆଫ୍ରିକାନ୍ ଷ୍ଟଡିଜ) ବିଶ୍ୱବିଦ୍ୟାଳୟରେ ପିଜି କରୁଛନ୍ତି। ଲିଙ୍ଗଗତ ଅସମାନତା ଉପରେ ସେ ଭାରତର ଏକମାତ୍ର ଛାତ୍ରୀ ଭାବେ ଲଣ୍ଡନର ଏହି ବିଶ୍ୱବିଦ୍ୟାଳୟରେ ପଢ଼ିବାକୁ ସୁଯୋଗ ପାଇଛନ୍ତି ବୋଲି ବାପା ସତ୍ୟନାରାୟଣ ମିଶ୍ର କହିଛନ୍ତି। ଶ୍ୱେତରୂପାଙ୍କ ଏହି ସଫଳତା ସମ୍ପର୍କରେ ଇଫ୍କୋ କମ୍ପାନୀ ତା’ର ବାର୍ଷିକ ପତ୍ରିକାରେ ପ୍ରମୁଖ ଭାବେ ଖବର ପ୍ରକାଶ କରିଛିି।
ସୂଚନାଯୋଗ୍ୟ, ଶ୍ୱେତରୂପା ପିପିଏଲ ଡିଏଭି ସ୍କୁଲରୁ ପ୍ରାଥମିକ ଶିକ୍ଷା ଶେଷ କରିବା ପରେ ଦିଲ୍ଲୀର ଇନ୍ଦ୍ରପ୍ରସ୍ଥ ବିଶ୍ୱ ବିଦ୍ୟାଳୟରୁ ସ୍ନାତକ କରିଥିଲେ। ଦିଲ୍ଲୀରେ ଥିବାବେଳେ ସେ ଦୁଃଖୀ ଓ ଗରିବ ଲୋକଙ୍କ ସେବାରେ ନିୟୋଜିତ ଥିଲେ। ଏଥିସହ ତୃତୀୟ ଲିଙ୍ଗ (କିନ୍ନର)ସମ୍ପର୍କରେ ସଚେତନତା ସୃଷ୍ଟି କରୁଥିଲେ। ଆମେରିକା ମେକ୍ସିକୋର ଗ୍ଲୋବାଲ ସଂସ୍ଥା ଫେଡେରିକୋ ସାଲାସ ପ୍ରତିଯୋଗିତା ୨୦୨୧ରେ ସେ ଦ୍ୱିତୀୟ ସ୍ଥାନ ପାଇଥିଲେ। ଏମିତି ଅନେକ କୃତିତ୍ୱ ହାସଲ କରିବା ପରେ ଲଣ୍ଡନର ସୋଆସ ବିଶ୍ୱବିଦ୍ୟାଳୟ ପକ୍ଷରୁ ଶ୍ୱେତରୂପାଙ୍କୁ ପଢ଼ିବା ପାଇଁ ସୁଯୋଗ ମିଳିଛି। ୨୦୨୨-୨୩ ଶିକ୍ଷାବର୍ଷ ପାଇଁ ତାଙ୍କୁ ଚୟନ କରାଯାଇଥିବା ବେଳେ ଏଥିପାଇଁ କୌଣସି ଫି’ ଦେବାକୁ ପଡ଼ୁନାହିଁ ବୋଲି ବାପା ସତ୍ୟନାରାୟଣ କୁହନ୍ତି। ବାପା ଇଫ୍କୋ କମ୍ପାନୀର ପ୍ରଶାସନିକ ଅଧିକାରୀ ଥିବାବେଳେ ମା’ ରୀନା ମହାପାତ୍ର ପିପିଏଲ୍ ଡିଏଭି ସ୍କୁଲର ବିଜ୍ଞାନ ବିଭାଗର ଅଧ୍ୟାପିକା। ତାଙ୍କ ପୈତୃକ ଗ୍ରାମ ଅନୁଗୋଳର ସଟରାଙ୍ଗ। ଆଗକୁ ଶ୍ୱେତରୂପା ମୂକ, ବଧିର ଭଳି ଭିନ୍ନକ୍ଷମ ପିଲାଙ୍କୁ ମାଗଣାରେ ଶିକ୍ଷାଦାନ କରିବେ ବୋଲି କହିଛନ୍ତି।
