ମୁମ୍ବାଇ/ହାଇଦ୍ରାବାଦ,୧୨।୯: ପ୍ରତି ବର୍ଷ ମହାରାଷ୍ଟ୍ରରେ ଭଗବାନ ଗଣପତିଙ୍କ ବିସର୍ଜନ ବହୁ ଆଡ଼ମ୍ବରରେ କରାଯାଇଥାଏ। ଗୁରୁବାର ମୁମ୍ବାଇ ଓ ହାଇଦ୍ରାବାଦରେ ବିଘ୍ନବିନାଶନଙ୍କ ମୂର୍ତ୍ତି ବିସର୍ଜନ କରାଯିବ। ଏଥିପାଇଁ ଜୋରଦାର ପ୍ରସ୍ତୁତି ମଧ୍ୟ କରାଯାଇଛି। ମହାରାଷ୍ଟ୍ରର ଲାଲବାଗ ରାଜାର ପେଣ୍ଡାଲରେ ଚଳିତ ଥର ଗଣେଶଙ୍କ ମୂର୍ତ୍ତି ସହ ଚନ୍ଦ୍ରୟାନ-୨ର ଦୃଶ୍ୟ ଦେଖିବାକୁ ମିଳିଥିଲା। ଏହା ସବୁଠାରୁ ଅଧିକ ଚର୍ଚ୍ଚାରେ ରହିଥିଲା। ହେଲେ ହାଇଦ୍ରାବାଦ ମଧ୍ୟ ଏଥିରୁ ବାଦ୍ ପଡ଼ିନାହିଁ। ଚଳିତ ବର୍ଷ ଖେରାତବାଦରେ ୬୧ ଫୁଟ ଉଚ୍ଚ ଗଣେଶଙ୍କ ମୂର୍ତ୍ତି ଦେଖିବାକୁ ମିଳିଛି। ତାଙ୍କୁ ଦର୍ଶନ କରିବା ପାଇଁ ସକାଳ ୭ଟାରୁ ଲୋକଙ୍କ ଭିଡ ଜମୁଥିବା ବେଳେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିଲା। ଗଣେଶଙ୍କ ଏହି ମୂର୍ତ୍ତି ପ୍ରାୟ ୫୦ ଟନ୍ ଥିବା ବେଳେ ଏହାକୁ ତିଆରି କରିବା ପାଇଁ ୧ କୋଟି ଟଙ୍କା ଖର୍ଚ୍ଚ ହୋଇଛି। ସବୁଠାରୁ ରୋଚକ କଥା ହେଲା ଏଠାରେ ୭୫୦ କିଲୋଗ୍ରାମର ଲଡ଼ୁ ଠାକୁରଙ୍କୁ ସମର୍ପଣ କରାଯାଇଥିଲା। ତେବେ ଏହି ଲଡ଼ୁକୁ ବିସର୍ଜନ ସମୟରେ ଭୋଗ ଭାବେ ବଣ୍ଟାଯିବ। ଅନ୍ୟପଟେ ହାଇଦ୍ରାବାଦର ଏହି ବିଶାଳକାୟ ମୂର୍ତ୍ତିଙ୍କୁ ବିସର୍ଜନ ପାଇଁ ୨୬ ଚକ ବିଶିଷ୍ଟ ଟ୍ରକରେ ହୁସେନ ସାଗର ନଦୀକୁ ନିଆଯିବ। ସେଠାରେ ସୁରକ୍ଷାକର୍ମୀଙ୍କ ସହାୟତାରେ ସୁରକ୍ଷିତ ଭାବେ ବିସର୍ଜନ କରାଯିବ ବୋଲି ଜଣାପଡ଼ିଛି।
