ବାର୍ସିଲୋନା, ୧୭।୧୦ (ଏଏଫ୍ପି)- ବାର୍ସିଲୋନା ଅଧିନାୟକ ଲିଓନେଲ ମେସି ୟୁରୋପିଆନ୍ ଲିଗ୍ରେ ମୋଟ୍ ଉପରେ ୬ଷ୍ଠ ଥର ପାଇଁ ଟପ୍ ଗୋଲ ସ୍କୋରର୍ ହୋଇଛନ୍ତି। ୨୦୧୮-୧୯ ସିଜନରେ ୩୬ ଗୋଲ୍ସ୍କୋର କରି ସେ ଗୋଲ୍ଡେନ ବୁଟ୍ ଅକ୍ତିଆର କରିଛନ୍ତି। ସେହିଭଳି ୩୨ ବର୍ଷୀୟ ଏହି ଆର୍ଜେଣ୍ଟିନାର ଷ୍ଟାର୍ ଲଗାତର ୩ୟ ବର୍ଷ ପାଇଁ ସୁନା ଜୋତା ଜିତିବାର ସୌଭାଗ୍ୟ ଲାଭ କରିଛନ୍ତି। ଚଳିତ ବର୍ଷ ଏହି ଗୋଲ୍ଡେନ ବୁଟ୍ ଦୌଡ଼ରେ ପ୍ୟାରିସ ସେଣ୍ଟ-ଜର୍ମେନ କ୍ଲବର ଯୁବ ଫୁଟ୍ବଲର କିଲିୟାନ ଏମ୍ବାପ୍ପେ ରହିଥିଲେ। କିନ୍ତୁ ମେସିଙ୍କଠାରୁ ୩ଟି ଗୋଲ କମ୍ ଦେଇ ଏମ୍ବାପ୍ପେ (୩୩) ଏହି ପୁରସ୍କାରରୁ ବଞ୍ଚତ୍ତ ହୋଇଛନ୍ତି। ବୁଧବାର ଏଠାରେ ଅନୁଷ୍ଠିତ ପୁରସ୍କାର ଗ୍ରହଣ ଉତ୍ସବରେ ମେସିଙ୍କ ସହ ତାଙ୍କ ଦୁଇ ପୁତ୍ର ଥିଆଗୋ ଓ ମାଟେଓ ଏବଂ ସ୍ତ୍ରୀ ଆଣ୍ଟୋନେଲା ରୋକୁଜୋ ଉପସ୍ଥିତ ରହିଥିଲେ। ସେହିଭଳି ବାର୍ସିଲୋନାର ଷ୍ଟାର୍ ଖେଳାଳି ଲୁଇସ ସୁଆରେଜ, ଜୋର୍ଡି ଆଲ୍ବା ପ୍ରମୁଖଙ୍କୁ ଏହି ଅବସରରେ ଦେଖିବାକୁ ମିଳିଥିଲା। ‘ଏହି ପୁରସ୍କାର ମୋ ପରିବାର ଓ ଏଠାରେ ଉପସ୍ଥିତ ରହିଥିବା ମୋ ସାଥି ଖେଳାଳିଙ୍କୁ ସମର୍ପିତ କରିବି। ମୋ ଟିମ୍ ବିନା ଏହି ପୁରସ୍କାର ଜିତିପାରି ନ ଥାନ୍ତି’ ବୋଲି ମେସି ଏହି ଅବସରରେ କହିଛନ୍ତି। ଏହି ପୁରସ୍କାର ଜିତିବାରେ ମେସି ତାଙ୍କ ଚରିପ୍ରତିଦ୍ୱନ୍ଦ୍ୱୀ କ୍ରିଷ୍ଟିଆନୋ ରୋନାଲ୍ଡୋଙ୍କଠାରୁ ଆଗରେ ରହିଛନ୍ତି। ରୋନାଲ୍ଡୋ କ୍ୟାରିୟରରେ ୪ଥର ଏହି ପୁରସ୍କାର ଜିତିଛନ୍ତି। ସେହିଭଳି ସୁଆରେଜଙ୍କ ସମେତ ୯ ଜଣ ଖେଳାଳି ୨ଥର ଲେଖାଏ ଏହି ସମ୍ମାନଜନକ ପୁରସ୍କାର ଜିତିବାର ସୌଭାଗ୍ୟ ଲାଭ କରିଛନ୍ତି। ୧୯୬୭ରୁ ଏହି ଗୋଲ୍ଡେନ ବୁଟ୍ ପୁରସ୍କାର ପ୍ରଦାନ କରାଯାଇ ଆସୁଛି। ପର୍ତ୍ତୁଗାଲ ଷ୍ଟ୍ରାଇକର୍ ଇଉସେବିଓ ପ୍ରଥମେ ଏହି ପୁରସ୍କାର ଜିତିଥିଲେ।
