କୋକସରା,୬।୯(ଡି.ଏନ.ଏ.)-ନୂଅଁାଖାଇ ପରେ ଅଞ୍ଚଳରେ ଖୁସିର ବାତାବରଣ ଲାଗି ରହିଥିବା ବେଳେ କଳାହାଣ୍ଡି ଜିଲା କୋକସରା ବ୍ଲକରେ ଗତ ଦୁଇ ଦିନ ଧରି ଲଗାଣ ବର୍ଷା ହୋଇଛି। ଏହାର ପ୍ରଭବାରେ କୋକସରା ବ୍ଲକରେ ଅନେକଙ୍କ ଘର ଭାଙ୍ଗିବା ସହିତ ଘରେ ପାଣି ପଶିଥିବା ସୂଚନା ମିଳିଛି । ସୂଚନା ଅନୁସାରେ କୋକସରା ବ୍ଲକ ଅନ୍ତର୍ଗତ ଗୋତୋମୁଣ୍ଡା ଗ୍ରାମପଞ୍ଚାୟତ ପିପଲଝାପର ଗ୍ରାମର ମକରନ୍ଦ ବିଶି ଓ ତାଙ୍କ ପରିବାର ରାତିରେ ଶୋଇଥିବା ବେଳେ ଘର ଭାଙ୍ଗି ଯାଇଥିବା ବେଳେ ଅଳ୍ପକେ ବର୍ତ୍ତି ଯାଇଛନ୍ତି। ଦୀର୍ଘ ଦିନ ହେବ ମକରନ୍ଦଙ୍କ ପରିବାର ଏକ ମାଟି ଘରେ ରହି ଆସୁଥିବାବେଳେ ବୁଧବାର ରାତିରେ ହୋଇଥିବା ଲଗାଣ ବର୍ଷାରେ ଘର ଭାଙ୍ଗି ଯାଇଛି। ଫଳରେ ସେମାନେ ପଡୋଶୀ ଘରେ ଆଶ୍ରୟ ନେଇଥିବା ଜଣାପଡିଛି। ସେହିପରି ଆମପାଣି ଗ୍ରାମପଞ୍ଚାୟତର ମଧୁ ସୁନା, ଦିବ୍ୟ ବାଗ, ରାଜୁ ବାଗ, ରାଏଚନ ସୁନାଙ୍କ ଭଳି ଅନେକ ଲୋକଙ୍କ ଘରେ ପାଣି ପଶିଥିବା ବେଳେ ମୁଷାପାଲି ଗ୍ରାମ ପଞ୍ଚାୟତ ଗହନାମୁଣ୍ଡା ଗ୍ରାମର ଟିକଚନ ରାଉତଙ୍କ ଘରେ ମଧ୍ୟ ପାଣି ପଶିଯାଇଛି। ଫଳରେ ଘରରେ ଥିବା ସମସ୍ତ ଆସବାବପତ୍ର ଓ ଗଚ୍ଛିତ ଖାଦ୍ୟ ସାମଗ୍ରୀ ନଷ୍ଟ ହୋଇଯାଇଥିବା ବେଳେ ସମସ୍ତେ ନିରାଶ୍ରୟ ହୋଇପଡିଥିବା ଅଭିଯୋଗ ହୋଇଛି। ଏ ନେଇ କୋକସରା ଗୋଷ୍ଠୀ ଉନ୍ନୟନ ଅଧିକାରୀ ବସନ୍ତ କୁମାର ସେଠୀଙ୍କ ପଚାରିବାରୁ ଯେହେତୁ ଅତ୍ୟଧିକ ବର୍ଷା ହୋଇନାହିଁ। ଯଦି ଆଗକୁ ବର୍ଷାର ପରିମାଣ ବଢେ ତେବେ ରିଲିଫ କୋର୍ଡ ଅନୁସାରେ ରିଲିଫ ଦିଆଯିବା ବ୍ୟବସ୍ଥା କରାଯିବ। ଯେଉଁମାନଙ୍କ ଘର ଭାଙ୍ଗିଛି ଓ ପାଣି ପଶିଛି ସ୍ଥାନୀୟ ରାଜସ୍ୟ ନିରୀକ୍ଷକଙ୍କ ତଦନ୍ତ ପରେ ତହସିଲଦାରଙ୍କୁ ରିପୋର୍ଟ ଦେବା ପରେ କ୍ଷତିପୂରଣ ଦିଆଯିବ ବୋଲି ପ୍ରକାଶ କରିଥିଲେ ।
