ମୁମ୍ବାଇ,୨୬।୪(ପିଟି): କରୋନା ମହାମାରୀକୁ ପ୍ରତିହତ କରିବାକୁ ସାରା ଦେଶରେ ମେ’୩ ପର୍ଯ୍ୟନ୍ତ ଲକ୍ଡାଉନ ଘୋଷଣା କରାଯାଇଛି। ସବୁ ବନ୍ଦ ରହିଥିବାରୁ ଦେଶର ଅର୍ଥନୈତିକ ସ୍ଥିତି ମଧ୍ୟ ବିଗିଡ଼ି ଗଲାଣି। ଲକ୍ଡାଉନ ହଟିବା ପରେ ଏହି ମହାମାରୀକୁ କିପରି ରୋକାଯାଇପାରିବ ଏବଂ ଦେଶ ପୁଣି ସ୍ବାଭାବିକ ସ୍ଥିତିକୁ ଫେରିପାରିବ ସେନେଇ ବିଶେଷଜ୍ଞମାନେ ବିଭିନ୍ନ ପ୍ରକାର ମତ ଦେଇଛନ୍ତି। କେତେକ ଲକ୍ଡାଉନ ହଟାଇବା ସମ୍ପର୍କରେ ମତ ଦେଇଥିବାବେଳେ ଅନ୍ୟ କେତେକ ଲକ୍ଡାଉନ ସପକ୍ଷରେ ମତ ଦେଇଛନ୍ତି। ସଂକ୍ରାମକ ରୋଗର ୨ବିଶେଷଜ୍ଞ ଜୟପ୍ରକାଶ ମୁଲିୟାଲ ଏବଂ ଟି.ଜାକବ ଲକ୍ଡାଉନ ହଟାଇବା ସମୟ ଆସିଛି ବୋଲି କହିଛନ୍ତି। ତାଙ୍କ ମତରେ ଦୀର୍ଘ ସମୟ ଧରି ଶଟଡାଉନ ଲାଗୁ କରିବା ଅର୍ଥ ଯେ, ଗୋଟିଏ ମୂଷାକୁ ମାରିବା ପାଇଁ ସମ୍ପୂର୍ଣ୍ଣ ଘରକୁ ପୋଡ଼ିଦେବା। ଜୟପ୍ରକାଶ କୁଷ୍ଠରୋଗ ଦୂରୀକରଣ ଏବଂ ଜାକବ ପଲ୍ସ ପୋଲିଓ ଟିକା କାର୍ଯ୍ୟକ୍ରମରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଜୟପ୍ରକାଶଙ୍କ ମତରେ ବୟସ୍କ ଲୋକଙ୍କଠାରେ ରୋଗ ପ୍ରତିରୋଧକ ଶକ୍ତି କମ୍ ଥିବାରୁ ସେମାନଙ୍କୁ କରୋନା ସଂକ୍ରମଣର ଅଧିକ ଆଶଙ୍କା ରହିଛି। ତେଣୁ ସେମାନଙ୍କୁ ଅତିକମ୍ରେ ୨ ରୁ ୩ ମାସ ସଙ୍ଗରୋଧ ରଖାଯିବା ଦରକାର। ଆଉ ଅନ୍ୟମାନଙ୍କୁ କାମ କରିବାର ସୁଯୋଗ ଦେବା ଆବଶ୍ୟକ। ହୁଏତ ଅନେକଙ୍କୁୁ କରୋନା ସଂକ୍ରମଣ ହେବାର ଆଶଙ୍କା ରହିଛି। ସେମାନଙ୍କୁ ଉପଯୁକ୍ତ ଚିକିତ୍ସା ସୁବିଧା ଯୋଗାଇ ଦିଆଗଲେ, ସେମାନେ ଭଲ ହୋଇଯିବେ ଏବଂ ମୃତ୍ୟୁ ହାର ମଧ୍ୟ କମିଯିବ ବୋଲି ଜୟପ୍ରକାଶ କହିଛନ୍ତି। ଗୋଷ୍ଠୀ ସଂକ୍ରମଣରୁ ମୁକ୍ତି ଚିନ୍ତାଧାରାରେ ବିଶ୍ୱାସ ରଖୁଥିବା ଜୟପ୍ରକାଶଙ୍କ କହିବା ହେଲା ଯେ, ଲୋକଙ୍କଠାରେ ପ୍ରାକୃତିକ ରୋଗପ୍ରତିରୋଧକ ଶକ୍ତି ଅଧିକ ଥିଲେ ସଂକ୍ରମଣର ଆଶଙ୍କା କମ୍ ରହିଥାଏ। ଏହି ଚିନ୍ତାଧାରା ପ୍ରଥମେ ବ୍ରିଟେନର ପ୍ରଧାନମନ୍ତ୍ରୀ ବୋରିସ୍ ଜନ୍ସନଙ୍କ ମନରେ ଆସିଥିଲା। ଏବେ ନ୍ୟୁୟର୍କରେ ଅଧିକ ମାତ୍ରାରେ କରାଯାଉଥିବା ରୋଗନାଶକ ଟେଷ୍ଟିଂରୁ ଜଣାପଡ଼ିଛି ଯେ,ସହରର ୨୦% ଲୋକ କରୋନା ସଂକ୍ରମଣର ଶିକାର ହୋଇଛନ୍ତି ଏବଂ ଆପେ ଆପେ ମଧ୍ୟ ଭଲ ହୋଇଛନ୍ତି। ଜୟପ୍ରକାଶଙ୍କ କହିବାହେଲା ଏବେ ଭାରତରେ ଗୋଷ୍ଠୀ ସଂକ୍ରମଣରୁ ମୁକ୍ତି ବଢ଼ିବାରେ ଲାଗିଛି। ମହାମାରୀକୁ ପ୍ରତିହତ କରିବା ପାଇଁ ପ୍ରାକୃତିକ ପ୍ରତିରୋଧକ ବ୍ୟବସ୍ଥା ଯଥେଷ୍ଟ। ଅଳ୍ପବୟସର ଲୋକଙ୍କଠାରେ ସଂକ୍ରମଣ ବ୍ୟାପିବାର ଆଶଙ୍କା କମ୍, ଆଉ ଯଦିବି ଆଶଙ୍କା ରହିଛି ତେବେ ଭଲ ହେବାର ସମ୍ଭାବନା ମଧ୍ୟ ଅଧିକ ରହିଛି ବୋଲି ସେ କହିଛନ୍ତି। ସେହିପରି ଜାକବଙ୍କ କହିବା ହେଲା ଲକ୍ଡାଉନ ହେଉଛି ସମୟ ମଧ୍ୟରେ ବନ୍ଦୀ ହୋଇ ରହିବା। ଥରେ ସମୟ ଭିତରୁ ବାହାରି ଆସିଲେ ସବୁ କାମ ସରଳ ହୋଇଯିବ। ଯେତେ ଅଧିକ ଦିନ ତୁମେ ବନ୍ଦୀ ହୋଇ ରହିବ ସେତେ ତୁମ ଉପରେ କାମ ଭାରି ହୋଇପଡ଼ିବ। ଲକ୍ଡାଉନ ଘୋଷଣା ସଂକ୍ରମଣକୁ କମାଇବା ପାଇଁ ନୁହେଁ ବରଂ ସଂକ୍ରମଣକୁ କିପରି ରୋକାଯାଇପାରିବ ସେଥିପାଇଁ ପ୍ରସ୍ତୁତ ହେବାକୁ କରାଯାଇଥିଲା। ଯଦି ତାହା ୨ସପ୍ତାହ ମଧ୍ୟରେ ହୋଇପାରିଲା ନାହିଁ, ତେବେ ୪ସପ୍ତାହ ପରେ ମଧ୍ୟ ହୋଇପାରିବ ନାହିଁ ବୋଲି ଜାକବ କହିଛନ୍ତି। ସେ ଲକ୍ଡାଉନକୁ ଏକ ଛୋଟିଆ ଗପ ସହ ତୁଳନା କରିଛନ୍ତି। ସେ କହିଛନ୍ତି, ଥରେ ଜଣେ ଚତୁର ଲୋକ ତାଙ୍କ ଘରେ ପଶିଥିବା ଏକ ମୂଷାକୁ ମାରିବାକୁ ନିଜ ଘରକୁ ସମ୍ପୂର୍ଣ୍ଣ ଭାବେ ଜାଳି ଦେଇଥିଲେ। ସେହିପରି ଲକ୍ଡାଉନ ୨ସପ୍ତାହ ପାଇଁ ଠିକ୍,ଏପରି କି ୩ସପ୍ତାହ ହେଲେ ଚଳିବ, ମାତ୍ର ଏହାଠାରୁ ଅଧିକ ସମୟ ଜାରି ରହିଲେ ତାହା ଘରକୁ ପୋଡ଼ିଦେବା ସଦୃଶ ହେବ ବୋଲି ଜାକବ କହିଛନ୍ତି। ତେବେ ସର୍ବୋପରି ସାମାଜିକ ଦୂରତ୍ୱ ରକ୍ଷା କରିବା ନିତାନ୍ତ ଆବଶ୍ୟକ ବୋଲି ସେ କହିଛନ୍ତି।
ଅପରପକ୍ଷରେ ଆଉକିଛି ସ୍ବାସ୍ଥ୍ୟ ବିଶେଷଜ୍ଞଙ୍କ ମତରେ ଉପଯୁକ୍ତ ସ୍ବାସ୍ଥ୍ୟ ବ୍ୟବସ୍ଥା କରାଯାଇ ପର୍ଯ୍ୟାୟକ୍ରମେ ଲକ୍ଡାଉନକୁ କୋହଳ କରାଯିବା ଆବଶ୍ୟକ। ନଚେତ ଗୋଷ୍ଠୀ ସଂକ୍ରମଣରୁ ମୁକ୍ତି ପାଇବା କଷ୍ଟକର ହୋଇପଡ଼ିବ ଏବଂ ଏହା ସ୍ବାସ୍ଥ୍ୟ ବ୍ୟବସ୍ଥା ଉପରେ ଭାରି ପଡ଼ିଯିବ ବୋଲି କହିଛନ୍ତି। ଇଣ୍ଡିଆନ କାଉନ୍ସିଲ ଫର ମେଡିକାଲ ରିସର୍ଚ୍ଚ(ଆଇସିଏମ୍ଆର୍)ର ନ୍ୟାଶନାଲ ଟାକ୍ସ ଫୋର୍ସ ମତରେ ଦେଶକୁ ପ୍ରଥମେ ସ୍ବାଭାବିକ ସ୍ଥିତିକୁ ଆଣିବାକୁ ପଡ଼ିବ। ଲକ୍ଡାଉନ ପରବର୍ତ୍ତୀ ଲକ୍ଷ୍ୟ ହେଉଛି ଉପଯୁକ୍ତ ଚିକିତ୍ସା ସୁବିଧା ସହ ପର୍ଯ୍ୟାୟକ୍ରମେ କଟକଣାକୁ କୋହଳ କରିବା। ଗୋଷ୍ଠୀ ସଂକ୍ରମଣରୁ ମୁକ୍ତି ଚିନ୍ତାଧାରା ହେଉଛି ତତ୍ତ୍ୱ ସମ୍ବନ୍ଧୀୟ। ବାସ୍ତବରେ ପୂର୍ବରୁ ଯେଉଁ ସ୍ଥାନରେ ଗୋଷ୍ଠୀ ସଂକ୍ରମଣ ହୋଇଥିବ ସେଠାରେ ପୁନଃ ସଂକ୍ରମଣ ହେବାର ଯଥେଷ୍ଟ ଆଶଙ୍କା ରହିଛି। ପୂର୍ବରୁ ମଧ୍ୟ ଏହା ପ୍ରମାଣିତ ହୋଇଛି। ବର୍ତ୍ତମାନ ସ୍ଥିତିରେ ଲକ୍ଡାଉନ ସବୁଠାରୁ ଭଲ ବ୍ୟବସ୍ଥା ଅଟେ ବୋଲି ଡାକ୍ତର ସଞ୍ଜୟ ପୂଜାରୀ କହିଛନ୍ତି। ତାଙ୍କ ମତରେ ମୃତ୍ୟୁହାର କମାଇବାରେ ଗୋଷ୍ଠୀ ସଂକ୍ରମଣ ମୁକ୍ତ ଚିନ୍ତାଧାରା ଠିକ୍। ମାତ୍ର କୋଭିଡ-୧୯ କ୍ଷେତ୍ରରେ ଏହି ଉପାୟକୁ ଆପଣାଇଲେ ଭାରତ ଭଳି ୧୩୦କୋଟିରୁ ଊର୍ଦ୍ଧ୍ୱ ଜନସଂଖ୍ୟାର ଦେଶରେ ସ୍ବାସ୍ଥ୍ୟ ବ୍ୟବସ୍ଥା ବିଗିଡ଼ିଯିବାର ଅଧିକ ଆଶଙ୍କା ରହିଛି।
