ନୂଆଦିଲ୍ଲୀ,୧୮ା୫(ଆଇଏଏନ୍ଏସ୍): କରୋନା ଭୂତାଣୁ ସଂକ୍ରମଣ ଆୟତ୍ତରେ ନାହିଁ। ତେଣୁ କେନ୍ଦ୍ର ସରକାର ରବିବାର ତାଲାବନ୍ଦ ଅବଧିକୁ ବୃଦ୍ଧି କରିଛନ୍ତି। ଲକ୍ଡାଉନ୍ ୪ ମେ ୩୧ ପର୍ଯ୍ୟନ୍ତ ଚାଲିବ। ଏହି ପର୍ଯ୍ୟାୟରେ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଜାରି ଗାଇଡ୍ଲାଇନ୍କୁ ଅମାନ୍ୟ କଲେ ସମ୍ପୃକ୍ତ ଉଲ୍ଲଂଘନକାରୀଙ୍କ ବିରୋଧରେ ବିପର୍ଯ୍ୟୟ ପରିଚାଳନା ଆଇନ ଏବଂ ଭାରତୀୟ ଦଣ୍ଡବିଧି ଆଇନ (ଆଇପିସି) ବଳରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ଚେତାବନୀ ଦିଆଯାଇଛି।
ପ୍ରଥମେ ୨୧ ଦିନିଆ, ତା’ ପରେ ଆଉ ଦୁଇଥର ଏବଂ ରବିବାର ଚତୁର୍ଥ ଥର ଲକ୍ଡାଉନ୍ ଅବଧି ବୃଦ୍ଧି କରିଛନ୍ତି ସରକାର। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ନିକଟରେ ୨୦ ଲକ୍ଷ କୋଟି ଟଙ୍କାର ପ୍ୟାକେଜ ଘୋଷଣା ଅବସରରେ ଲକ୍ଡାଉନ୍ ୪ ସମ୍ପର୍କରେ ସଙ୍କେତ ଦେଇଥିଲେ। ନୂଆ ନିୟମ ସହ ଏହି ଲକ୍ଡାଉନ୍ କୋହଳ ହେବ ବୋଲି ଅନେକେ ଆଶା ବାନ୍ଧିଥିଲେ। ହେଲେ ଏଥର ମଧ୍ୟ ଅର୍ଥନୀତିକୁ ଟ୍ରାକ୍କୁ ଫେରାଇବା ଭଳି ବିଶେଷ ପରିବର୍ତ୍ତନ ପରିଲକ୍ଷିତ ହୋଇନାହିଁ। ଫଳରେ ପ୍ରଧାନମନ୍ତ୍ରୀଙ୍କ ଅଭିଭାଷଣରୁ ଆଶା କରିଥିବା ଲୋକେ ଏବେ ନିରାଶ ହୋଇଛନ୍ତି। ଏପରି କି ଅନେକ କ୍ଷେତ୍ରରେ ଲକ୍ଡାଉନ୍ ଉଲ୍ଲଂଘନ ହେବା ନେଇ ମଧ୍ୟ ଆଶଙ୍କା ସୃଷ୍ଟି ହୋଇଛି। ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ, କୌଣସି ବ୍ୟକ୍ତି ଏହି ପଦକ୍ଷେପଗୁଡ଼ିକୁ ଅମାନ୍ୟ କଲେ ତାଙ୍କ ବିରୋଧରେ ଡିଜାଷ୍ଟର ମ୍ୟାନେଜ୍ମେଣ୍ଟ ଆକ୍ଟ, ୨୦୦୫ର ଧାରା ୫୧ରୁ ୬୦ ପର୍ଯ୍ୟନ୍ତ ଏବଂ ଆଇପିସିର ଧାରା ୧୮୮ ଅନୁସାରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ। କୌଣସି ଅଧିକାରୀଙ୍କୁ କର୍ତ୍ତବ୍ୟ ପାଳନରେ ବାଧା ସୃଷ୍ଟି କଲେ କିମ୍ବା କେନ୍ଦ୍ର ଅଥବା ରାଜ୍ୟ ସରକାରଙ୍କ ପକ୍ଷରୁ ଜାରି ନିର୍ଦ୍ଦେଶନାମାର ଅନୁପାଳନ କରିବାକୁ ମନାକଲେ ସମ୍ପୃକ୍ତ ବ୍ୟକ୍ତିଙ୍କୁ ଜେଲ୍ କିମ୍ବା ଜରିମାନା ଏବଂ ସ୍ଥଳ ବିଶେଷରେ ଉଭୟ ଦଣ୍ଡରେ ଦଣ୍ଡିତ କରାଯିବ। ଏପରି ଅବମାନନା ବା ଅନୁପାଳନକୁ ପ୍ରତ୍ୟାଖ୍ୟାନ ଯୋଗୁ କାହାର ଜୀବନହାନି ଘଟିଲେ କିମ୍ବା ବିପଜ୍ଜନକ ସ୍ଥିତି ସୃଷ୍ଟି ହେଲେ ସେହି ବ୍ୟକ୍ତିଙ୍କୁ ୨ ବର୍ଷ ପର୍ଯ୍ୟନ୍ତ କାରାଦଣ୍ଡ ଭୋଗିବାକୁ ପଡ଼ିବ। କୌଣସି ବ୍ୟକ୍ତି ରିଲିଫ୍ ସହାୟତା, ମରାମତି, ନିର୍ମାଣ କିମ୍ବା ଅନ୍ୟ ସୁବିଧା ହାତେଇବା ପାଇଁ ମିଥ୍ୟା ତଥ୍ୟ ପ୍ରଦାନ କଲେ ତାଙ୍କୁ ଦୁଇବର୍ଷ ପର୍ଯ୍ୟନ୍ତ ଜେଲ୍ ସହ ଜରିମାନା କରାଯିବ। ଅନୁରୂପ ଭାବେ କେହି ମିଛ ସତର୍କତା ଜାରି କରି ଲୋକଙ୍କୁ ଭୟଭୀତ କରାଇଲେ ତାଙ୍କୁ ୧ ବର୍ଷ ଜେଲ୍ ସହ ଜରିମାନା ମଧ୍ୟ ହୋଇପାରେ। ଯଦି ଏପରି ଅବମାନନା ଯୋଗୁ ମାନବ ଜୀବନ, ସ୍ବାସ୍ଥ୍ୟ ଓ ନିରାପତ୍ତା ବିପନ୍ନ ହୁଏ କିମ୍ବା ଦଙ୍ଗା ସୃଷ୍ଟି ହେଲେ ସମ୍ପୃକ୍ତ ବ୍ୟକ୍ତିଙ୍କୁ ୬ ମାସ ପର୍ଯ୍ୟନ୍ତ ଜେଲ୍ କିମ୍ବା ୧ ହଜାର ଟଙ୍କା ଜରିମାନା ଅଥବା ଉଭୟ ଦଣ୍ଡ ମିଳିପାରେ।
