କେନ୍ଦ୍ରାପଡା ଅଫିସ, ୨୮।୩- କରୋନା ଭୂତାଣୁ ସଂକ୍ରମଣକୁ ପ୍ରତିହତ କରିବା ସକାଶେ ଲକ୍ଡାଉନ୍ କରାଯାଇଥିବା ବେଳେ କେନ୍ଦ୍ରାପଡ଼ା ଜିଲା ପ୍ରଶାସନ ପକ୍ଷରୁ ଏ ଦିଗରେ ବିଶେଷ ଗୁରୁତ୍ୱ ଦିଆଯାଉଥିବା ଦେଖାଯାଇଛି। ତାଲାବନ୍ଦ ସମୟରେ କୌଣସି ଲୋକ ଘରୁ ନ ବାହାରିବା ପାଇଁ ସଚେତନତା କାର୍ଯ୍ୟକ୍ରମ ଜାରିରହିଛି। ଅପରପକ୍ଷରେ ସଂକ୍ରମିତଙ୍କ ଚିକିତ୍ସା ବ୍ୟବସ୍ଥାରେ ଉନ୍ନତି ଆଣିବା ପାଇଁ ଜିଲାରେ ୬ ହଜାର ଶଯ୍ୟା ନିର୍ମାଣ ପ୍ରକ୍ରିୟା ଆରମ୍ଭ ହୋଇଯାଇଛି। ଜିଲାର ପ୍ରତି ପଞ୍ଚାୟତରେ ଅନୂ୍ୟନ ୨୦ଟି ଶଯ୍ୟା ବ୍ୟବସ୍ଥା ହୋଇଥିବା ବେଳେ କେନ୍ଦ୍ରାପଡା ସ୍ବୟଂଶାସିତ ମହାବିଦ୍ୟାଳୟ, ସାନ୍ଧ୍ୟ ମହାବିଦ୍ୟାଳୟ ଓ ଡେରାବିଶ ବ୍ଲକ ଛତାସ୍ଥିତ ପଲିଟେକନିକ୍ କଲେଜ, ତରାଣ୍ଡୋସ୍ଥିତ ଆଦର୍ଶ ବିଦ୍ୟାଳୟ ଓ ପଟ୍ଟାମୁଣ୍ଡାଇର ସଂଖ୍ୟାଲଘୁ ଛାତ୍ରାବାସରେ ୯୫୦ ଶଯ୍ୟା ପ୍ରସ୍ତୁତ ହେଉଛି। ଏହି ଅସ୍ଥାୟୀ ଚିକିତ୍ସାଳୟରେ ରୋଗୀଙ୍କ ଚିକିତ୍ସା ପାଇଁ ଭିତ୍ତିଭୂମି ପ୍ରସ୍ତୁତ କରାଯାଉଛି। ଏଥିସହ ଜିଲାର ୧୦ଟି ଆବାସିକ ଗୃହରେ ରହୁଥିବା ୧୨୭୭ ଜଣ ଶିକ୍ଷାର୍ଥୀଙ୍କୁ ଇତିମଧ୍ୟରେ ଘରକୁ ପଠାଯାଇଛି ବୋଲି ଜିଲା ପ୍ରଶାସନ ପକ୍ଷରୁ ଶନିବାର ଗଣମାଧ୍ୟମକୁ ସୂଚନା ଦିଆଯାଇଛି।
ସୂଚନା ଅନୁଯାୟୀ, ଜିଲାର ୧,୮୫,୯୩୧ ଜଣ ଭତ୍ତା ହିତାଧିକାରୀଙ୍କୁ ୪ ମାସର ଭତ୍ତା ଅର୍ଥ ପ୍ରଦାନ କରାଯିବା ବ୍ୟବସ୍ଥା ଜାରିରହିଛି। ସେହିପରି ଜିଲାର ମୋଟ ୧୧,୫୯,୯୩୩ ଜଣ ଖାଦ୍ୟ ସୁରକ୍ଷା ଯୋଜନା ହିତାଧିକାରୀଙ୍କୁ ୩ ମାସର ରାଶନ ସାମଗ୍ରୀ ଆଗୁଆ ପ୍ରଦାନ କରାଯାଉଛି। ଏଥିସହ ବିଦେଶରୁ ଜିଲାକୁ ଆସିଥିବା ୫୩୯ ଜଣ ଓ ରାଜ୍ୟ ବାହାରୁ ଆସିଥିବା ୬୭୯୧ ଜଣଙ୍କ ନାମ ପଞ୍ଜୀକୃତ କରାଯାଇଛି। ସରକାରଙ୍କ ତାଲାବନ୍ଦ ଘୋଷଣାକୁ ବ୍ୟତିକ୍ରମ କରିଥିବା ୪୪ ଜଣଙ୍କ ନାମରେ ୨୪ଟି ମାମଲା ରୁଜୁ ହୋଇଥିବା ସୂଚନା ଦିଆଯାଇଛି। ଏଥିସହିତ ଜିଲାପାଳ ସମର୍ଥ ବର୍ମା ସାମାଜିକ ଦୂରତା ପାଳନ କରିବା ପାଇଁ ଜିଲାବାସୀଙ୍କୁ ନିବେଦନ କରିଛନ୍ତି।
