ନିରାକାରପୁର,୮ା୪(ଡି.ଏନ୍.ଏ.): ରାଜ୍ୟରେ କରୋନା ଭୂତାଣୁ ସଂକ୍ରମିତଙ୍କ ସଂଖ୍ୟା ବଢ଼ିଚାଲିଛି। ଫଳରେ ସଂକ୍ରମଣ ରୋକିବା ପାଇଁ ପ୍ରଶାସନ ପକ୍ଷରୁ କଟକଣା ସହିତ ସତର୍କତା ଅବଲମ୍ବନ କରାଯାଉଛି। ହେଲେ ଗାଁ ଗହଳିରେ ଅନେକ ଶିକ୍ଷିତ ଅମାନିଆ ସରକାରଙ୍କ ଲକ୍ଡାଉନ୍ କଟକଣାକୁ ଫୁ କରି ଗୋଟିଏ ସ୍ଥାନରେ ଏକାଠି ବସାଉଠା କରିବା ସହିତ ଭଲି, କ୍ରିକେଟ,କ୍ୟାରମ, ତାସ, ଚେସ୍ ଆଦି ଖେଳୁଛନ୍ତି। ଏଥିସହିତ ମାଛ, ମାଂସ ଦୋକାନରେ ରୁଣ୍ଡହୋଇ କିଣା ବିକା କରୁଛନ୍ତି। ସେହିପରି ନିରାକାରପୁରସ୍ଥିତ ଏକ ବ୍ୟାଙ୍କ ସମ୍ମୁଖରେ ବୁଧବାର ପୂର୍ବାହ୍ନରେ ଗ୍ରାହକମାନେ ସାମାଜିକ ଦୂରତା ରକ୍ଷା ନ କରି ଭିତରକୁ ପଶୁଥିବା ଦେଖିବାକୁ ମିଳିଛି। କରୋନାକୁ ନେଇ ଲୋକଙ୍କ ମନରେ ଟିକିଏ ଭୟ ନ ଥିବା ଚିତ୍ରରୁ ସ୍ପଷ୍ଟ ଜଣାପଡୁଛି। ଏହି ଭଳି ଦୃଶ୍ୟ ଖୋର୍ଦ୍ଧା ଜିଲା ନିରାକାରପୁର ଅଞ୍ଚଳରେ ଦୈନିକ ଦେଖିବାକୁ ମିଳୁଛି। ଏନେଇ ସ୍ଥାନୀୟ ପୋଲିସକୁ ଖବର ଦେବାରୁ ପୋଲିସ ଘଟଣାସ୍ଥଳରେ ପହଞ୍ଚିଥିଲେ ମଧ୍ୟ ଭିଡ଼ କମି ନ ଥିଲା।
