କୁନ୍ଦୁରା,୯।୬(ଡି.ଏନ୍.ଏ.):ଦିନରେ ହେଉ କି ରାତିରେ ୧୦୮ କିମ୍ବା ୧୦୨ ଆମ୍ବୁଲାନ୍ସ ଯାଉଥିବା ଜରୁରୀ ରୋଗୀଟି କିମ୍ବା ଗର୍ଭବତୀ ମହିଳା ଜଣଙ୍କ ପାଇଁ କାଳ ସାଜିଛି ହମ୍ପସ। ସାଧାରଣ ଲୋକେ ତ ନିତି ପ୍ରତିଦିନ ହମ୍ପସ ଯୋଗୁ ଅନେକ ହଇରାଣ ହେଉଛନ୍ତି। ସ୍ପିଡ୍ ବ୍ରେକର ଜାଗାରେ ହମ୍ପସ ଯୋଗୁ ଏହା ସାଧାରଣ ଯାତାୟତକୁ ବିରକ୍ତିକର କରୁଛି।
କୋରାପୁଟ ଜିଲାର ଜୟପୁର, କୁନ୍ଦୁରା, କୋଟପାଡ଼, ବୈପାରୀଗୁଡ଼ା, ବୋରିଗୁମ୍ମା ଭଳି ବ୍ଲକରେ ରହିଥିବା ପୂର୍ତ୍ତବିଭାଗ, ଜାତୀୟ ରାଜପଥ ପ୍ରାଧିକରଣ, ଗ୍ରାମ୍ୟ ଉନ୍ନୟନ ବିଭାଗ ଅଧୀନରେ ରହିଥିବା ରାସ୍ତାରେ ଅଗଣିତ ହମ୍ପସ୍ ତିଆରି ହୋଇଛି। କୋରାପୁଟରୁ ଜୟପୁର, ବୋରିଗୁମ୍ମା, କୋଟପାଡ଼ ଯିବା ପାଇଁ ଜାତୀୟ ରାଜପଥ ରହିଥିବା ବେଳେ ହଠାତ୍ ରାତାରାତି କାହାର ଆଦେଶରେ ହମ୍ପସ୍ ତିଆରି ହେଉଛି, ତାହା ବୁଝାପଡୁନାହିଁ। ଜୟପୁରରୁ ବୈପାରିଗୁଡ଼ା ଏବଂ ଜୟପୁରରୁ କୁନ୍ଦୁରା ପୂର୍ତ୍ତ ବିଭାଗ ରାସ୍ତାରେ ମଧ୍ୟ ସମାନ ଚିତ୍ର ରହିଛି। ଯେଉଁ ସ୍ଥାନରେ ସରକାରୀ ନିର୍ଦ୍ଦେଶ ମୁତାବକ ତିଆରି ହୋଇଛି, ତେବେ ରମ୍ବଲର୍ସ କିମ୍ବା ସ୍ପିଡ୍ ବ୍ରେକର ବଦଳରେ କରାଯାଇଛି ହମ୍ପସ୍ ା ସ୍ପିଡ୍ ବ୍ରେକର ସ୍ଥାନରେ ଧଳାରଙ୍ଗ ଲଗାଇବା କଥା, କିନ୍ତୁ ତାହା ହୋଇନାହିଁ। ଜୟପୁରରୁ କୁନ୍ଦୁରା ଯିବା ସମୟରେ ପ୍ରାୟ ୨୨ କିମି ରାସ୍ତାରେ ପାଖାପାଖି ୫୦ଟି ସ୍ଥାନରେ ହମ୍ପସ ରହିଛି। ଗୋଟିଏ ଗୋଟିଏ ସ୍ଥାନରେ ୪ରୁ ୫ଟି ଏକାସଙ୍ଗେ ରହିଛି। ପୂର୍ବରୁ କୁନ୍ଦୁରାରେ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ମିଳିତ ଜନଶୁଣାଣି କାର୍ଯ୍ୟକ୍ରମରେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ବିଦ୍ୟାଳୟ ଏବଂ ଛକ ସ୍ଥାନରେ ସ୍ପିଡ୍ ବ୍ରେକର ନିର୍ମାଣ ପାଇଁ ଦାବି ହୋଇଥିଲା ା କିନ୍ତୁ ବର୍ତ୍ତମାନ ପ୍ରତି ଘର ସାମ୍ନାରେ ହମ୍ପସ୍ କରାଯିବା ଭଳି ସ୍ଥିତି ହେଲାଣି। ଅଧିକ ଦୁର୍ଘଟଣା ପ୍ରବଣ ସ୍ଥାନରେ ରମ୍ବଲର୍ସ କରିବା ପାଇଁ ପୋଲିସ ଚିହ୍ନଟ କରିବା ସହ ସେଠାରେ ଜାତୀୟ ରାଜପଥ ପ୍ରାଧିକରଣ ତାହା ନିର୍ମାଣ କରିବା କଥା। କିନ୍ତୁ ଅଯଥା ଅନେକ ସ୍ଥାନରେ ରାଜସ୍ବ ବ୍ୟୟକରି ମନଇଚ୍ଛା ହମ୍ପସ୍ ତିଆରି ହେବା, କାହା ସ୍ବାର୍ଥରେ ତାହା ଜଣାପଡୁନାହିଁ।
