ଜଗତ୍ସିଂହପୁର ଅଫିସ,୨୨ା୧୨: ତିର୍ତ୍ତୋଲ ଗୋପିଆକୁଦସ୍ଥିତ ସରକାରୀ ଦେଶୀ ମଦ ଦୋକାନରେ କାମ କରୁଥିବା ଅମୀନ ସେଠୀ (୩୫) ନାମକ ଯୁବକଙ୍କଠାରୁ ୨୦ ତାରିଖ ଅପରାହ୍ନରେ ଦୁର୍ବୃତ୍ତ ୫,୫୬,୦୦୦ ଟଙ୍କା ଲୁଟ୍ କରିଥିବା ଅଭିଯୋଗ ହୋଇଥିଲା। ଏହାର ୨୪ ଘଣ୍ଟା ନ ପୁରୁଣୁ ଅମୀନଙ୍କ ମୃତଦେହ ଏହି ଥାନା ଅଧୀନ ନିମକଣା (ପିଏସ୍)ପାସେଞ୍ଜର ହଲ୍ଟ ନିକଟ ରେଳ ଧାରଣାରୁ ସନ୍ଦେହଜନକ ଭାବେ ଉଦ୍ଧାର କରାଯାଇଛି। ଅମୀନଙ୍କୁ ହତ୍ୟା ପରେ ଆତ୍ମହତ୍ୟା ରୂପ ଦେବା ପାଇଁ ରେଳ ଧାରଣା କଡ଼ରେ ପକାଇ ଦିଆଯାଇଥିବା ସନ୍ଦେହ କରାଯାଉଛି। ବାସ୍ତବରେ ଏହା ହତ୍ୟା, ଆତ୍ମହତ୍ୟା ନା ଆକସ୍ମିକ ଦୁର୍ଘଟଣା ତାକୁ ନେଇ ସାଧାରଣରେ ଆଲୋଚନା ଚାଲିଛି। କଟକ ଜିଆର୍ପି ପକ୍ଷରୁ ଅପମୃତ୍ୟୁ ମାମଲା ରୁଜୁ କରାଯାଇଥିବା ପାରାଦୀପସ୍ଥିତ ଜିଆର୍ପି ଫାଣ୍ଡି ଭାରପ୍ରାପ୍ତ ଅଧିକାରୀ ଆସଲାମ ଖାନ୍ ସୂଚନା ଦେଇଛନ୍ତି। ମୃତଦେହ ବ୍ୟବଚ୍ଛେଦ ରିପୋର୍ଟ ଆସିଲା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ ବୋଲି ଖାନ୍ କହିଛନ୍ତି। ଅନ୍ୟପକ୍ଷରେ ମୃତ ଯୁବକଙ୍କ ପରିବାର ଏହାକୁ ଏକ ହତ୍ୟାକାଣ୍ଡ ବୋଲି କହିଛନ୍ତି। କେହି ତାଙ୍କୁ ହତ୍ୟା କରି ରେଳ ଧାରଣାରେ ପକାଇ ଦେଇଥିବା ପରିବାର େଲୋକେ ଜିଆର୍ପି ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି।
ଜିଆର୍ପି ପକ୍ଷରୁ କୁହାଯାଇଛି, ଶନିବାର ସକାଳେ ଏକ ମାଲବାହୀ ରେଳ ଯାଇଥିଲା। ପରେ ଅର୍ଥାତ୍ ୭ଟାରେ ଆଉ ଏକ ମାଲବାହୀ ରେଳ ଯାତ୍ରା କଲାବେଳେ ପାରାଦୀପ-ଗୋରଖନାଥ ରେଳ ଧାରଣାର ନିମକଣା ପିଏଚ୍ ନିକଟରେ ମୃତଦେହ ପଡିଥିବା ଦେଖିବାକୁ ମିଳିଥିଲା। ରେଳ ଚାଳକ ଏ ସମ୍ପର୍କରେ ରାହାମା ଷ୍ଟେସନ୍ ମାଷ୍ଟରଙ୍କୁ ସୂଚନା ଦେଇଥିଲେ। ଏହି ଷ୍ଟେସନ୍ ମାଷ୍ଟର କଟକ ଜିଆର୍ପିକୁ ଖବର ଦେବା ପରେ ରେଳବାଇ ପୋଲିସ ଘଟଣାସ୍ଥଳକୁ ଯାଇଥିଲା। ଜିଆର୍ପି ପାରାଦୀପ ଫାଣ୍ଡି ଭାରପ୍ରାପ୍ତ ଅଧିକାରୀ ଖାନ୍ଙ୍କ କହିବା କଥା ହେଲା ଯୁବକଙ୍କ ବାମ ଗୋଡ ଆଣ୍ଠୁ ତଳକୁ କଟି ଯାଇଥିଲା। ବାମ ପାର୍ଶ୍ୱ ମୁଣ୍ଡରେ ଆଘାତ ଲାଗିଛି। ଯେଉଁ କାରଣରୁ ଗାଲରେ ରକ୍ତ ଜମାଟ ବାନ୍ଧିଛି। ଡାହାଣ ହାତର ପାପୁଲି ଉପର ଆଞ୍ଚୁଡି ହୋଇଯାଇଛି। ମୃତ ଯୁବକଙ୍କ ପରିବାର ଲୋକଙ୍କ କହିବା କଥା ହେଲା ଅମୀନ ରାତି ୧୧ରୁ ୧୨ଟା ଭିତରେ ସେମାନଙ୍କ ସହ କଥା ହୋଇଥିଲେ। ଯେବେ କଥା ହୋଇଥିଲେ ତେବେ ତା ପରେ ଏହି ଲାଇନ୍ରେ କୌଣସି ରେଳ ଯାତାୟାତ କରିନାହିଁ। ଯାହା ଯାଇଛି ଶନିବାର ସକାଳ ୬ଟା ପରେ। ତେବେ ରାତିରେ ଅମୀନ ଓ ତାଙ୍କ ଜଣେ ବନ୍ଧୁ ତିର୍ତ୍ତୋଲସ୍ଥିତ ଭଡା ଘରେ ରହିଥିଲେ। ରାତି ପ୍ରାୟ ୩ଟାରେ ଅମୀନ କୋଠରୀରେ ନ ଥିବା ତାଙ୍କ ବନ୍ଧୁ ସୂଚନା ଦେଇଛନ୍ତି। ବାସ୍ତବ ଚିତ୍ର ଏ ପର୍ଯ୍ୟନ୍ତ ସ୍ପଷ୍ଟ ହେଉନାହିଁ ବୋଲି ଖାନ୍ କହିଛନ୍ତି। ଶୁକ୍ରବାର ଅପରାହ୍ନରେ ଅମୀନ ମଦ ଦୋକାନ ଟଙ୍କା ନେଇ ବାଇକ୍ ଯୋଗେ ବାଲିକୁଦାର ଏକ ବ୍ୟାଙ୍କକୁ ଜମା କରିବାକୁ ଗଲାବେଳେ ବେଲୁରୀ ମଠ ନିକଟରେ ୨ ଜଣ ଦୁର୍ବୃତ୍ତ ବାଇକରେ ଆସି ବନ୍ଧୁକ ଦେଖାଇ ଟଙ୍କା ବ୍ୟାଗ ଝାମ୍ପି ନେଇଥିଲେ। ପରେ ଅମୀନ ତିର୍ତ୍ତୋଲ ଥାନାରେ ଅଭିଯୋଗ କଲା ପରେ ପୋଲିସ ମାମଲା ସଂଖ୍ୟା ୩୭୮/୧୯ ରୁଜୁ କରିଥିଲା।
