ନା ସେ ଗଁ। ରେ ଡ୍ରାମା କରିଥିଲେ। ନା ତାଙ୍କର ଅଭିନୟର କୌଣସି ଅଭିଜ୍ଞତା ଥିଲା। ସେ କେବଳ ଭଲ ପାଉଥିଲେ ଯାତ୍ରାକୁ। ଯାତ୍ରା ପ୍ରତି ଥିବା ତାଙ୍କର ସେହି ଭଲପାଇବା ହିଁ ତାଙ୍କୁ ଟାଣି ଆଣିଲା ଯାତ୍ରା ଜଗତକୁ। ଖାଲି ଟାଣି ଆଣିଲାନାହିଁ। ଅଧିକନ୍ତୁ ତାଙ୍କୁ ସଜେଇଦେଲା ଜଣେ ପୋଖତ ଅଭିନେତ୍ରୀ। ଏଠାରେ ଯାହାଙ୍କ କଥା କୁହାଯାଉଛି ସେ ହେଉଛନ୍ତି ଓଡ଼ିଆ ଯାତ୍ରା ଜଗତର ଜଣେ ଜଣାଶୁଣା ଅଭିନେତ୍ରୀ ରୀନାରାଣୀ ନାୟକ। ସଂକ୍ଷେପରେ ରୀନା। ଭଦ୍ରକ ଜିଲା ବାସୁଦେବପୁର ଅନ୍ତର୍ଗତ ପଦ୍ମପୁରରେ ଜନ୍ମିତା ରୀନା ଆଜିକୁ ତିରିଶ ବର୍ଷ ତଳେ ପାଦ ଥାପିଥିଲେ ଯାତ୍ରା ଜଗତରେ। ଅନୁଷ୍ଠାନ ଥିଲା ‘ସାଗରକନ୍ୟା’ ଗଣନାଟ୍ୟ। ପ୍ରସିଦ୍ଧ ନିର୍ଦ୍ଦେଶକ ବାଦଲ ସିକ୍ଦାରଙ୍କ ସହିତ ପରିଚୟ ଥିଲା। ଆଉ ତାଙ୍କରି ମାଧ୍ୟମ ଦେଇ ହିଁ ସେ ଆସି ଯୋଗ ଦେଇଥିଲେ ‘ସାଗରକନ୍ୟା’ରେ। ଝିଅର ଯାତ୍ରାକୁ ଆସିବା ନେଇ ଘରେ ସମସ୍ତେ ଅରାଜି ଥିଲେ। ମାତ୍ର ରୀନାଙ୍କ ଦେହରେ ଡେଣା ଖଞ୍ଜି ଦେଇଥିଲା ଯାତ୍ରା। ସେ ବା କେମିତି ଚୁପ୍ ହେଇ ବସିଥାନ୍ତେ! ସେ ଯା’ହେଉ ‘ସାଗରକନ୍ୟା’ରୁ ନିଜର ଯାତ୍ରା ଜୀବନ ଆରମ୍ଭ କରିଥିବା ରୀନା ଏବେ ଆସି ପହଞ୍ଚତ୍ଛନ୍ତି ଅପେରା ‘ସୂର୍ଯ୍ୟମନ୍ଦିର’ରେ। ଇତିମଧ୍ୟରେ ସେ ‘ପାର୍ବତୀ’, ‘କଳିଙ୍ଗ’, ‘କୋଣାର୍କ’, ‘ବାଘାଯତିନ’, ‘ଟାଇଗର ତାରିଣୀ’, ‘ଗୌରୀ’, ‘ବିଶ୍ୱଜନନୀ’ ଆଦି ଅନୁଷ୍ଠାନରେ ନିଜ ଅଭିନୟର ପରାକାଷ୍ଠା ଦେଖାଇ ସାରିଛନ୍ତି। ତାଙ୍କ ଅଭିନୀତ ନାଟକଗୁଡ଼ିକ ମଧ୍ୟରେ ରହିଛି ‘ବାକି ରହିଲା ହାଟ ସଉଦା’, ‘ଏମିତି କାହାଣୀ କେବେ ବି ଶୁଣିନି’, ‘ବାହାବଜାର’, ‘ଅଛୁଅଁା ମଣିଷ’, ‘କଙ୍କାଳକୋଠୀ’, ‘ଜହ୍ନରେ ରହିବି କଳଙ୍କ ହୋଇ’, ‘ରୁପା କାନଫୁଲ ସୁନା ପାଉଁଜି’, ‘ଏମିତି ଝିଅକୁ ଶହେ ସଲାମ’, ‘ସିନ୍ଦୂର କାନ୍ଦୁଛି ଓଢ଼ଣୀ ତଳେ’, ‘ଯମ ଲେଖୁଛି ପ୍ରେମ ଚିଠି’, ‘ଫଗୁଣ ଦେଇଛି ପହିଲି ଚିଠି’, ‘ମିତା ମହାନ୍ତି ମିଛ କୁହନ୍ତି’, ‘ବାଜି ରହିଲା ମୋ ସାନଭଉଣୀ’ ଏବଂ ଆହୁରି ଅନେକ। ଚଳିତବର୍ଷ ‘ସୂର୍ଯ୍ୟମନ୍ଦିର’ରେ ସେ ଅଭିନୟ କରିଥିବା ନାଟକ ମଧ୍ୟରେ ରହିଛି ‘କାହାଣୀ କହୁଛି ସୂର୍ଯ୍ୟମନ୍ଦିର’, ‘ପ୍ରେମିକାର ନଁା ଚନ୍ଦ୍ରଭାଗା’, ‘ପୁଅ ଯିବ ଶାଶୁଘର’, ‘ମାୟାବିନି ମୌସୁମୀ’। ଆଜିଯାଏ ପଜିଟିଭ ରୋଲରେ ଅଭିନୟ କରି ଆସିଥିବା ରୀନାଙ୍କୁ ଚଳିତବର୍ଷ ‘ମାୟାବିନି ମୌସୁମୀ’ରେ ନେଗେଟିଭ୍ ଭୂମିକା ମିଳିଛି। ଆଉ ତାକୁ ନେଇ ସେ ବେଶ୍ ଖୁସି ଅଛନ୍ତି।
