ନୂଆଦିଲ୍ଲୀ, ୮।୪: କରୋନା ଭୂତାଣୁ ସଂକ୍ରମଣ ରୋକିବା ଲାଗି ୨୧ ଦିନିଆ ଲକ୍ଡାଉନ୍ ଚାଲିଛି। ଲକ୍ଡାଉନ୍ ଯୋଗୁ ଘରକୁ ଫେରି ନ ପାରି ରାଜ୍ୟର ବିଭିନ୍ନ ସ୍ଥାନରେ ଦାଦନ ଶ୍ରମିକମାନେ ଅଟକି ରହିଛନ୍ତି। ଗାଡ଼ିମୋଟର ଚଳାଚଳ ବନ୍ଦ ସାଙ୍ଗକୁ ସମସ୍ତ ବଜାର ମଧ୍ୟ ବନ୍ଦ ରହୁଥିବାରୁ ଶ୍ରମିକଙ୍କ ଦୁଃଖ ବଢ଼ିଯାଇଛି। ହେଲେ ସେମାନଙ୍କ ଏହି ଦୁଃଖ ସମୟରେ ସହଯୋଗ କରିବାକୁ ଆଗେଇ ଆସିଛି ସର୍ଚ୍ଚ ଇଞ୍ଜିନ୍ ‘ଗୁଗଲ୍’। ଦେଶର ୩୦ଟି ସହରରେ ଏହି ଶ୍ରମିକମାନଙ୍କ ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରମାନଙ୍କ ସହଯୋଗରେ ଖାଦ୍ୟ ଯୋଗାଣ ଓ ରାତ୍ରି ଆଶ୍ରୟସ୍ଥଳ ଖୋଲିଛି। ତେବେ ଗୁଗଲ୍ ସେହି ସ୍ଥାନଗୁଡ଼ିକ ସମ୍ପର୍କରେ ଶ୍ରମିକମାନଙ୍କୁ ସୂଚନା ଦେଉଛି। ଗୁଗଲ୍ କହିଛି, ଭାରତରେ ଲକ୍ଡାଉନ୍ ସମୟରେ ଅସହାୟ ଲୋକମାନଙ୍କ ସୁବିଧା ପାଇଁ ଗୁଗଲ୍ ମ୍ୟାପ୍ରେ ଖାଦ୍ୟ ଯୋଗାଣ ଓ ରାତ୍ରି ଆଶ୍ରୟସ୍ଥଳଗୁଡ଼ିକ ସମ୍ପର୍କରେ ସୂଚନା ଦିଆଯିବ। ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଅଧିକାରୀ ଓ କର୍ତ୍ତୃପକ୍ଷଙ୍କ ସହଯୋଗରେ ଏଭଳି ପଦକ୍ଷେପ ନିଆଯାଇଥିବା ଗୁଗଲ୍ ପକ୍ଷରୁ କୁହାଯାଇଛି। ପ୍ରବାସୀ ଶ୍ରମିକମାନେ ସ୍ମାର୍ଟଫୋନ୍ରେ ଗୁଗଲ୍ ମ୍ୟାପ୍ ବ୍ୟବହାର କରି ଦେଶର ୩୦ ସହରରେ ସେବା ପ୍ରଦାନକାରୀ ରିଲିଫ କେନ୍ଦ୍ରଗୁଡ଼ିକର ଠିକଣା ସହଜରେ ପାଇପାରିବେ ବୋଲି ଗୁଗଲ ଇଣ୍ଡିଆର ସିନିୟର ପ୍ରୋଗ୍ରାମ ମ୍ୟାନେଜର ଅନଲ ଘୋଷ ସୂଚନା ଦେଇଛନ୍ତି। ଏଥିସହ ସେ କହିଛନ୍ତି, ଯେଉଁମାନଙ୍କ ପାଖରେ ସ୍ମାର୍ଟଫୋନ୍ ନାହିଁ ସେମାନଙ୍କୁ ସ୍ଥାନୀୟ ଏନ୍ଜିଓ, ଟ୍ରାଫିକ୍ ପୋଲିସ ଓ ସ୍ବେଚ୍ଛାସେବୀମାନେ ସହଯୋଗ କରିବାକୁ ଅନଲ ସୂଚନା ଦେଇଛନ୍ତି।
