ଅନୁଗୋଳ ଅଫିସ, ୧୯।୭-ଘର ନିର୍ମାଣ ପାଇଁ ଜନୈକ ବ୍ୟକ୍ତି ରାସ୍ତା ଉପରେ ବିଭିନ୍ନ ସାମଗ୍ରୀ ଗଦାଇଥିବାରୁ ଅନୁଗୋଳ ସହରର ବଜାର ଛକ ରାସ୍ତାରେ ଗୁରୁବାର ଯାତାୟାତ ବାଧାପ୍ରାପ୍ତ ହୋଇଥିଲା। ପୌର କର୍ତ୍ତୃପକ୍ଷ ଘଟଣା ସମ୍ପର୍କରେ ଅବଗତ ଥଲେ ବି ପଦକ୍ଷେପ ନ ନେବାରୁ ଏହାକୁ ନେଇ ସ୍ଥାନୀୟ ବ୍ୟବସାୟୀ ଓ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଫଳରେ ବାଧ୍ୟ ହୋଇ ପୌରପାଳିକା କର୍ତ୍ତୃପକ୍ଷ ବିଳମ୍ବରେ ସମ୍ପୃକ୍ତ ବ୍ୟକ୍ତିଙ୍କଠାରୁ ଜରିମାନା ଆଦାୟ କରିଥିଲେ।
ସ୍ଥାନୀୟ ଅଞ୍ଚଳର କେତେଜଣ ବ୍ୟବସାୟୀଙ୍କ କହିବା ଅନୁଯାୟୀ, ବଜାର ଛକ ନିକଟରେ ଜନୈକ ବାହୁବଳୀ ବ୍ୟକ୍ତି ଘର ନିର୍ମାଣ କରୁଥିବାରୁ ୧୦୦ ମିଟର ରାସ୍ତା ଅବରୋଧ କରି ବାଲି, ଗୋଡି, ଇଟା, ସିମେଣ୍ଟ ଗଦେଇବା ସହ ନିର୍ମାଣ ସାମଗ୍ରୀ ଗୋଳା ମେଶିନ ରଖିଥିଲେ। ଏଥିଯୋଗୁ ଉକ୍ତ ରାସ୍ତାରେ ଗାଡ଼ି ଚଳାଚଳରେ ବାଧା ଉପୁଜିଥିଲା। ଏପରି କି ସେହି ରାସ୍ତା ଦେଇ ଆମ୍ବୁଲାନ୍ସ ମଧ୍ୟ ମେଡିକାଲ ମଧ୍ୟକୁ ଯାଇପାରି ନ ଥିଲା। ବ୍ୟବସାୟୀମାନେ ପୌରପାଳିକାକୁ ଏ ନେଇ ଖବର ଦେଇଥିଲେ ମଧ୍ୟ କର୍ତ୍ତୃପକ୍ଷ ଜାଣି ନ ଜାଣିବା ବୋଲି ଅଭିନୟ କରିଥିଲେ। ପୌର ପ୍ରଶାସନ ଓ ପୋଲିସ ସହ ସମ୍ପୃକ୍ତ ବାହୁବଳୀଙ୍କ ଭଲ ସମ୍ପର୍କ ଥିବାରୁ ତାଙ୍କର କାହାକୁ ଭୟ ନ ଥିଲା। ଫଳରେ ଅନୁମତି ନ ଆଣି ମଧ୍ୟ ସେ ରାସ୍ତାକୁ ଅବରୋଧ କରିଥିଲେ। ଏ ନେଇ ବାରମ୍ବାର ଅଭିଯୋଗ ହେବା ପରେ ଶେଷରେ ପୌର ନିର୍ବାହୀ ଅଧିକାରୀ ଶୁଭେନ୍ଦୁ ଜେନା କର୍ମଚାରୀଙ୍କୁ ଘଟଣା ସ୍ଥଳକୁ ପଠାଇବା ସହ ଜବରଦଖଲ କରିଥିବା ରାସ୍ତାରୁ ସମସ୍ତ ସାମଗ୍ରୀ ହଟାଇବା ପାଇଁ ନିର୍ଦ୍ଦେଶ ଦେଇଥିଲେ। ଫଳରେ ସମ୍ପୃକ୍ତ ବାହୁବଳୀଙ୍କଠାରୁ ୨ ହଜାର ଟଙ୍କା ଜରିମାନା ଆଦାୟ କରାଯାଇଥିଲା।
