ମୁମ୍ବାଇ: ବଲିଉଡ୍ର ଭାଇଜାନ ସଲମାନ ଖାଁ ନିଜ ଫିଟନେସ୍କୁ ନେଇ ସବୁବେଳେ ଚର୍ଚ୍ଚାରେ ରହିଥାନ୍ତି। ଫିଲ୍ମର ଶୁଟିଂରେ ବ୍ୟସ୍ତ ଥାଆନ୍ତୁ ବା ନିଜ ପରିବାର ସହ ସମୟ ବିତାଉ ଥାଆନ୍ତୁ। ଏହି ସବୁ ଭିତରେ ମଧ୍ୟ ସେ ଜିମ୍ ପାଇଁ ସମୟ କାଢ଼ିନିଅନ୍ତି। ସୋସିଆଲ ମିଡିଆରେ ଆକ୍ଟିଭ୍ ରହୁଥିବା ସଲମାନ ନିକଟରେ ଇନ୍ଷ୍ଟାଗ୍ରାମରେ ଏକ ଭିଡିଓ ଶେୟାର କରିଛନ୍ତି। ଯେଉଁଥିରେ ସେ ସାଇକେଲ ଚଲାଉଥିବା ଦେଖିବାକୁ ମିଳିଛି। ଭରପୂର ଏନର୍ଜି ସହ ମସ୍ତିଭରା ଅନ୍ଦାଜରେ ସଲ୍ଲୁମିଆଁ ରାସ୍ତାରେ ସାଇକେଲ ଚଲାଉଥିବା ନଜର ଆସିଛନ୍ତି। ପୂର୍ବରୁ ମଧ୍ୟ ସଲମାନଙ୍କ ସାଇକେଲ ଚଳାଇବା ଭିଡିଓ ଭାଇରାଲ ହୋଇଛି। ହେଲେ ଚଳିତ ଥରର ବିଶେଷତଃ ହେଲା ଏହି ଭିଡିଓ ଶେୟାର ହେବା ମାତ୍ରେ ୨୦ଲକ୍ଷରୁ ଊର୍ଦ୍ଧ୍ୱ ଥର ଏହାକୁ ତାଙ୍କ ଫ୍ୟାନ୍ସମାନେ ଦେଖିସାରିଲେଣି। ତେବେ ଏହି ଭିଡିଓକୁ ଇନ୍ଷ୍ଟାଗ୍ରାମରେ ଶେୟାର କରିବା ସହ ସେ କ୍ୟାପସନ୍ରେ ଲେଖିଛନ୍ତି, ‘ସମୟ ଗତିଶୀଳ ଆଉ ଏହାସହ ଜୀବନ ମଧ୍ୟ ସମାନ ଧାରାରେ ଗତି କରୁଛି, ତେଣୁ ଜୀବନର ପ୍ରତିଟି ମୂହୁର୍ତ୍ତକୁ ଉପଭୋଗ କରିବା ଦରକାର’। ନିକଟରେ ସଲମାନଙ୍କ ଫିଲ୍ମ ଭାରତ ରିଲିଜ୍ ହୋଇଥିବା ବେଳେ ବକ୍ସ ଅଫିସରେ ଦମ୍ଦାର ପ୍ରଦର୍ଶନ କରିଥିଲା।
