ଭବାନୀପାଟଣା,୧୫।୮(ଡି.ଏନ.ଏ.) ବିରୋଧୀ ଦଳ ନେତା ଭାବେ ଦାୟିତ୍ୱ ନେବା ପରେ ଭବାନୀପାଟଣା ବିଧାୟକ ପ୍ରଦୀପ୍ତ କୁମାର ନାଏକ କଳାହାଣ୍ଡି ଗସ୍ତରେ ଆସିଛନ୍ତି । ବୁଧବାର ଏହି ଅବସରରେ ସେ ସ୍ଥାନୀୟ ସର୍କିଟ ହାଉସଠାରେ ଏକ ଖବରଦାତା ସମ୍ମିଳନୀରେ ଗତ ବିଧାନସଭାରେ ସରକାରଙ୍କ ଦୋଷ ଦୁର୍ବଳତା ସମ୍ପର୍କରେ ଉଠାଇଥିବା କେତେଗୁଡିଏ ପ୍ରଶ୍ନ ସମ୍ପର୍କରେ ସୂଚନା ପ୍ରଦାନ କରିଥିଲେ। ବିରୋଧିଦଳ ନେତା ନାଏକ ରାଜ୍ୟର ବିଜେଡି ସରକାର ବିଭିନ୍ନ ଯୋଜନା ନାମରେ ଜନସାଧାରଣଙ୍କୁ ଭୁଆଁ ବୁଲାଇ ଭୋଟ ହାତେଇବା ପରେ ଯୋଜନାଗୁଡିକର କାର୍ଯ୍ୟକାରୀ ହେଉ ନ ଥିବା ଅଭିଯୋଗ କରି ସରକାରଙ୍କ ଉପରେ ବର୍ଷିଥିଲେ। ଗତ ନିର୍ବାଚନ ପୂର୍ବରୁ ଚିଟଫଣ୍ଡ ଦୁର୍ନୀତିରେ ସରକାର ବଦନାମ ହୋଇ ଚିଟ୍ଫଣ୍ଡ ଦୁର୍ନୀତିରେ ଲିପ୍ତ ସଙ୍ଗଠନ ମାନଙ୍କ ସମ୍ପତ୍ତି ବ୍ୟାଜ୍ୟାପ୍ତ କରାଯାଇ ଲୋକଙ୍କ ଟଙ୍କା ଫେରସ୍ତ କରିବାକୁ ପ୍ରତିଶ୍ରୁତି ଦେଇ ଏଯାଏଁ ତାହା କରିନାହାନ୍ତି। ସେହିଭଳି କାଳିଆ ଯୋଜନା ନାମରେ ୫୭ ହଜାର ଚାଷୀ ପରିବାରଙ୍କୁ ସମ୍ପୃକ୍ତ କରାଯାଇ ୪୫ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ଆର୍ଥତ୍କ ସହାୟତା ପ୍ରଦାନ କରାଯାଇଥିବା ଡିଣ୍ଡିମ ପିଟି ଆଜିଯାଏଁ କେନ୍ଦ୍ର ସରକାର ମାଗିଥିବା ଚାଷୀ ତାଲିକା ପ୍ରଦାନ କରିନାହାନ୍ତି। ଉକ୍ତ ତାଲିକା ସର୍ବସାଧାରଣ ଅବଗତ ନିମନ୍ତେ ତୁରନ୍ତ ପ୍ରକାଶ କରିବା ସକାଶେ ବିରୋଧି ଦଳର ନେତା ଦାବି କରିଛନ୍ତି। ବିଜେଡି ଶାସନ ସମୟରେ ଶିକ୍ଷା, ସ୍ବାସ୍ଥ୍ୟ, ପିଇବା ପାଣି, ବେକାରୀ ସମସ୍ୟା, ଜଗନ୍ନାଥ ମହାପ୍ରଭୁଙ୍କ ରତ୍ନ ଭଣ୍ଡାର ଚାବି ହଜିବା ଘଟଣା ଭଳି ଅନେକ ଘଟଣା ଘଟିଯାଇଥିଲେ ହେଁ ସରକାର ଠିକ ଭାବରେ ଶାସନ ଭାର ପରିଚାଳନା କରୁନାହାନ୍ତି କିମ୍ବା ଦୋଷିମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବାରୁ ଦିନକୁ ଦିନ ଦୁର୍ନୀତି ଚରମ ସିମାରେ ପହଞ୍ଚତ୍ଛି। କେନ୍ଦ୍ର ସରକାରଙ୍କ ଆୟୁଷ୍ମାନ ଯୋଜନାକୁ ନବୀନ ସରକାର ଗ୍ରହଣ ନ କରିବା ଜନସାଧାରଣଙ୍କ ପ୍ରତି ସରକାର କୁଠାରଘାତ କରୁଥିବାରୁ ବିରୋଧି ଦଳ ହିସାବରେ ଆମେ ତାକୁ ନିନ୍ଦା କରୁଛୁ। ଖଦିବୋର୍ଡର ଦୁର୍ନୀତିକୁ ସରକାର ଚାପି ଦେଇଛନ୍ତି। କଳାହାଣ୍ଡି ଜିଲାରେ ମୁଖ୍ୟମନ୍ତ୍ରୀ ଘୋଷଣା କରିଥିବା ମେଡିକାଲ କଲେଜ, ୟୁନିଭରସିଟି ଦିବାସ୍ବପ୍ନ ଭଳି ଲାଗୁଛି। ଧାନକିଣା ଦୁର୍ନୀତି, ଇନ୍ଦ୍ରାବତୀ ଦକ୍ଷିଣ କେନାଲ କାମର ଦୁର୍ନୀତି, ଭବାନୀପାଟଣା ବାଇପାସ ରାସ୍ତା, ରେଳୱେ ଓଭରବ୍ରିଜ ସକାଶେ ଜମି ଅଧିଗ୍ରହଣ, ରେଳଡବା କାରଖାନା ସକାଶେ ଜମି ଅଧିଗ୍ରହଣ ଆଦି କାର୍ଯ୍ୟରେ ରାଜ୍ୟ ସରକାର ଅବହେଳା ପ୍ରଦର୍ଶନ କରୁଥିବାରୁ କଳାହାଣ୍ଡିର ବିକାଶ ହୋଇପାରୁନାହିଁ ବୋଲି ବିରୋଧିଦଳର ନେତା ପ୍ରଦୀପ୍ତ ନାଏକ ଅଭିଯୋଗ କରିଥିଲେ। ସରକାର ଏସବୁକାର୍ଯ୍ୟ ପ୍ରତି ଅବହେଳା କରୁଥିବାରୁ ଆଗାମି ଦିନ ବିରୋଧିଦଳ ଭାବରେ ସରକାରଙ୍କୁ ସବୁଦିଗରୁ ଘେରାଯିବ ବୋଲି ସେ ପ୍ରକାଶ କରିଥିଲେ। ଖବରଦାତା ସମ୍ମିଳନୀକୁ ଭାନୁପ୍ରକାଶ ରଥ ସଂଯୋଜନା କରିଥିବା ବେଳେ ବରିଷ୍ଠ ଭାଜପା ନେତା ଦେବେନ୍ଦ୍ର ମହାନ୍ତି, ଭାବସିନ୍ଧୁ ମଙ୍ଗରାଜ, ସରିତା ସିନ୍ଧୁ ପ୍ରମୁଖ ମଞ୍ଚାସୀନ ଥିଲେ। ଜିଲା ବିଜେଡି ସଭାପତି ପୁଷ୍ପେନ୍ଦ୍ର ସିଂଦେଓ କହିଛନ୍ତି ଯେ, ରାଜ୍ୟବାସୀ ଜାଣିଛନ୍ତି ବିଜେଡି ସରକାରଙ୍କ କାର୍ଯ୍ୟକଳାପ। ଏଥିପାଇଁ ଲୋକେ ଲଗାତର ଭୋଟଦେଇ ବିଜୟୀ କରୁଛନ୍ତି। ବିରୋଧୀ ଦଳ ଯାହା ଅଭିଯୋଗ କରୁଛି ସେଥିରେ କିଛି ନୂତନତ୍ୱ ନାହିଁ।
