ଭୁବନେଶ୍ୱର, ୩୧।୧୨(କ୍ରୀଡ଼ା ପ୍ରତିନିଧି)-
କଟକ ବାରବାଟୀ ଷ୍ଟାଡିୟମରେ ରାଜ୍ୟ ଆଥଲେଟିକ୍ ମିଟ୍ର ୬୭ତମ ସଂସ୍କରଣ ସୋମବାର ଉଦ୍ଯାପିତ ହୋଇଛି। ଏଥିରେ କଟକ ଦଳ ୫୫୭ ପଏଣ୍ଟ ପାଇ ଓଭରଅଲ୍ ଚାମ୍ପିୟନ ହୋଇଛି। ୨୬୪ ପଏଣ୍ଟ ସହିତ ସୁନ୍ଦରଗଡ଼ ରନର୍ସଅପ୍ ହୋଇଛି। ୨୦ ବର୍ଷରୁ କମ୍ ବାଳିକା ଲଙ୍ଗଜମ୍ପରେ ପ୍ରତିନିଧିତ୍ୱ କରିଥିବା କିଟ୍ର ମନିଷା ମେରେଲ ଓ ୪୦୦ ମିଟର ରେସ୍ରେ ଭାଗ ନେଇଥିବା ଓଡ଼ିଶା ପୋଲିସର ବିଘ୍ନରାଜ ମିରିଡିଆ ଯଥାକ୍ରମେ ଶ୍ରେଷ୍ଠ ମହିଳା ଓ ପୁରୁଷ ଆଥଲେଟ୍ ବିବେଚିତ ହୋଇଥିଲେ। ମନିଷାଙ୍କୁ ଶଶିକାନ୍ତ ମେମୋରିଆଲ ଟ୍ରଫି ସହ ୧୦୦୦ ଏବଂ ବିଘ୍ନରାଜଙ୍କୁ ଜୋଡାର କାର୍ଲ ଲୁଇସ ଆଥଲେଟିକ୍ ଆସୋସିଏଶନ ପକ୍ଷରୁ ଟ୍ରଫି ଓ ୧୦୦୦ଟଙ୍କା ପୁରସ୍କାର ଆକାରରେ ପ୍ରଦାନ କରାଯାଇଥିଲା। ୧୪ ବର୍ଷରୁ କମ୍ ବାଳିକାରେ ସୁନ୍ଦରଗଡ଼(୪୩ ପଏଣ୍ଟ), ବାଳକରେ ଭୁବନେଶ୍ୱର(୨୬), ୧୬ ବର୍ଷରୁ କମ୍ ବାଳିକାରେ ଭୁବନେଶ୍ୱର(୬୪), ବାଳକରେ ଭୁବନେଶ୍ୱର(୫୩), ୧୮ ବର୍ଷରୁ କମ୍ ବାଳିକାରେ କଟକ(୫୫), ବାଳକରେ କଟକ(୯୭), ୨୦ ବର୍ଷରୁ କମ୍ ବାଳିକାରେ କଟକ(୭୦), ବାଳକରେ କଟକ(୬୫), ମହିଳାରେ କଟକ(୯୩) ଓ ପୁରୁଷରେ ଓଡ଼ିଶା ପୋଲିସ(୧୨୮ ପଏଣ୍ଟ) ପ୍ରଥମସ୍ଥାନ ଅଧିକାର କରିଥିଲା।
ପ୍ରତିଯୋଗିତାର ତୃତୀୟ ଦିବସରେ ୨ଟି ମିଟ୍ ରେକର୍ଡ ସ୍ଥାପନ ହୋଇଛି। ମହିଳା ୩୦୦୦ ମିଟର ଷ୍ଟିପଲ ଚେଜ୍ରେ କିଟ୍ର ପ୍ରଭାତି ମାଝି ୧୨:୧୧.୮ ସେକେଣ୍ଡ ସମୟ ନେଇ ଏହି ରେକର୍ଡର ଅଧିକାରିଣୀ ହୋଇଛନ୍ତି। ପୂର୍ବରୁ ରେକର୍ଡ ଟାଇମିଂ ଥିଲା ୧୨:୪୧.୭ ସେକେଣ୍ଡ। ସେହିପରି ୨୦ ବର୍ଷରୁ କମ୍ ବାଳକ ହାମର ଥ୍ରୋରେ ପୁରୀର ଅଭିଷେକ ପଣ୍ଡା ମିଟ୍ ରେକର୍ଡ କରିଛନ୍ତି। ସେ ୪୩.୦୪ ଦୂରକୁ ହାମର ଥ୍ରୋ କରି ପୂର୍ବରୁ ଥିବା ରେକର୍ଡ(୪୨.୧୬ ମିଟର)କୁ ଭାଙ୍ଗିଛନ୍ତି। ଅନ୍ତିମ ଦିବସରେ ଅନୁଷ୍ଠିତ ଇଭେଣ୍ଟ ଗୁଡ଼ିକ ମଧ୍ୟରେ ୨୦ ବର୍ଷରୁ କମ୍ ବାଳିକା ୨୦୦ ମିଟର ରେସ୍ରେ ମଧୁମିତା ଦେବ୍, ୩୦୦୦ ମିଟର ରନରେ ସ୍ବେତା କୁଜୁର, ୪୦୦ ମିଟର ହର୍ଡଲ୍ସରେ ପ୍ରିୟଙ୍କା ଟପ୍ପୋ, ଟ୍ରିପଲ ଜମ୍ପରେ ବିଷ୍ଣୁପ୍ରିୟା ନାୟକ, ହାମର ଥ୍ରୋରେ ସ୍ବେତଲିନା ନାୟକ ହେପ୍ଟାଥଲନରେ ପ୍ରିୟଙ୍କା ଟପ୍ପୋ ସ୍ବର୍ଣ୍ଣ ପଦକ ପାଇଛନ୍ତି। ପୁରୁଷ ୨୦୦ ମିଟର ରେସ୍ରେ ଅମିୟ ମଲିକ, ୮୦୦ ମିଟର ରେସ୍ରେ ରୋଶନ ମିଞ୍ଜ, ୧୦୦୦୦ ମିଟର ରେସ୍ରେ ଅଶୋକ ଦଣ୍ଡସେନା, ୩୦୦୦ ମିଟର ଷ୍ଟିପଲଚେଜ୍ରେ ବିପିନ ପ୍ରଧାନ, ୪୦୦ ମିଟର ହର୍ଡଲ୍ସରେ କୌଶଲ୍ୟା କୁମାର ନାୟକ, ପୋଲଭଲ୍ଟରେ ମନୋଜ କୁମାର ହେମ୍ବ୍ରମ ହାମର ଥ୍ରୋରେ ମଳୟ ରଞ୍ଜନ ପତି ପ୍ରଥମସ୍ଥାନ ଅଧିକାର କରିଛନ୍ତି। ସେହିପରି ମହିଳା ୨୦୦ ମିଟରରେ ଦୂତୀ ଚାନ୍ଦ, ୧୦୦୦୦ ମିଟର ରେସ୍ରେ ଅସ୍ମିତା ସେଠୀ, ୩୦୦୦ ମିଟର ଷ୍ଟିପଲ ଚେଜ୍ରେ ପ୍ରଭାତି ମାଝି, ୪୦୦ ମିଟର ହର୍ଡଲ୍ସରେ ଜଉନା ମୁର୍ମୁ, ଟ୍ରିପଲ ଜମ୍ପରେ ରେନ୍କି ସାହୁ, ହାମର ଥ୍ରୋରେ ଦିବ୍ୟା ସାଣ୍ଡିଲ୍ୟ, ହେପ୍ଟାଥଲନରେ ସଞ୍ଜୁକ୍ତା ମିଞ୍ଜ ସ୍ବର୍ଣ୍ଣ ପଦକ ଲାଭ କରିଛନ୍ତି।
