ଭୁବନେଶ୍ୱର, ୧୭।୫(ବ୍ୟୁରୋ): ଲକ୍ଡାଉନ୍ ପାଇଁ ଦେଶର ବିଭିନ୍ନ ରାଜ୍ୟରେ ଲକ୍ଷଲକ୍ଷ ଓଡ଼ିଆ ଫସି ରହିଛନ୍ତି। କଟକଣା କୋହଳ ହେବାପରଠାରୁ ପ୍ରବାସୀମାନେ ପ୍ରତିଦିନ ଓଡ଼ିଶା ଫେରୁଛନ୍ତି। ଶନିବାର ୧୭ହଜାର ୮୫୫ଜଣ ଓଡ଼ିଆ ଭଉଣୀ ଭାଇ ରାଜ୍ୟକୁ ଫେରି ଆସିଛନ୍ତି। ଏମାନଙ୍କୁ ମିଶାଇ ଇତିମଧ୍ୟରେ ବାହା ରାଜ୍ୟଗୁଡ଼ିକରୁ ଓଡ଼ିଶାକୁ ୧ଲକ୍ଷ ୩୩ହଜାର ୨୪୫ଜଣ ଫେରିଲେଣି। ସେମାନେ ବସ୍, ଟ୍ରେନ୍ ଓ ଅନ୍ୟାନ୍ୟ ଯାନବାହନରେ ଆସିଛନ୍ତି। ଏମାନଙ୍କ ମଧ୍ୟରୁ ଅଧିକାଂଶ ପ୍ରବାସୀ ରାଜ୍ୟର ୫ ଜିଲାକୁ ଯାଇଛନ୍ତି। ଗଞ୍ଜାମ ଜିଲାକୁ ସର୍ବାଧିକ ୫୫ହଜାର ୫୬୭ଜଣ ପ୍ରବାସୀ ଫେରିଛନ୍ତି। ଏହା ତଳକୁ ବାଲେଶ୍ୱରକୁ ୧୧ହଜାର ୩୬୮, କଟକକୁ ୮ହଜାର ୧୯୮, କେନ୍ଦ୍ରାପଡ଼ାକୁ ୭ହଜାର ୪୫୭, ଭଦ୍ରକକୁ ୭ହଜାର ୨୭୩ ପ୍ରବାସୀ ଫେରିଛନ୍ତି ବୋଲି ସ୍ବାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟ ସଚିବ ପ୍ରଦୀପ୍ତ ମହାପାତ୍ର ସୂଚନା ଦେଇଛନ୍ତି। ସେ କହିଛନ୍ତି, ଅଧିକ ସଂଖ୍ୟକ ପ୍ରବାସୀ ଫେରିଥିବାରୁ ଏହିସବୁ ଜିଲାରେ ସେମାନଙ୍କ ପାଇଁ ବେଡ୍ ସଂଖ୍ୟା ବୃଦ୍ଧି କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଥିଲେ। ଏହାକୁ ଦୃଷ୍ଟିରେ ରଖି ଗଞ୍ଜାମ ଜିଲାରେ ଆଉ ଅଧିକ ୫ହଜାର ପର୍ଯ୍ୟନ୍ତ ବେଡ୍ ବଢ଼ାଇବା ପାଇଁ ପ୍ରସ୍ତୁତି ଚାଲିଛି। କେନ୍ଦ୍ରାପଡ଼ା, ଭଦ୍ରକ, ବାଲେଶ୍ୱରରେ ଖୁବ୍ଶୀଘ୍ର ଆଉ ୧ ହଜାର ଲେଖାଏ ବେଡ୍ ବଢ଼ିବ। ତେବେ ରାଜ୍ୟର ୪୫ପ୍ରତିଶତ ପ୍ରବାସୀ ଗଞ୍ଜାମ ଜିଲାକୁ ଫେରିଛନ୍ତି। ତେଣୁ ସେଠାରେ ଅଧିକ ଗୁରୁତ୍ୱ ଦେବାର ଆବଶ୍ୟକତା ଅଛି। ତେଣୁ ଏହି ଜିଲାର ୪ ସ୍ଥାନରେ ଅତିରିକ୍ତ କରୋନା କେୟାର ସେଣ୍ଟର କରାଯାଇଛି।
