ରାଜୁ ହନ୍ତାଳ ହତ୍ୟା ଘଟଣା: ପାପରମେଟଲାରେ ପୁଣି ଉତ୍ତେଜନା: ୧୪୪ ଧାରା ଜାରି
02 ମାଲକାନଗିରି,୨୦ା୯(ଡି.ଏନ.ଏ.)- ମାଲକାନଗିରି ଜିଲା ଚିତ୍ରକୋଣ୍ଡା ବ୍ଲକ ସ୍ବାଭିମାନ ଅଞ୍ଚଳ ଜନ୍ତାପାଇରେ ରାଜୁ ହନ୍ତାଳ ହତ୍ୟା ମାମଲା ନେଇ ପୁଣି ଉତ୍ତେଜନା ଦେଖାଦେଇଛି। ପାରମ୍ପରିକ ଅସ୍ତ୍ରଶସ୍ତ୍ର ଧରି ଶୋଭାଯାତ୍ରା କରି ପାପରମେଟଲା ନିକଟରେ ଶତାଧିକ ଲୋକ ଏକାଠି ହୋଇଛନ୍ତି। । ଅପ୍ରୀତିକର ପରିସ୍ଥିତକୁ ଏଡାଇବା ଜିଲା ପ୍ରଶାସନ ପୋଲିସ ପକ୍ଷରୁ ସେଠାରେ ୧୪୪ ଧାରା ଜାରି କରାଯାଇଛି । ଜନ୍ତାପାଇରେ ଚାଲିଥିବା ସାପ୍ତାହିକ ହାଟ ବନ୍ଦ କରିବାକୁ ଡାକବାଜି ଯନ୍ତ୍ରରେ ଘୋଷଣା କରାଯାଇଛି । ଆଦିବାସୀଙ୍କ କାର୍ଯ୍ୟକଳାପକୁ ଅନୁଧ୍ୟାନ କରିବା ପାଇଁ ପୋଲିସ ଡ୍ରୋନ କ୍ୟାମେରାର ସହାୟତା ନେଇଛି । ସମ୍ପୃକ୍ତ ଅଞ୍ଚଳକୁ ଆନ୍ଧ୍ର ପ୍ରଦେଶରୁ କିଛି ବ୍ୟକ୍ତି ଆସିଥିବା ସୂଚନା ପାଇ ପୋଲିସ ଏହାକୁ ଗୁରୁତର ସହ ନେଇଛି। ସେମାନଙ୍କ ସମ୍ପର୍କରେ ତଥ୍ୟ ସଂଗ୍ରହ କରାଯାଉଛି। ଯେକୌଣସି ପ୍ରକାର ପରିସ୍ଥିତିକୁ ଏଡ଼ାଇବା ପାଇଁ ବ୍ୟାପକ ବିଏସଏଫ ଫୋର୍ସ ମୁତୟନ କରାଯାଇଛି । ସୂଚନାଯୋଗ୍ୟ ଯେ, ଗତ ଶୁକ୍ରବାର ରାଙ୍ଗିଣିଗୁଡ଼ା ଗ୍ରାମର ରାଜୁ ନିଜର ୨ଝିଅଙ୍କୁ ଧରି ଔଷଧ ଓ ରାଶନ ସାମଗ୍ରୀ କିଣିବା ପାଇଁ ଜନ୍ତାପାଇ ହାଟକୁ ଯାଇଥିଲେ। ସେଠାରୁ ପୋଲିସ ତାଙ୍କୁ ଉଠାଇ ନେଇଥିଲା। ଏହା ପରେ ଶନିବାର ରାଜୁଙ୍କ ମୃତଦେହ ଜନ୍ତାପାଇ ଅଙ୍ଗନୱାଡ଼ି କେନ୍ଦ୍ର ରୋଷେଇ ଘରୁ ମିଳିଥିଲା। ପରିବାର ଲୋକେ ଓ ଗ୍ରାମବାସୀ ବିଏସ୍ଏଫ୍ ଯାବାନମାନେ ରାଜୁଙ୍କୁ ହତ୍ୟା କରିଛନ୍ତି ବୋଲି ଅଭିଯୋଗ କରି ସେହିଦିନ ରାତିରେ ମୃତଦେହ ରଖି ଥାନା ସମ୍ମୁଖରେ ଆନ୍ଦୋଳନ କରିଥିଲେ। ତା’ ପରଦିନ ଥାନା ଘେରାଉ କରିବା ସହ ବିକ୍ଷୋଭ ପ୍ରଦର୍ଶନ କରିଥିଲେ। ପ୍ରଶାସନ ପକ୍ଷରୁ ଗ୍ରାମରେ ଆଲୋଚନା ବେଳେ ରାଜୁଙ୍କୁ ଡାକି ନେଇଥିବା ବିଏସ୍ଏଫ୍ ଯବାନଙ୍କ ବିରୋଧରେ ହତ୍ୟା ମାମଲା ରୁଜୁ କରିବାକୁ ଦାବି କରି ନିଜ ଜିଦ୍ରେ ଅଟଳ ରହିଥିଲେ। ତେବେ ଗ୍ରାମବାସୀଙ୍କୁ କୌଣସି ପ୍ରକାରେ ବୁଝାଶୁଝା କରି ପୋଲିସ ମୃତଦେହ ବ୍ୟବଚ୍ଛେଦ ଲାଗି ଆଣିଥିଲା। ସୋମବାର ମୃତଦେହ ହସ୍ତାନ୍ତର କରିବାକୁ ଯାଇଥିବା ବେଳେ ପରିବାର ଲୋକେ ଏହାକୁ ଗ୍ରହଣ କରି ନ ଥିଲେ। ପରିବାର ଓ ଗ୍ରାମବାସୀ ବିଏସ୍ଏଫ୍ ବିରୋଧରେ ହତ୍ୟା ମାମଲା ରୁଜୁ କରିବାକୁ ପୁଣି ଦାବି କରିଥିଲେ। ଏହାକୁ ନେଇ ସେଠାରେ ଅସନ୍ତୋଷ ବୃଦ୍ଧି ପାଇ ଉଗ୍ର ରୂପ ଧାରଣ କରିଥିଲା। ଲୋକେ ପୋଲିସକୁ ଆକ୍ରମଣ କରିଥିଲେ। ଏଥିରେ ୪ଜଣ କନେଷ୍ଠବଳ ଆହତ ହୋଇଥିଲେ। ଲୋକଙ୍କ ରୋଷର ଶିକାର ହୋଇ ଘଟଣାସ୍ଥଳରୁ ଚାଲିଯାଇଥିବା ପୋଲିସ କିଛି ସମୟ ପରେ ବିଏସଏଫ୍ ଫୋର୍ସ ଧରି ଆସି ଗ୍ରାମବାସୀଙ୍କ ସହ ଆଲୋଚନା କରିଥିଲେ। ଦୀର୍ଘ ସମୟ ଆଲୋଚନା ପରେ ଏହାର ସମାଧାନ ହୋଇଥିଲା। ପରିବାର ଲୋକେ ମୃତଦେହ ଗ୍ରହଣ କରିଥିଲେ।