ଭୁବନେଶ୍ୱର, ୧୬।୭(ବ୍ୟୁରୋ): ଷୋଡଶ ବିଧାନସଭାର ପ୍ରଥମ ଅଧିବେଶନରେ ଗୃହରେ ବିଭିନ୍ନ ବିଭାଗର ଖର୍ଚ୍ଚ ଦାବି ଆଲୋଚନା ହୋଇଯାଇଛି। ସୋମବାର ଗୃହରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଏବଂ ଅବକାରୀ ବିଭାଗର ବ୍ୟୟ ବରାଦ ବିଲ୍କୁ ମଞ୍ଜୁରୀ ମିଳିଛି। ଆର୍ଥିକ ବର୍ଷ ୨୦୧୯-୨୦ ବଜେଟରେ ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗରେ ସର୍ବମୋଟ ୧୧୫୮ କୋଟି ୯୩ଲକ୍ଷ ୩୧ ହଜାର ଟଙ୍କାର ବ୍ୟୟବରାଦ ବିଲ୍କୁ ମଞ୍ଜୁରୀ ମିଳିଛି। ଗୃହରେ ରାଜସ୍ବ ମନ୍ତ୍ରୀ ସୁଦାମ ମାରାଣ୍ଡି କହିଛନ୍ତି ଯେ, ବିଭିନ୍ନ କାର୍ଯ୍ୟାଳୟ ପ୍ରତିଷ୍ଠାନର ପ୍ରଶାସନିକ ବ୍ୟୟ ବାବଦରେ ୧୦୧୨କୋଟି ୩୨ଲକ୍ଷ ୨୬ହଜାର ଟଙ୍କା ବରାଦ କରାଯାଇଛି। ଏହାସହ କାର୍ଯ୍ୟକ୍ରମ ବାବଦରେ ମୋଟ ୧୪୬,୬୧.୦୫ କୋଟି ଟଙ୍କା ଖର୍ଚ୍ଚ ବରାଦ କରାଯାଇଛି। ଏହି ବିଭାଗ ଅଧୀନ ନୂତନ କୋଠାବାଡି ନିର୍ମାଣ, ରାଜସ୍ବ କାର୍ଯ୍ୟାଳୟ ଗୁଡିକର ଭିତ୍ତିଭୂମିର ସୁଦୃଢୀକରଣ, ସରକାରୀ ଜମିର ସୁରକ୍ଷା ଆଦି ବିଭିନ୍ନ ପରିକଳ୍ପନା କାର୍ଯ୍ୟାନ୍ବୟନ କରିବା ପାଇଁ ବଜେଟରେ ସମୁଦାୟ ୧୪୬କୋଟି ୬୧ଲକ୍ଷ ୦୫ହଜାର ଟଙ୍କା ବ୍ୟୟ ବରାଦ କରାଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ୫ଟି କୁ ମୂଳମନ୍ତ୍ରଭାବେ ଗ୍ରହଣ କରି ରାଜସ୍ବ ଓ ବିପର୍ଯ୍ୟୟ ପରିଚାଳନା ବିଭାଗ ଅଧୀନ ସମସ୍ତ ବିଭାଗ ତରଫରୁ ବଳିଷ୍ଠ ପଦକ୍ଷେପ ନିଆଯିବ ବୋଲି ମନ୍ତ୍ରୀ କହିଛନ୍ତି। ସେହିପରି ବିଧାୟକମାନେ ଉଠାଇଥିବା ପ୍ରସଙ୍ଗରେ ଉତ୍ତର ରଖି ମନ୍ତ୍ରୀ କହିଛନ୍ତି, ରାଜ୍ୟରେ ଥିବା ୪୧୧୬ ପଡାଗ୍ରାମକୁ ରାଜସ୍ବ ଗ୍ରାମରେ ପରିଣତ କରିବା ଲାଗି ସରକାରଙ୍କ ବିଚାରାଧୀନ ରହିଛି। ସମସ୍ତ ତହସିଲରେ ଅନଲାଇନ ଦାଖଲ ଏବଂ ଖାରଜ ପ୍ରକ୍ରିୟାକୁ ବାଧ୍ୟତାମୂଳକ କରାଯାଇଛି। ଖାରଜ ହେଉଥିବା ମାମଲାଗୁଡିକର ଫଇସଲା ପରେ ଆବେଦନକାରୀଙ୍କ ନିକଟକୁ ଡାକ ମାଧ୍ୟମରେ ପଟ୍ଟା ପଠାଇ ଦିଆଯାଉଛି। ରାଜସ୍ବ ଗ୍ରାମଗୁଡିକରେ ଭ୍ରାମ୍ୟମାଣ ରାଜସ୍ବ ଅଦାଲତ ଶିବିର କରିବା ପାଇଁ ତହସିଲଦାରମାନଙ୍କୁ ପରାମର୍ଶ ଦିଆଯାଇଛି। ଜନସାଧାରଣଙ୍କ ଅଭିଯୋଗ ଶୁଣିବାକୁ ଟୋଲ୍ ଫି ନମ୍ବର ଦିଆଯାଇଛି। ବିଭାଗ ଦ୍ୱାରା ଅଣଆବାସିକ ଏବଂ ଆବାସିକ ଗୃହ ନିର୍ମାଣ ପାଇଁ ୧୦୦କୋଟି ଟଙ୍କାର ବ୍ୟୟ ବରାଦ କରାଯାଇଛି। ୨୦ କୋଟି ଟଙ୍କା ଯାଜପୁର ଜିଲାରେ ପ୍ରସ୍ତାବିତ ପ୍ରଶାସନ ନଗର ତିଆରି ଲାଗି ଆବଶ୍ୟକ ଜମି ଅଧିଗ୍ରହଣ ନିମନ୍ତେ ପ୍ରସ୍ତାବ ଦିଆଯାଇଛି। ୧୯୯୫ ମସିହା ପୂର୍ବର ଫାଇଲକୁ ଡିଜିଟାଇଜେଶନ କରିବାକୁ ୪ କୋଟି ଟଙ୍କା ବ୍ୟୟ ବରାଦ କରାଯାଇଛି। ରାଜସ୍ବ ରେକର୍ଡ ଗୃହ ପାଇଁ ଆସବାବ ଓ ସଂଲଗ୍ନ ଉପକରଣ ସଂଗ୍ରହ ଏବଂ ଉନ୍ନତୀକରଣ ପାଇଁ ୮ କୋଟି ଟଙ୍କା ବ୍ୟୟ ବରାଦ କରାଯାଇଛି। ରାଜସ୍ବ ଭିତ୍ତିଭୂମିର ସୁଦୃଢ଼ୀକରଣ ଲାଗି ୧୫କୋଟି ୮୦ଲକ୍ଷ ଟଙ୍କାର ବ୍ୟୟ ବରାଦ କରାଯାଇଛି। ଲଘୁ ଖଣିଜ ଦ୍ରବ୍ୟର ବେଆଇନ କାରବାର ଓ ଚୋରି ରୋକିବା ନିମନ୍ତେ ୫କୋଟି ଟଙ୍କାର ବ୍ୟୟ ବରାଦ କରାଯାଇଛି। ଏହାସହ ଏହି ଲଘୁ ଖଣିଜ ଦ୍ରବ୍ୟର ବେଆଇନ କାରବାର ରୋକିବା ନିମନ୍ତେ ସରକାର ଏକ ନିର୍ଦ୍ଦେଶାଲୟ ପ୍ରତିଷ୍ଠା ପାଇଁ ଚିନ୍ତା କରୁଛନ୍ତି।ରାଜ୍ୟରେ ବାସଗୃହ ନ ଥିବା ୭୧,୭୬୧ ପରିବାର ଚିହ୍ନଟ ହୋଇଛନ୍ତି। ସେଥି ମଧ୍ୟରୁ ୨୩,୫୨୧ ବାସଗୃହହୀନ ପରିବାରଙ୍କୁ ବାସ ଉପଯୋଗୀ ଜମି ଯୋଗାଇ ଦିଆଯାଇଛି। ଅବଶିଷ୍ଟଙ୍କୁ ଦେବାକୁ ପଦକ୍ଷେପ ନିଆଯାଇଛି।
