କଟକ ଅଫିସ, ୬।୫: କରୋନା ପାଇଁ ଚଳିତବର୍ଷ ରଥଯାତ୍ରା ହେବ କି ନାହିଁ, ତାହାକୁ ନେଇ ଅନିଶ୍ଚିତତା ଲାଗିରହିଛି। ଅକ୍ଷୟତୃତୀୟାର ଅନେକ ଦିନ ପରେ ମଧ୍ୟ ଏପର୍ଯ୍ୟନ୍ତ ରଥ ନିର୍ମାଣ କାର୍ଯ୍ୟ ଆରମ୍ଭ ହୋଇନାହିଁ। ତୁରନ୍ତ ରଥ ନିର୍ମାଣ କାର୍ଯ୍ୟ ଆରମ୍ଭ କରିବା ପାଇଁ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେବା ନେଇ ମଙ୍ଗଳବାର ହାଇକୋର୍ଟରେ ଏକ ଜନସ୍ବାର୍ଥ ମାମଲା ରୁଜୁ ହୋଇଛି। ଜଗନ୍ନାଥ ସଂସ୍କୃତି ଜନ ଜାଗରଣ ମଞ୍ଚ ପକ୍ଷରୁ ସଭାପତି ପ୍ରଫେସର ଡ. ନିରଞ୍ଜନ ତ୍ରିପାଠୀ ଏବଂ ଅନ୍ୟମାନେ ଏହି ମାମଲା ରୁଜୁ କରିଛନ୍ତି। ଆବେଦନକାରୀଙ୍କ ପକ୍ଷରୁ ଦର୍ଶାଯାଇଛି ଯେ, ଅକ୍ଷୟତୃତୀୟାଠାରୁ ରଥ ନିର୍ମାଣ କାର୍ଯ୍ୟ ଆରମ୍ଭ ହୁଏ। ଏଥିଲାଗି ୨ମାସରୁ ଅଧିକ ସମୟ ଲାଗିଥାଏ। ବର୍ତ୍ତମାନଠାରୁ ରଥ ନିର୍ମାଣ ଆରମ୍ଭ ନ ହେଲେ, ଯାତ୍ରା ପୂର୍ବରୁ ସରିବା କଷ୍ଟକର। ରଥଯାତ୍ରା ହେବା ମଧ୍ୟ ସମ୍ଭବ ହୋଇପାରିବ ନାହିଁ। ୧୮୫୭ ମସିହା ସିପାହୀ ବିଦ୍ରୋହ ସମୟରେ ରଥଯାତ୍ରା ବନ୍ଦ ହୋଇ ନ ଥିଲା। ନ’ ଅଙ୍କ ଦୁର୍ଭିକ୍ଷରେ ମଧ୍ୟ ରଥଯାତ୍ରା ହୋଇଛି। ତେଣୁ ଏବେ କରୋନା ସମୟରେ କିଭଳି ରଥଯାତ୍ରା ସୁରୁଖୁରୁରେ ହୋଇପାରିବ, ସେନେଇ ଆବେଦନକାରୀଙ୍କ ପକ୍ଷରୁ କେତେକ ପ୍ରସ୍ତାବ ଦିଆଯାଇଛି। ଆସନ୍ତା ଜୁନ୍ ୨୩ରେ ରଥଯାତ୍ରା। ତା’ ପୂର୍ବରୁ କରୋନା ସଂକ୍ରମଣ କମି ନ ଥିଲେ ଦଇତାପତି, ସେବାୟତ ଓ ପୋଲିସ କର୍ମଚାରୀଙ୍କୁ ନେଇ ରଥଯାତ୍ରା ହୋଇପାରିବ। ସେମାନଙ୍କର କରୋନା ପରୀକ୍ଷା କରାଯାଇପାରିବ। ଏଥିରେ ଭକ୍ତ ଭାଗ ନେବେ ନାହିଁ। କିନ୍ତୁ ଟିଭି, ସୋସିଆଲ ମିଡିଆ ଆଦିରୁ ରଥଯାତ୍ରା ଦେଖିପାରିବେ ବୋଲି ଆବେଦନକାରୀ ନିଜ ଆବେଦନରେ ଉଲ୍ଲେଖ କରିଛନ୍ତି। ଆବେଦନକାରୀଙ୍କ ପକ୍ଷରୁ ଏହି ମାମଲାରେ କେନ୍ଦ୍ର ସଂସ୍କୃତି ମନ୍ତ୍ରଣାଳୟ, ରାଜ୍ୟ ମୁଖ୍ୟ ଶାସନ ସଚିବ, ଆଇନ ବିଭାଗ ପ୍ରମୁଖ ଶାସନ ସଚିବ, ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପ୍ରମୁଖ ଶାସନ ସଚିବ, ଶ୍ରୀମନ୍ଦିର ପ୍ରଶାସନ ମୁଖ୍ୟ ପ୍ରଶାସକ, ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି ଅଧ୍ୟକ୍ଷ, ପୁରୀ ଜିଲାପାଳ ଏବଂ ଏସ୍ପିଙ୍କୁ ପକ୍ଷଭୁକ୍ତ କରାଯାଇଛି। ଆବେଦନକାରୀଙ୍କ ପକ୍ଷରୁ ଆଇନଜୀବୀ ବିଜୟ କୁମାର ରାଗଡ ମାମଲା ରୁଜୁ କରିଛନ୍ତି।
