କଟକ ଅଫିସ,୧୬ା୧୦- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ଆନୁକୂଲ୍ୟରେ ଚଳିତ ଘରୋଇ କ୍ରିକେଟ ଟୁର୍ନାମେଣ୍ଟର ଭେନ୍ୟୁ ତାଲିକା ଘୋଷଣା କରାଯାଇଛି । ଆସନ୍ତା ଡିସେମ୍ବର ୯ରୁ ଆରମ୍ଭ ହେବ ରଣ୍ଜୀ ସିଜନ ୨୦୧୯-୨୦। ଚଳିତ ସଂସ୍କରଣରେ ଏଲିଟ ଗ୍ରୁପ-ସିରେ ସ୍ଥାନ ପାଇଥିବା ଓଡ଼ିଶା ଘରୋଇ ଗ୍ରାଉଣ୍ଡରେ ୫ଟି ମ୍ୟାଚ୍ ଖେଳିବାର ସୁଯୋଗ ପାଇବ । ୩ବର୍ଷର ବ୍ୟବଧାନ ପରେ ରାଜ୍ୟର ଏକମାତ୍ର ଅନ୍ତର୍ଜାତୀୟ କ୍ରିକେଟ ଗ୍ରାଉଣ୍ଡ ବାରବାଟୀ ଷ୍ଟାଡିୟମରେ ରଣ୍ଜୀ ମ୍ୟାଚ୍ ଦେଖିବାକୁ ମିଳିବ। ଲୋଧା କମିଟି କାର୍ଯ୍ୟକାରୀ ହେବା ପରେ ରାଜ୍ୟ କ୍ରିକେଟ ସଂଘର ଅଚଳାବସ୍ଥା ଯୋଗୁଁ ଏଠାରେ ମ୍ୟାଚ୍ ଆୟୋଜନ କରିବା ପାଇଁ ଓସିଏ କର୍ତ୍ତୃପକ୍ଷ ପଛଘୁଞ୍ଚା ଦେଉଥିଲେ। ଘୋଷିତ ମ୍ୟାଚ୍ ସୂଚୀରେ ବାରବାଟୀ ଷ୍ଟାଡିୟମରେ ୨ଟି, ଡ୍ରିମ୍ସ ଗ୍ରାଉଣ୍ଡରେ ୨ଟି ଓ କିଟ୍ରେ ଗୋଟିଏ ମ୍ୟାଚ୍ ହେବ ବୋଲି ଉଲ୍ଲେଖ ରହିଛି ।
୨୦୧୬-୧୭ ସିଜନରେ ବାରବାଟୀ ଷ୍ଟାଡିୟମରେ ଶେଷଥର ପାଇଁ ରଣ୍ଜୀ ଟ୍ରଫି ମ୍ୟାଚ୍ ଖେଳାଯାଇଥିଲା। ଏହି ସିଜନର ୩ଟି ମ୍ୟାଚ୍ ଏଠାରେ ହୋଇଥିଲା। ୨୦୧୬ ନଭେମ୍ବର ୨୯ରୁ ଡିସେମ୍ବର ୨ ପର୍ଯ୍ୟନ୍ତ ହୋଇଥିବା କେରଳ-ତ୍ରିପୁରା ମ୍ୟାଚ୍ ହେଉଛି ବାରବାଟୀରେ ଶେଷ ରଣଜୀ ମ୍ୟାଚ୍। ସେହିବର୍ଷ ନଭେମ୍ବର ୫ରୁ ୮ ଛତିଶଗଡ଼-ଗୋଆ, ନଭେମ୍ବର ୧୩ରୁ ୧୬ ପର୍ଯ୍ୟନ୍ତ ହରିୟାଣା-ଜମ୍ମୁ କଶ୍ମୀର ମ୍ୟାଚ୍ ଏଠାରେ ଖେଳାଯାଇଥିଲା। ବାରବାଟୀ ଷ୍ଟାଡିୟମରେ ୪ବର୍ଷ ବ୍ୟବଧାନ ପରେ ଓଡ଼ିଶା ଦଳ ରଣଜୀ ଟ୍ରଫି ଖେଳିବାର ସୁଯୋଗ ପାଇବ। ୨୦୧୫ ଅକ୍ଟୋବର ୧୫ରେ ଓଡ଼ିଶା ଏହାର ଶେଷ ମ୍ୟାଚ୍ ଆସାମ ବିପକ୍ଷରେ ଏଠାରେ ଖେଳିଥିଲା ଓ ୮ ଉଇକେଟରେ ବିଜୟୀ ମଧ୍ୟ ହୋଇଥିଲା । ୨୦୧୫ ସଂସ୍କରଣରେ ଓଡ଼ିଶା-ମହାରାଷ୍ଟ୍ର ଲିଗ ପର୍ଯ୍ୟାୟ ମ୍ୟାଚ୍ ଓ ଟୁର୍ନାମେଣ୍ଟର ଦ୍ୱିତୀୟ ସେମିଫାଇନାଲ ମ୍ୟାଚ୍ ବାରବାଟୀ ଷ୍ଟାଡିୟମରେ ଖେଳାଯାଇଥିଲା।
ଡିସେମ୍ବର ୯ରୁ ୧୨ ପର୍ଯ୍ୟନ୍ତ ଓଡ଼ିଶା ଛତିଶଗଡ଼ ବିପକ୍ଷରେ ଛତିଶଗଡ଼ ଗ୍ରାଉଣ୍ଡରେ ଆସନ୍ତା ରଣ୍ଜୀ ଟ୍ରଫିର ପ୍ରଥମ ମ୍ୟାଚ୍ ଖେଳିବ। ପରେ ଟାଙ୍ଗୀସ୍ଥିତ ଡ୍ରିମ୍ସ ଗ୍ରାଉଣ୍ଡରେ ଦ୍ୱିତୀୟ ମ୍ୟାଚ୍ ଖେଳିବ । ଡିସେମ୍ବର ୧୭ରୁ ୨୦ ପର୍ଯ୍ୟନ୍ତ ହେବାକୁ ଥିବା ଏହି ମ୍ୟାଚ୍ରେ ଓଡ଼ିଶାର ମୁକାବିଲା ସର୍ଭିସେସ ସହିତ ହେବ। ଡିସେମ୍ବର ୨୫ରୁ ୨୮ ଓଡ଼ିଶାର ପରବର୍ତ୍ତୀ ମ୍ୟାଚ୍ ମଧ୍ୟ ଡ୍ରିମ୍ସ ଗ୍ରାଉଣ୍ଡରେ ଉତ୍ତରାଖଣ୍ଡ ବିପକ୍ଷରେ ଖେଳାଯିବ୍। ଜାନୁୟାରୀ ୩ ଓ ୧୧ ତାରିଖରେ ଯଥାକ୍ରମେ ତ୍ରିପୁରା, ହରିୟାଣା ବିପକ୍ଷରେ ଓଡ଼ିଶା ବିପକ୍ଷ ଦଳର ଘରୋଇ ମାଟିରେ ମ୍ୟାଚ୍ ଖେଳିବ। ଜାନୁୟାରୀ ୧୯ରୁ ୨୨ ପର୍ଯ୍ୟନ୍ତ ଜମ୍ମୁ କଶ୍ମୀର ବିପକ୍ଷ ଓ ୨୭ରୁ ୩୦ ଆସାମ ବିପକ୍ଷ ୨ଟି ଯାକ ମ୍ୟାଚ୍ ବାରବାଟୀ ଷ୍ଟାଡିୟମରେ ଖେଳାଯିବ। ଫେବୃୟାରୀ ୪ରୁ ମହାରାଷ୍ଟ୍ର ଗ୍ରାଉଣ୍ଡରେ ଘରୋଇ ମହାରାଷ୍ଟ୍ର ଦଳକୁ ଭେଟିବ ଓଡ଼ିଶା । ଲିଗ ପର୍ଯ୍ୟାୟର ଅନ୍ତିମ ମ୍ୟାଚ୍ ଓଡ଼ିଶା ଝାଡ଼ଖଣ୍ଡ ବିପକ୍ଷରେ ଖେଳିବାକୁ ଥିବା ବେଳେ ଏହା କିଟ୍ ଗ୍ରାଉଣ୍ଡରେ ଅନୁଷ୍ଠିତ ହେବ।
ଓଡ଼ିଶାର ରଣ୍ଜୀ ମ୍ୟାଚ୍ ସୂଚୀ
ତାରିଖ ବିପକ୍ଷ ଭେନ୍ୟୁ
ଡିସେମ୍ବର ୯ରୁ ୧୨ ଛତିଶଗଡ଼ ଛତିଶଗଡ଼
ଡିସେମ୍ବର ୧୭ରୁ ୨୦ ସର୍ଭିସେସ ଡ୍ରିମ୍ସ
ଡିସେମ୍ବର ୨୫ରୁ ୨୮ ଉତ୍ତରାଖଣ୍ଡ ଡ୍ରିମ୍ସ
ଜାନୁୟାରୀ ୩ରୁ ୬ ୍ତ୍ରିପୁରା ତ୍ରିପୁରା
ଜାନୁୟାରୀ ୧୧ରୁ ୧୪ ହରିୟାଣା ହରିୟାଣା
ଜାନୁୟାରୀ ୧୯ରୁ ୨୨ ଜମ୍ମୁ-କଶ୍ମୀର ବାରବାଟୀ
ଜାନୁୟାରୀ ୨୭ରୁ ୩୦ ଆସାମ ବାରବାଟୀ
ଫେବୃୟାରୀ ୪ରୁ ୭ ମହାରାଷ୍ଟ୍ର ମହାରାଷ୍ଟ୍ର
ଫେବୃୟାରୀ ୧୨ରୁ ୧୫ ଝାଡ଼ଖଣ୍ଡ କିଟ୍