ବଡ଼ବିଲ,୧୦।୮(ସ୍ବ.ପ୍ର.): କେନ୍ଦୁଝର ଜିଲା ବଡ଼ବିଲ ଥାନା ଅନ୍ତର୍ଗତ ଗାଢ଼ା ହଟିଂ ଅଞ୍ଚଳରେ ରହୁଥିବା ମନୋଜ ରାଜପୁତ ନାମକ ଯୁବକ ଶୁକ୍ରବାର ରାତିରେ ଗାଢ଼ା ହଟିଂ ଓ ସୁନ୍ଦରାବସ୍ତି ଅଞ୍ଚଳରେ ଉନ୍ମତ୍ତ କାଣ୍ଡ ଭିଆଇଛନ୍ତି। ଅଭିଯୁକ୍ତ ମନୋଜ ଏକ ଧାରୁଆ ଅସ୍ତ୍ର ସାହାଯ୍ୟରେ ଦୁଇଜଣ ମହିଳାଙ୍କ ସମେତ ଅନ୍ୟ ୩ ଜଣଙ୍କୁ ମରଣାନ୍ତକ ଆକ୍ରମଣ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଅଭିଯୁକ୍ତ ମନୋଜ ଗାଢ଼ା ହଟିଂ ଅଞ୍ଚଳର ଜୟନ୍ତୀ ଲୋହାର ନାମ୍ନୀ ମହିଳାଙ୍କୁ ମରଣାନ୍ତକ ଆକ୍ରମଣ କରିଥିବାବେଳେ ତାଙ୍କୁ ସ୍ଥାନୀୟ ଲୋକେ ଧରିବାକୁ ଉଦ୍ୟମ କରିବାରୁ ବିଭିନ୍ନ ଲୋକଙ୍କ ଘର ଛାତ ଉପରେ ଚଢ଼ି ଖସିଯାଇଥିଲେ। ତେବେ ମନୋଜ ସନ୍ଧ୍ୟା ସମୟରେ ଉଲଗ୍ନ ହୋଇ ଏକ ଧାରୁଆ ଅସ୍ତ୍ର ଧରି ଏଣେତେଣେ ବୁଲୁଥିଲାବେଳେ ରାତିରେ କୌଣସି କାରଣ ନ ଥାଇ ଟୁନି କିଷାନ ନାମ୍ନୀ ମହିଳାଙ୍କ ମୁଣ୍ଡ, ବେକ ଓ ହାତକୁ ହାଣି ପକାଇଥିଲେ। ତାଙ୍କ ଚିତ୍କାର ଶୁଣି ସେହି ଅଞ୍ଚଳର ରାଜକୁମାର ଗୋପ, କ୍ରିଷ୍ଣା ପ୍ରସାଦ ଓ କୁନା ମହାକୁଡ଼ ଅଭିଯୁକ୍ତଙ୍କ କବଳରୁ ଟୁନିଙ୍କୁ ଉଦ୍ଧାର କରିବାକୁ ଯାଇ ମରଣାନ୍ତକ ଆକ୍ରମଣର ଶିକାର ହୋଇଥିଲେ। ଗୁରୁତର ଅବସ୍ଥାରେ ଟୁନିଙ୍କୁ ବଡ଼ବିଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଛି। ଖବରପାଇ ପୋଲିସ ଘଟଣାସ୍ଥଳରେ ପହଞ୍ଚି ଆକ୍ରମଣକାରୀ ମନୋଜଙ୍କୁ କାବୁ କରିଥିଲା। ମନୋଜ ମାନସିକ ସନ୍ତୁଳନ ହରାଇଥିବା ଅନୁମାନ କରାଯାଉଥିବାବେଳେ ମରଣାନ୍ତକ ଆକ୍ରମଣ ନେଇ ବଡ଼ବିଲ ଥାନାକେସ୍ ନଂ.୧୬୩/୧୯ରେ ଏକ ମାମଲା ରୁଜୁ କରାଯାଇଛି। ଅଭିଯୁକ୍ତ ମନୋଜ ମଧ୍ୟ ଆହତ ହୋଇଥିବାରୁ ପୋଲିସ ତାଙ୍କୁ ନିଜ ହେପାଜତରେ ବଡ଼ବିଲ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିବା ଜଣାପଡ଼ିଛି।
