ଭୁବନେଶ୍ୱର,୧୩।୫(ବ୍ୟୁରୋ): ରାଜ୍ୟରେ ହୁ ହୁ ହୋଇ ବଢ଼ୁଛି କରୋନା ଆକ୍ରାନ୍ତଙ୍କ ସଂଖ୍ୟା। ବୁଧବାର ସକାଳେ ୧୦୧ ନୂଆ ପଜିଟିଭ୍ ଚିହ୍ନଟ ହେବା ପରେ ମୋଟ ସଂକ୍ରମିତଙ୍କ ସଂଖ୍ୟା ୫୩୮ରେ ପହଞ୍ଚିଛି। ତେବେ ରାଜ୍ୟର ୨୧ଟି ଜିଲାରେ ଏବେ କରୋନା କବଳରେ ଥିବା ବେଳେ ଗଞ୍ଜାମ ୨୧୦ ସଂକ୍ରମିତ ସହ ଶୀର୍ଷ ସ୍ଥାନରେ ରହିଛି। ସେହିଭଳି ଯାଜପୁରକୁ ପଛରେ ପକାଇ ବାଲେଶ୍ୱର ଦ୍ୱିତୀୟ ସ୍ଥାନରେ ପହଞ୍ଚିଛି। ବାଲେଶ୍ୱରରେ ଏବେ ଆକ୍ରାନ୍ତଙ୍କ ସଂଖ୍ୟା ୯୦ ରହିଥିବା ବେଳେ ଯାଜପୁରରେ ରହିଛି ୭୧। ସେହିଭଳି ଖୋର୍ଦ୍ଧାରେ ସଂକ୍ରମିତଙ୍କ ସଂଖ୍ୟା ୫୦, ଭଦ୍ରକରେ ୩୧, ସୁନ୍ଦରଗଡ଼ରେ ୨୩, ଅନୁଗୋଳରେ ୧୫, ମୟୂରଭଞ୍ଜରେ ୯, କେନ୍ଦ୍ରାପଡ଼ାରେ ୯, ଜଗତସିଂହପୁରରେ ୫, ପୁରୀରେ ୪, କେନ୍ଦୁଝରରେ ୪, ବୌଦ୍ଧରେ ୪, କଟକରେ ୩, କଳାହାଣ୍ଡିରେ ୨, ଝାରସୁଗୁଡ଼ାରେ ୨, ବଲାଙ୍ଗୀରରେ ୨, ନୟାଗଡ଼- କୋରାପୁଟ-ଢ଼େଙ୍କାନାଳ-ଦେବଗଡ଼ରେ ଗୋଟିଏ ଲେଖାଏ ସକ୍ରମିତ ଚିହ୍ନଟ ହୋଇଛନ୍ତି।
ପ୍ରକାଶ ଯେ, ରାଜ୍ୟରେ ମୋଟ ୫୩୮ଜଣ ସଂକ୍ରମିତଙ୍କ ମଧ୍ୟରୁ ୪୧୯ଜଣ ଆକ୍ଟିଭ୍ ମାମଲା ରହିଛି। ସେହିଭଳି ୧୧୬ଜଣ ସୁସ୍ଥ ହୋଇଛନ୍ତି। ୩ଜଣଙ୍କ ମୃତ୍ୟୁ ଘଟିଛି।
