ନୂଆଦିଲ୍ଲୀ, ୩୧।୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶର ପ୍ରଧାନମନ୍ତ୍ରୀ ଭାବେ ଶପଥ ନେବା ପରେ ତାଙ୍କ ମନ୍ତ୍ରୀମଣ୍ଡଳର ସଦସ୍ୟମାନେ ଜଣେ ପରେ ଜଣେ ଶପଥ ନେଇଥିଲେ। ରାଷ୍ଟ୍ର ପାହ୍ୟା ମନ୍ତ୍ରୀ ପାଇଥିବା ଓଡ଼ିଶାର ପ୍ରତାପ ଚନ୍ଦ୍ର ଷଡଙ୍ଗୀ ଶପଥ ନେବାକୁ ଆସିବା ମାତ୍ରେ ସମସ୍ତେ ତାଳି ମାରି ତାଙ୍କୁ ସ୍ବାଗତ କରିଥିଲେ। ନିର୍ବାଚନ ରଣାଙ୍ଗନରେ ବିଜୟ ହାସଲ କରିବା ପରେ ପ୍ରତାପଙ୍କୁ ନେଇ ଏବେ ଚାରିଆଡେ ଚର୍ଚ୍ଚା। ଜଣେ ରାଜନେତା ଭାବେ ତାଙ୍କ ସାଧାରଣ ଜୀବନଯାପନ ଶୈଳୀ ସମସ୍ତଙ୍କୁ ପ୍ରଭାବିତ କରିଛି। ଏକ ସାମାନ୍ୟ ଛୋଟ ଘରେ ରହୁଥିବା ପ୍ରତାପ ଲୋକଙ୍କ ସମସ୍ୟା ବୁଝିବା ସହ ସେମାନଙ୍କ ସୁଖଦୁଃଖର ସାଥୀ ହୋଇ ରହିବା ପାଇଁ ଚେଷ୍ଟା କରିଥାନ୍ତି। ନୀଳଗିରିରୁ ବିଧାୟକ ଭାବେ ନିର୍ବାଚିତ ହୋଇଥିବା ପ୍ରତାପଙ୍କୁ ଏଥର ବାଲେଶ୍ୱର ଲୋକ ସଭା ଆସନରେ ଭାଜପା ପକ୍ଷରୁ ଟିକେଟ୍ ଦିଆଯାଇଥିଲା। ଏଥିରେ ସେ ବାଜିମାତ୍ କରିଥିଲେ।
