ମୁମ୍ବାଇ,୨୯।୧୧: ଶେଷରେ ମହାରାଷ୍ଟ୍ରରେ ଉଦ୍ଧବ ଠାକ୍ରେଙ୍କ ନେତୃତ୍ୱରେ ସରକାର ଗଠନ ହୋଇଛି। ଶିବସେନା-ଏନସିପି ଏବଂ କଂଗ୍ରେସ ମିଶି ରାଜ୍ୟକୁ ଏକ ମଜଭୁତ ସରକାର ଦେବା ପାଇଁ ଶପଥ ନେଇଛନ୍ତି। ଗତ କିଛିଦିନ ହେବ ଶିବସେନା ମୁଖପତ୍ର ‘ସାମ୍ନା’ରେ ପ୍ରତିଦିନ ମୋଦି ସରକାରକୁ ନେଇ ଆଲୋଚନା ଚାଲିଥିବାବେଳେ ଗୁରୁବାର ରାଜ୍ୟରେ ସରକାର ଗଠନ ପରେ ଏଥିରେ ବିରାମ ଲାଗିଛି। ଶୁକ୍ରବାର ‘ସାମ୍ନା’ର ସମ୍ପାଦକୀୟ ପୃଷ୍ଠାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରାଯାଇଛି। ଏଥିରେ ଲେଖାଯାଇଛି, ଉଦ୍ଧବ ଠାକ୍ରେ ଏବଂ ମୋଦି ଭାଇଭାଇ। ମହାରାଷ୍ଟ୍ର ରାଜନୀତିରେ ଭାଜପା-ଶିବସେନା ମଧ୍ୟରେ ମନୋମାଳିନ୍ୟ ରହିଛି। କିନ୍ତୁ ମୋଦି ଠାକ୍ରେ ମଧ୍ୟରେ ସମ୍ପର୍କ ଭାଇଭାଇ ଭଳି। ମହାରାଷ୍ଟ୍ରରେ ଛୋଟ ଭାଇଙ୍କୁ ସହାୟତା ଦେବା ବଡ ଭାଇ ମୋଦିଙ୍କ କର୍ତ୍ତବ୍ୟ। ପ୍ରଧାନମନ୍ତ୍ରୀ ସାରା ଦେଶର ହୋଇଥାନ୍ତି। କେବଳ ଗୋଟିଏ ଦଳର ନୁହେଁ ବୋଲି ‘ସାମ୍ନା’ରେ ଲେଖାଯାଇଛି।
