ନୂଆଦିଲ୍ଲୀ,୨୨ା୮ : ପୋଷ୍ଟ-ଗ୍ରାଜୁଏଟ୍ ମେଡିକାଲ ପାଠ୍ୟକ୍ରମ ଏବଂ ସୁପର ସ୍ପେଶିଆଲିଟି ପାଠ୍ୟକ୍ରମରେ ନାମଲେଖା ପାଇଁ ବାଧ୍ୟତାମୂଳକ ବଣ୍ଡ୍ ବ୍ୟବସ୍ଥାକୁ ଚ୍ୟାଲେଞ୍ଜ କରି ଦାଏର ହୋଇଥିବା ରିଟ୍ ପିଟିଶନ୍କୁ ସୁପ୍ରିମକୋର୍ଟ ଖାରଜ କରିଦେଇଛନ୍ତି। ଓଡିଶା ସମେତ ଆନ୍ଧ୍ରପ୍ରଦେଶ, ତେଲେଙ୍ଗାନା, ଗୁଜରାଟ, ମହାରାଷ୍ଟ୍ର, ତାମିଲନାଡୁ, କର୍ନାଟକ, ପଶ୍ଚିମବଙ୍ଗ, ଗୋଆ ଆଦି ରାଜ୍ୟ ସରକାରଙ୍କ ପକ୍ଷରୁ ଡାକ୍ତରୀ ପାଠ୍ୟକ୍ରମରେ ନାମଲେଖା ପାଇଁ ବଣ୍ଡ୍ ବ୍ୟବସ୍ଥା ଲାଗୁ କରାଯାଇଛି। ସମାଜର ଅବହେଳିତ ବର୍ଗଙ୍କ ମୌଳିକ ଅଧିକାରର ସୁରକ୍ଷା ପାଇଁ ସରକାର ପଦକ୍ଷେପ ନେଇପାରିବେ। ଭାରତୀୟ ସମ୍ବିଧାନର ଅନୁଚ୍ଛେଦ ୨୧ରେ ଏହି କ୍ଷମତା ପ୍ରଦାନ କରାଯାଇଥିବା ଜଷ୍ଟିସ୍ ଏଲ୍. ନାଗେଶ୍ୱର ରାଓ ଏବଂ ହେମନ୍ତ ଗୁପ୍ତାଙ୍କ ଖଣ୍ଡପୀଠ କହିଛନ୍ତି।
ଓଡିଶାରେ ଥିବା ସମସ୍ତ ୪୫ଟି ସୁପର ସ୍ପେଶିଆଲିଟି ପାଠ୍ୟକ୍ରମ ସିଟ୍ ସର୍ବଭାରତୀୟ କାଉନ୍ସେଲିଂରେ ମେଧା ଭିତ୍ତିରେ ପୂରଣ କରାଯାଇଥିବା ରାଜ୍ୟ ସରକାରଙ୍କ ପକ୍ଷରୁ ଆଇନଜୀବୀ ଶିବାଶିଷ ମିଶ୍ର ଖଣ୍ଡପୀଠଙ୍କୁ ଜଣାଇଥିଲେ। ଏଥିପାଇଁ ସରକାରୀ କଲେଜରେ ବର୍ଷକୁ ୪୫ ହଜାର ଟଙ୍କା ଦେୟ ନିଆଯାଉଛି ଏବଂ ସୁପର ସ୍ପେଶିଆଲିଟି ପାଠ୍ୟକ୍ରମରେ ଯୋଗଦେଉଥିବା ଡାକ୍ତରମାନଙ୍କୁ ଷ୍ଟାଇପେଣ୍ଡ ବାବଦରେ ୫୬, ୮୨୪ ଟଙ୍କା ଦିଆଯାଉଛି। ରାଜ୍ୟରେ ସୁପର ସ୍ପେଶିଆଲିଟି ଡାକ୍ତରଙ୍କର ଗୁରୁତର ସଙ୍କଟ ରହିଥିବାରୁ ଜନସ୍ବାର୍ଥ ଲାଗି ସରକାର ବଣ୍ଡ୍ ବ୍ୟବସ୍ଥା ପ୍ରଚଳନ କରିଥିବା ସେ କୋର୍ଟଙ୍କୁ କହିଥିଲେ। ତେବେ କେତେକ ରାଜ୍ୟ ବାଧ୍ୟତାମୂଳକ ବଣ୍ଡ୍ ବ୍ୟବସ୍ଥାରେ କଠୋର ସର୍ତ୍ତ ରଖିଥିବା ଜାଣିବା ପରେ ଏହା ସମସ୍ତଙ୍କ ପାଇଁ ସମାନ ହେବା ଆବଶ୍ୟକ ବୋଲି ଖଣ୍ଡପୀଠ ଅନୁଭବ କରିଥିଲେ। ସରକାରୀ ମେଡିକାଲ କଲେଜରେ ଶିକ୍ଷାଲାଭ କରୁଥିବା ଛାତ୍ରୀଛାତ୍ରଙ୍କ ପାଇଁ ବାଧ୍ୟତାମୂଳକ ସେବା ବଣ୍ଡ୍ କ୍ଷେତ୍ରରେ ସମାନ ନୀତି ଆପଣାଇବାକୁ ଖଣ୍ଡପୀଠ କେନ୍ଦ୍ର ସରକାର ଓ ଭାରତର ମେଡିକାଲ କାଉନସିଲ୍ (ଏମ୍ସିଆଇ)କୁ ପ୍ରସ୍ତାବ ଦେଇଛନ୍ତି।
ମେଡିକାଲ ସୁପର ସ୍ପେଶିଆଲିଟି ପାଇଁ ଆଶାୟୀ ଏବଂ ହସ୍ପିଟାଲ ତତ୍ତ୍ୱାବଧାନରେ ପ୍ରଶିକ୍ଷଣ ନେଉଥିବା ମେଡିକାଲ ଗ୍ରାଜୁଏଟ ସଂଘ ପକ୍ଷରୁ ଏହି ରିଟ୍ ପିଟିଶନ୍ ଦାଏର ହୋଇଥିଲା। ବାଧ୍ୟତାମୂଳକ ବଣ୍ଡ ବ୍ୟବସ୍ଥାରେ ଥିବା ସର୍ତ୍ତକୁ ରଦ୍ଦ କରିବା ପାଇଁ ସଂଘ ପକ୍ଷରୁ ଆବେଦନ କରାଯାଇଥିଲା। ସୂଚନାଯୋଗ୍ୟ, ଓଡିଶା ସରକାରଙ୍କ ସଂଶୋଧିତ ସେବା ବଣ୍ଡ୍ ନୀତି ଅନୁଯାୟୀ ସରକାରୀ କଲେଜରେ ଏମ୍ବିବିଏସ୍, ପୋଷ୍ଟ ଗ୍ରାଜୁଏଟ (ପିଜି) ଏବଂ ସୁପର ସ୍ପେଶିଆଲାଇଜେଶନ ମେଡିକାଲ ପାଠ୍ୟକ୍ରମ କରୁଥିତ୍ବା ଛାତ୍ରୀଛାତ୍ରଙ୍କୁ ରାଜ୍ୟରେ ଅନୂ୍ୟନ ୨ ବର୍ଷ କାର୍ଯ୍ୟ କରିବାକୁ ପଡ଼ିବ। ଏମ୍ବିବିଏସ୍ ପରେ ରାଜ୍ୟରେ ଚାକିରି ନ କଲେ ସମ୍ପୃକ୍ତ ଛାତ୍ରଙ୍କୁ ୫୦ ଲକ୍ଷ ଟଙ୍କା ଗଣିବାକୁ ହେବ। ସେହିପରି ପିଜି ଛାତ୍ରୀଛାତ୍ରଙ୍କୁ ୧.୫ କୋଟି ଏବଂ ସୁପର ସ୍ପେଶିଆଲିଟି ପାଠ୍ୟକ୍ରମ କରିଥିବା ଛାତ୍ରୀଛାତ୍ରଙ୍କୁ ୨ କୋଟି ଟଙ୍କା ସରକାରଙ୍କ ପାଖରେ ଦାଖଲ କରିବାକୁ ପଡିବ।
