ଆରଡ଼ି, ୧୬।୧ (ଡି.ଏନ୍.ଏ.):ଭଦ୍ରକ ଜିଲା ଧୁଷୂରୀ ଥାନା ଅଧୀନ ଅଜମତପୁର ଗଁାର ଜଗନ୍ନାଥ ଜେନା(୪୯) ଫୁସ୍ଫୁସ୍ ସଂକ୍ରମଣ ଜନିତ ରୋଗରେ ପୀଡ଼ିତ। ୨୧ଦିନ ହେଲା ଦୁବାଇର ଇଣ୍ଟରନ୍ୟାଶନାଲ ମଡର୍ଣ୍ଣ ହସ୍ପିଟାଲରେ ଆଇସିୟୁରେ ଚିକିତ୍ସାଧୀନ ରହିଥିବା ବେଳେ ସେ ମୃତ୍ୟୁ ସହ ସଂଗ୍ରାମ କରୁଛନ୍ତି। ଚିକିତ୍ସା ଅତ୍ୟନ୍ତ ବ୍ୟୟସାପେକ୍ଷ ହୋଇଥିବାରୁ ତାଙ୍କ ପରିବାର ଲୋକେ ଭାଙ୍ଗି ପଡ଼ିଛନ୍ତି।
ଜଗନ୍ନାଥ ଗତ କିଛିବର୍ଷ ହେଲା ସେଠାରେ ରାଜମିସ୍ତ୍ରୀ ଭାବେ କାମ କରି ପରିବାର ପ୍ରତିପୋଷଣ କରୁଥିଲେ। ଗତ ଡିସେମ୍ବରରେ ସେ ହଠାତ୍ ଅସୁସ୍ଥ ହୋଇପଡ଼ିଥିଲେ। ଚିକିତ୍ସା ଜାରି ରହିଥିବା ବେଳେ ସେଠାରେ କାମ କରୁଥିବା ଜଣେ ପରିଚିତ ବ୍ୟକ୍ତି ତାଙ୍କର ଦେଖାଶୁଣା କରୁଛନ୍ତି। ଏହାମଧ୍ୟରେ ତାଙ୍କ ଚିକିତ୍ସା ପାଇଁ ୧୮ଲକ୍ଷରୁ ଅଧିକ ଟଙ୍କା ଖର୍ଚ୍ଚ ହୋଇସାରିଲାଣି। ଚିକିତ୍ସା ଲାଗି ଆହୁରି ଅଧିକ ଅର୍ଥରାଶି ଆବଶ୍ୟକ ଥିବାରୁ ସହାୟତା ପାଇଁ ଜଗନ୍ନାଥଙ୍କ ସ୍ତ୍ରୀ ସ୍ବର୍ଣ୍ଣଲତା ଆକୁଳ ନିବେଦନ କରିଛନ୍ତି। ଗ୍ରାମର ଯୁବକମାନେ ମଧ୍ୟ ଗଁା ଗଁା ବୁଲି ଆର୍ଥିକ ସାହାଯ୍ୟ ଭିକ୍ଷା କରୁଛନ୍ତି। ଜଗନ୍ନାଥଙ୍କ ଚିକିତ୍ସା ନିମନ୍ତେ ସରକାରୀ ସହାୟତା ପ୍ରଦାନ କରାଯିବାକୁ ସ୍ବେଚ୍ଛାସେବୀ ସଙ୍ଗଠକ ପରାଗ ରଞ୍ଜନ ସାମଲ ଦାବି କରିଛନ୍ତି। ଏଥିସହ ସହାୟତାର ହାତ ବଢ଼ାଇବାକୁ ବିଭିନ୍ନ ସ୍ବେଚ୍ଛାସେବୀ ସଙ୍ଗଠନକୁ ସେ ନିବେଦନ କରିଛନ୍ତି।
