ମୁମ୍ବାଇ,୭।୪: ମହାରାଷ୍ଟ୍ରରେ କରୋନା ସଂକ୍ରମିତଙ୍କ ସଂଖ୍ୟା ବଢି ଚାଲିଥିବା ବେଳେ ଏବେ ଏହା ଡାକ୍ତର ଓ ନର୍ସଙ୍କ ମଧ୍ୟରେ ଦେଖାଯିବାରୁ ଚିନ୍ତାର କାରଣ ପାଲଟିଯାଇଛି। ଏଠାରେ ଥିବା ଏକ ଘରୋଇ ହସ୍ପିଟାଲରେ ପାଖାପାଖି ୫୨ ଜଣ ଡାକ୍ତର ଓ ନର୍ସ କରୋନା ଭାଇରସରେ ପୀଡ଼ିତ ହେବା ପରେ ଉକ୍ତ ହସ୍ପିଟାଲକୁ ସିଲ୍ କରି ଦିଆଯାଇଛି। ସେହିପରି ଅନ୍ୟଏକ ଘରୋଇ ହସ୍ପିଟାଲରେ ୧୫ କରୋନା ପଜିଟିଭଙ୍କୁ ଚିହ୍ନଟ କରାଯିବା ପରେ ସେଥିମଧ୍ୟରୁ ୨ ଜଣ ରୋଗୀ ଥିବା ବେଳେ ଅନ୍ୟ ସମସ୍ତ ପଜିଟିଭ ନର୍ସିଂ ଷ୍ଟାଫ ବୋଲି ଜଣାପଡିଛି। ଏହାପରେ ଉକ୍ତ ହସ୍ପିଟାଲକୁ ମଧ୍ୟ ସିଲ୍ କରି ଦିଆଯାଇଛି। ଏବେ ହସ୍ପିଟାଲ ଭିତରେ ଥିବା କୌଣସି ଲୋକଙ୍କୁ ବାହାରକୁ ଛାଡି ଦିଆଯାଉ ନ ଥିବା ଜଣାପଡିଛି। ସୂଚନାଯୋଗ୍ୟ, ଦେଶରେ ପ୍ରଥମେ ପ୍ରାୟ ୫୦ ଡାକ୍ତର କରୋନା ଭୂତାଣୁ ଦ୍ୱାରା ସଂକ୍ରମିତ ହେବା ଫଳରେ ସ୍ବାସ୍ଥ୍ୟ ବିଭାଗର ଚିନ୍ତା ବଢି ଯାଇଥିଲା। ଏବେ କିନ୍ତୁ ଏହି ଡାକ୍ତରମାନେ ରୋଗୀଙ୍କଠାରୁ ସଂକ୍ରମିତ ହେଉଛନ୍ତି ନା ଅନ୍ୟ କେମିତି ସଂକ୍ରମିତ ହେଉଛନ୍ତି ତା’ଉପରେ କାମ ଆରମ୍ଭ ହୋଇଥିବା କୁହାଯାଉଛି। ସୂଚନାଯୋଗ୍ୟ, ମଙ୍ଗଳବାର ସକାଳ ସୁଦ୍ଧା ମହାରାଷ୍ଟ୍ରରେ ୨୩ ନୂଆ ରୋଗୀ ଚିହ୍ନଟ ହେବା ପରେ ଏଠାରେ କରୋନା ସଂକ୍ରମିତଙ୍କ ସଂଖ୍ୟା ପହଞ୍ଚିଛି ୮୯୧ରେ।
