ବିଜେପୁର, ୭।୮ (ଡି.ଏନ୍.ଏ): ବରଗଡ଼ ଜିଲା ବିଜେପୁର ବ୍ଲକରେ ବଛରକୁତା ଦୁଖ୍ ଦୁରଦଶା ଚାଷୀକର ପିଛା ନାଇଁ ଛାଡବାର୍। କେତେବେଲେ ବରଷା ପାଏନ୍ ଅଭାବୁ ତ ଆର କେତେବେଲେ ଫସଲଥି ରୋଗ୍ପୋକ ଲାଗି ଚାଷୀ ସମାଜ ଅଥାଥାଲି ହେଉଛେ। ଏହେଦେ ମୁଗ୍ଫଲି ଫସଲଥି ଲାଗିଥିବାର ରୋଗ୍ପୋକ ଅଂଚଲର ଚାଷୀକର ନିଦ୍ ହଜେଇ ଦେଲାନ। ପଦ୍ମପୁର ଉପଖଣ୍ଡ ବିଜେପୁର ବ୍ଲକର ଚାଷୀମାନେ ବରଷା ପାଏନ୍କେ ଆଶ୍ରା କରି ଚାଷ୍ବାସ କରୁଛନ୍। ଚଲତି ବଛର ମଉସୁମୀ ଉଛୁରରେ ଆଏଲେ ବି ଜୁନ୍ ମାସେ ଚାଷବାସ୍ ଲାଗି ବତର ହେଇଥିଲା। ସେଥିରଲାଗି ଚାଷୀମାନେ ବଡ଼ା ଉଷତ୍ଥି ଧାନ ସଂଗେ ମୁଗ୍, ମୁଗ୍ଫଲି, ବିରି ବୁନାବୁନି କରିଥିଲେ। ହେଲେ ଜୁଲାଇ ମାସର ଅଭାବି ବରଷା ଚାଷ୍ କାମକେ ପଛେଇ ଦେଲା। ଗଲା ହପ୍ତେ ହେଲା ଯେନ୍ ଟିକେରଁଚେ ବରଷା ହେଇଛେ, ସେଥି କଁା ଭଁା ରୁଆ ବିହିଡ଼ା ଚଲୁଛେ। ଏନ୍ତାଥି ମୁଗ୍ଫଲି ଗଛ ପାଏନ୍ ଭୁରେ ପାଏଲାକେ ଛନ୍ଛନେଇ କରି ବଢ଼ୁଛେ। ଫୁଲକଷି ବି ଧରବାର ସମିଆ ହେଲାନ। ଠିକ୍ ଇ ସମିଆରେ ଫସଲଥି ପୋକ୍ ଲାଗି ମୁଗ୍ଫଲି ଫୁଲକେ ଖାଇଯାଉଛନ୍। ଫସଲଥି ଯେତେ ଉଷୋକଷା ଝିଁଟ୍ଲେ ବି କାମ୍ ନାଇଁ ଦେଉଥିବାର ଚାଷୀ ଅଭିଯୋଗ କରିଛନ୍। କୃଷି ବିଭାଗ ଇ ଦିଗେ ଧିଆନ୍ ଦେଇ ଭଲ ଉଷୋକଷା ଦେବାକେ ଅଂଚଲର ଚାଷୀ ଦାବି କରିଛନ୍। କନ୍ଡ଼ିହିର ଚାଷୀ ସୁଶାନ୍ତ ପଟେଲ କହିଛନ୍ ଯେ, ଆମର ଗଁାରେ ଖାଲି ନୁହେ। ବିଜେପୁର ଅଂଚଲର ଭିନେ ଭିନେ ଗଁାଥି ମୁଗ୍ଫଲି ଚାଷ୍ଥି ଇ ପୋକ୍ ଲାଗିଛନ୍। ଯେତେ ଉଷୋକଷା ଦେଲେ ବି କିଛି କାମ୍ ନାଇଁ ଦେବାର। କୃଷି ବିଭାଗ୍ ସବସିଡିଥି ଉଷୋ ଯୁଗେଇ ଦେଲେ ଆମେ ଚାଷୀମାନେ ଚିଁନ୍ତାଥୁ ମୁକ୍ତି ପାଏତୁଁ। ସେନ୍ତା ପଁାକେଲଡ଼ିହିର ଚାଷୀ ଦୀନବନ୍ଧୁ ସାହୁ କହିଛନ ଯେ, ଆମେ ଚାଷୀମାନେ ଖାଲି ନୁକ୍ସାନ ସହୁଛୁଁ। ବରଷା ପାଏନ୍ ଟିକେ ହେଲା ଯେ ଖାଲି ମଁଦା ଜିଁଛେ। ମୁଗ୍ଫଲି ଫସଲଥି ଇ ପୋକ ଲାଗି ଆମେ ଆନାଏତ୍ ହେଇଗଲୁଁନ। ଯେତେ ଉଷୋ ଦେଲେ କିଛି ଲାଭ ନାଇଁ ହେବାର। ବ୍ଲକ ସହକାରୀ କୃଷି ଅଧ୍କାରୀ ଲକ୍ଷ୍ମୀ ପ୍ରସାଦ ପଟେଲକୁଁ ପଚରାଲାରୁ ଗଁା ଗଁା ଯାଇ ଚାଷୀମାନକୁ ସହଯୋଗ କରବାକେ ଭିଏଡବ୍ଲୁମାନକୁ ପରାମଶ୍ ଦିଆଯାଇଛେ ବଲି ସେ କହିଥିଲେ।
