ଭୁବନେଶ୍ୱର,୨୫।୧୧(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ରବିବାର ଏକ ପ୍ରାକୃତିକ ମନୋରମ ଫଟୋକୁ ଟୁଇଟ୍ କରିଥିଲେ। ମୁଖ୍ୟମନ୍ତ୍ରୀ ଉଲ୍ଲେଖ କରିଥିଲେ ଯେ, ସେ ଅନେକ ସ୍ଥାନ ଭ୍ରମଣ କରିଛନ୍ତି। ହେଲେ ଓଡ଼ିଶାର ପ୍ରାକୃତିକ ସୌନ୍ଦର୍ଯ୍ୟ ତାଙ୍କୁ ଅଧିକ ଆକର୍ଷିତ କରିଥାଏ। ଫଟୋରେ ଦେଖାଯାଉଥିବା ଏହି ରାସ୍ତାଟି କେଉଁଠିକାର ବୋଲି ମୁଖ୍ୟମନ୍ତ୍ରୀ ପ୍ରଶ୍ନ କରିଥିଲେ। ସେହିପରି ପଚାରିଥିବା ପ୍ରଶ୍ନର ଉତ୍ତର ନେଇ ସାମାନ୍ୟ ସଙ୍କେତ ଦେଇ କହିଥିଲେ ଯେ, ଏହା ଆଦିବାସୀ ଅଞ୍ଚଳର ସାମାଜିକ-ସାଂସ୍କୃତିକ ଏକ ପାହାଡିଆ ଅଞ୍ଚଳର ଏକ ଜୀବନରେଖା। ଉଲ୍ଲେଖଯୋଗ୍ୟ, ମୁଖ୍ୟମନ୍ତ୍ରୀଙ୍କ ଏହି ପ୍ରଶ୍ନ ପରେ ବହୁ ସଂଖ୍ୟକ ଟୁଇଟର ବ୍ୟବହାରକାରୀ ଉତ୍ତର ଦେବା ଆରମ୍ଭ କରିଥିଲେ। ରାତି ୧୦ଟା ୨୦ ସୁଦ୍ଧା ଏହି ପୋଷ୍ଟ୍ଟିକୁ ୩୪୦୦ ଲାଇକ୍, ୩୯୧ ରିଟୁଇଟ୍, ୨୬୭ଟି ଉତ୍ତର ଆସିଥିଲା। ପ୍ରଶ୍ନ ପଚାରିବାର କିଛି ଘଣ୍ଟା ପରେ ମୁଖ୍ୟମନ୍ତ୍ରୀ ଟୁଇଟର ଜରିଆରେ ତାହାର ଉତ୍ତର ରଖିଥିଲେ। ମୁଖ୍ୟମନ୍ତ୍ରୀଙ୍କ ଦ୍ୱାରା ପୋଷ୍ଟ୍ କରାଯାଇଥିବା ଫଟୋଟି ଜୟପୁର-ମାଲକାନଗିରିକୁ ଯୋଗାଯୋଗ କରୁଥିବା ରାସ୍ତାର ଥିଲା ବୋଲି ସେ ନିଜେ ଉଲ୍ଲେଖ କରିଥିଲେ। ତାଙ୍କ ପ୍ରଶ୍ନର ଉତ୍ତର ଦେବା ପାଇଁ ଭାଗ ନେଇଥିବା ସମସ୍ତ ଟୁଇଟର ବ୍ୟବହାରକାରୀଙ୍କୁ ନବୀନ ଧନ୍ୟବାଦ ଦେଇଥିଲେ।
