ଭୁବନେଶ୍ୱର,୫।୫ (ବ୍ୟୁରୋ): ଗ୍ରୀନ୍ ଜୋନ୍ କରୋନା(କୋଭିଡ୍-୧୯) ମୁକ୍ତ। ସେହି ସବୁ ଅଞ୍ଚଳରେ ଗମନାଗମନ ପାଇଁ ବସ୍ ଚାଲିପାରିବ ବୋଲି କେନ୍ଦ୍ର ଓ ରାଜ୍ୟ ସରକାର ଗାଇଡ ଲାଇନ ଜାରି କରିଛନ୍ତି। ୫୦ ପ୍ରତିଶତ ଯାତ୍ରୀଙ୍କୁ ନେଇ ବସ୍ ଚଲାଇବାକୁ ଅନୁମତି ଦିଆଯାଇଛି। ତେବେ ଏ ନେଇ କୌଣସି ସ୍ପଷ୍ଟ ଗାଇଡ ଲାଇନ ରାଜ୍ୟ ସରକାରଙ୍କ ପକ୍ଷରୁ ଜାରି କରାଯାଇ ନ ଥିବାରୁ ଘରୋଇ ବସ୍ ମାଲିକମାନେ ଦ୍ୱନ୍ଦ୍ୱରେ ପଡ଼ିଛନ୍ତି। ରାଜ୍ୟ ଘରୋଇ ବସ୍ ମାଲିକ ସଂଘର କହିବା କଥା ହେଲା ୫୦ ପ୍ରତିଶତ ଯାତ୍ରୀ ନେଇ ବସ ଚଲାଇବା ସମ୍ଭବ ନୁହେଁ। ଏହାଦ୍ୱାରା ବସ୍ ମାଲିକଙ୍କୁ ବହୁ କ୍ଷତି ସହିବାକୁ ପଡ଼ିବ। କେଉଁଠି ଗ୍ରୀନ୍ ଜୋନ୍ ଆରମ୍ଭ ହେଉଛି ଓ ଶେଷ ହେଉଛି ସେ ନେଇ ସ୍ପଷ୍ଟ କରାଯାଇ ନାହିଁ। ଗାଡି ଚଳାଇବା ନେଇ ରାଜ୍ୟ ସରକାର ଏକ ଆଡଭାଇଜରି ଜାରି କରନ୍ତୁ ବୋଲି ସଂଘ ଦାବି କରିଛି। ଏ ନେଇ ସଂଘ ସରକାରଙ୍କ ନିକଟରେ କେତେକ ଦାବି ଉପସ୍ଥାପନ କରିଛି। ବୀମା ଅବଧି ୬ ମାସ ବୃଦ୍ଧି, ବ୍ୟାଙ୍କ ଋଣର ସୁଧ ୬ ମାସ ପାଇଁ ଛାଡ଼, ଡିଜେଲ ଉପରୁ ଭ୍ୟାଟ୍ ଓ ସେସ୍ ଛାଡ଼, ଟୋଲ୍ଗେଟ ଶୁଳ୍କ ଛାଡ଼ କରିବା, ରାଜ୍ୟ ସରକାର ବସ୍ଗୁଡ଼ିକ ଉପରୁ ୬ ମାସ ପାଇଁ ଟିକସ ଛାଡ଼ ସହ ଅନ୍ୟାନ୍ୟ ଦାବିକୁ ସଂଘ ରାଜ୍ୟ ସରକାରଙ୍କ ନିକଟରେ ଉପସ୍ଥାପନ କରିଛି। ସରକାର ଏହା ଉପରେ ବିଚାର କରିବା ପରେ ବସ୍ ଚାଲିବ ବୋଲି ରବିବାର ଅନୁଷ୍ଠିତ ସଂଘର ଜରୁରୀ ବୈଠକରେ ନିଷ୍ପତ୍ତି ହୋଇଥିଲା। ଅନ୍ୟପକ୍ଷରେ ଗ୍ରୀନ୍ ଜୋନ୍ରେ ବସ୍ ଚାଲିବା ନେଇ ଏକ ପ୍ରସ୍ତାବ ସୋମବାର ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ମୁଖ୍ୟମନ୍ତ୍ରୀଙ୍କ ନିକଟକୁ ପଠାଇଛନ୍ତି। ଗଣମାଧ୍ୟମକୁ ସୂଚନା ଦେଇ ମନ୍ତ୍ରୀ କହିଛନ୍ତି ଯେ୍ ଗ୍ରୀନ୍ ଜୋନ୍ରେ ଯାତ୍ରୀବାହୀ ବସ୍ ଚାଲିବା ନେଇ ବ୍ୟବସ୍ଥା ହେଉଛି। ମୁଖ୍ୟମନ୍ତ୍ରୀଙ୍କ ନିକଟକୁୁ ଫାଇଲ ଯାଇଛି। ଅନୁମୋଦନ ପରେ ବସ୍ ଚାଲିବା ପ୍ରକ୍ରିିୟା ଆରମ୍ଭ ହେବ ବୋଲି ସେ କହିଛନ୍ତି। ଘରୋଇ ବସ୍ ମାଲିକମାନେ ମଧ୍ୟ ସରକାରଙ୍କ ନିଷ୍ପତ୍ତିକୁ ଅପେକ୍ଷା କରିଛନ୍ତି। ସ୍ବତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା କହିଛନ୍ତି ଯେ, ଗ୍ରୀନ୍ ଜୋନ୍ରେ କେବଳ ବସ ଚାଲିପାରିବ। ଗ୍ରୀନ୍ ଜୋନ୍କୁ ଯିବାବେଳେ ଯେପରି ରେଡ୍ କିମ୍ବା ଅରେଞ୍ଜ ଜୋନ୍ ଦେଇ ବସ୍ ନ ଯିବ ସେଥିପ୍ରତି ଧ୍ୟାନ ଦେବାକୁ ପଡ଼ିବ। ଅର୍ଥାତ ଗ୍ରୀନ ଜୋନ୍ରେ ଆସୁଥିବା ଜିଲା ସମ୍ବଲପୁରରୁ ଅନୁଗୋଳ, କଳାହାଣ୍ଡିରୁ ନୂଆପଡ଼ାକୁ ବସ୍ ଚଳାଚଳ କରିପାରିବ ବୋଲି ସେ କହିଛନ୍ତି।
ସରକାରଙ୍କୁ ଦାବି ସମ୍ପର୍କରେ ଜଣାଇ ଦିଆଯାଇଛି। ସରକାରଙ୍କ ନିଷ୍ପତ୍ତି ପରେ ପରବର୍ତ୍ତୀ ନିଷ୍ପତ୍ତି ନିଆଯିବ ବୋଲି ସଂଘର ମୁଖପାତ୍ର ଦେବାଶିଷ ନାୟକ କହିଛନ୍ତି।