ନୂଆଦିଲ୍ଲୀ,୧୬ା୬: ପାକିସ୍ତାନ ରାଜଧାନୀ ଇସ୍ଲାମାବାଦସ୍ଥିତ ଭାରତୀୟ ଉଚ୍ଚାୟୁକ୍ତ କାର୍ଯ୍ୟାଳୟରୁ ୨ ଅଧିକାରୀ ସୋମବାର ସକାଳୁ ନିଖୋଜ ହୋଇଯାଇଥିଲେ। ଦୀର୍ଘ ୭ ଘଣ୍ଟା ପରେ ପାକ୍ କର୍ତ୍ତୃପକ୍ଷ ସେମାନଙ୍କୁ ମୁକ୍ତ କରିଦେଇଛନ୍ତି। ସେମାନେ ସକାଳ ସାଢ଼େ ୮ଟା ସମୟରେ କୌଣସି ଅଫିସ କାର୍ଯ୍ୟରେ ବାହାରକୁ ଯାଇ ଆଉ ଫେରି ନ ଥିଲେ। ଭାରତ ସରକାର ଏନେଇ ପାକିସ୍ତାନ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିଥିଲେ। ଦୁଇ ଭାରତୀୟ ଅଧିକାରୀ ଗାଡ଼ି ଧକ୍କା ଦେଇ ଗିରଫ ହୋଇଥଲେ ବୋଲି କୁହାଯାଉଛି। ବହିର୍ବ୍ୟାପାର ମନ୍ତ୍ରଣାଳୟ ପାକ୍ ରାଷ୍ଟ୍ରଦୂତଙ୍କୁ ସମନ କରି ଦୃଢ଼ ପ୍ରତିବାଦ ଜଣାଇବା ପରେ ଇସ୍ଲାମାବାଦ ସେମାନଙ୍କୁ ମୁକ୍ତ କରିଦେଇଛି। ସେମାନେ ଭାରତୀୟ ଉଚ୍ଚାୟୁକ୍ତ କାର୍ଯ୍ୟାଳୟକୁ ଫେରିଥିବା ଜଣାପଡିଛି। ସେମାନେ ଦୁର୍ଘଟଣା ଘଟାଇ ପଳାଇଯାଉଥିବା ଅଭିଯୋଗରେ ଗିରଫ ହୋଇଥିବା ପାକିସ୍ତାନୀ ଗଣମାଧ୍ୟମରେ ଖବର ପ୍ରକାଶ ପାଇଥିଲା।
ଗୁପ୍ତଚର ବୃତ୍ତି ଅଭିଯୋଗରେ ଭାରତ ସରକାର ଦୁଇଜଣ ପାକିସ୍ତାନୀ ଅଧିକାରୀଙ୍କୁ ବହିଷ୍କୃତ କରିବା ପରେ ଦୁଇଦେଶ ମଧ୍ୟରେ ଉତ୍ତେଜନା ଆରମ୍ଭ ହୋଇଥିଲା। ଏହା ପରେ ପାକିସ୍ତାନ ଅନୁରୂପ ପଦକ୍ଷେପ ନେଇପାରେ ବୋଲି ଆଶଙ୍କା କରାଯାଉଥିଲା। ଭାରତୀୟ କୂଟନୀତିଜ୍ଞ ଏବଂ ବାଣିଜି୍ୟକ ଦୂତାବାସର କର୍ମଚାରୀମାନଙ୍କ ଉପରେ ପାକ୍ କର୍ତ୍ତୃପକ୍ଷ ନିରନ୍ତର ନଜର ରଖୁଥିବାରୁ ସେମାନଙ୍କ ପାଇଁ କାମ କରିବା କଷ୍ଟକର ହୋଇପଡ଼ିଥିଲା। କିଛି ସପ୍ତାହ ପୂର୍ବରୁ ଭାରତ ବ୍ୟାପାର ଦାୟିତ୍ୱରେ ଥିବା ଗୌରଭ ଆଲୁଓ୍ବାଲିଆଙ୍କ କାରକୁ ପାକ୍ ଗୋଇନ୍ଦା ସଂସ୍ଥା ଆଇଏସ୍ଆଇର ସଦସ୍ୟ ପିଛା କରିଥିଲେ। ପାକିସ୍ତାନୀ ସଂସ୍ଥାଗୁଡ଼ିକ ଭାରତୀୟ ଅଧିକାରୀଙ୍କୁ କ୍ରମାଗତ ଭାବେ ହଇରାଣ କରୁଥିବା ନେଇ ଗତ ମାର୍ଚ୍ଚରେ ସେଠାରେ ଥିବା ଉଚ୍ଚାୟୁକ୍ତଙ୍କ କାର୍ଯ୍ୟାଳୟ ପାକ୍ ବହିର୍ବ୍ୟାପାର ମନ୍ତ୍ରଣାଳୟ ନିକଟରେ ପ୍ରତିବାଦ କରିଥିଲା। ମାର୍ଚ୍ଚରେ ଏଭଳି ୧୩ ଥର ହଇରାଣ କରାଯାଇଥିବା ନେଇ ଅଭିଯୋଗ ହେବା ସହ ଏହାର ତଦନ୍ତ କରିବାକୁ ଉଚ୍ଚାୟୁକ୍ତଙ୍କ କାର୍ଯ୍ୟାଳୟ ପାକ୍ କର୍ତ୍ତୃପକ୍ଷଙ୍କୁ କହିଥିଲା। ପାକ୍ ସଂସ୍ଥାଗୁଡ଼ିକର ବ୍ୟବହାର ଭିଏନା କୂଟନୈତିକ ସମ୍ପର୍କ ଚୁକ୍ତିନାମା, ୧୯୬୧ ଏବଂ କୂଟନୈତିକ ସହାୟତା ପାଇଁ ୧୯୯୨ରେ ଦୁଇଦେଶ ମଧ୍ୟରେ ସ୍ବାକ୍ଷର ହୋଇଥିବା ଦ୍ୱିପାକ୍ଷିକ ଆଚାର ସଂହିତାର ଉଲ୍ଲଂଘନ ବୋଲି ଗତ ଶୁକ୍ରବାର ଭାରତ ଇସ୍ଲାମାବାଦକୁ ଜଣାଇ ଦେଇଥିଲା।
