ବାହାନଗା, ୨୩ା୪(ଡି.ଏନ୍.ଏ.)-କରୋନା ସଂକ୍ରମଣ ରୋକିବା ପାଇଁ କେନ୍ଦ୍ର ଓ ରାଜ୍ୟ ସରକାର ଲକଡାଉନ୍ ଘୋଷଣା କରିଛନ୍ତି। ସମସ୍ତ ସୀମାନ୍ତକୁ ସିଲ୍ କରାଯାଇଛି। ଏବେ ରାଜ୍ୟ ବାହାରେ କାମ କରୁଥିବା ଓଡିଆ ଲୋକମାନେ ଚାଲି ଚାଲି , ସାଇକେଲ ଓ କାର ଭଡା କରି ନିଜ ଘରକୁ ଫେରିଆସୁଛନ୍ତି। ବିଶେଷ କରି ପଶ୍ଚିମବଙ୍ଗରେ କାମ କରୁଥିବା ଓଡିଆମାନେ ଏବେ ଘରମୁଁହା ହୋଇଛନ୍ତି। ବାଲେଶ୍ୱର ଜିଲାର ସମୁଦ୍ର କୂଳବର୍ତ୍ତୀ ଅଞ୍ଚଳ ଦେଇ ଭଦ୍ରକ ଜିଲା ବାସୁଦେବପୁରକୁ ସଂଯୋଗ କରୁଥିବା ତଳରାସ୍ତା ସଲ୍ଟ ରୋଡ ଏବେ ମୁକୁଳା ପଡିଛି। ସେହି ରାସ୍ତା ଦେଇ ପ୍ରତ୍ୟେକ ଦିନ ଶହ ଶହ ପ୍ରବାସୀ ଓଡିଆ ପଶ୍ଚିମବଙ୍ଗରୁ ନିଜ ଘରକୁ ଫେରୁଛନ୍ତି। ବିଳମ୍ବିତ ରାତିରେ ଆମ୍ବୁଲାନ୍ସର ସାହାରା ନେଇ ସେମାନେ ପଳାଇଆସୁଛନ୍ତି। ଏହି ରାସ୍ତାକୁ ଅବରୋଧ କରାଯିବା ପାଇଁ ଗୋପାଳପୁର ନାଗରିକ ମଞ୍ଚ ଓ ସ୍ବଚ୍ଛ ଭାରତ ଅଭିଯାନର ଆବାହକ ସୁଦର୍ଶନ ମହାପାତ୍ର, ସାମାଜିକ କର୍ମୀ ଅନ୍ତର୍ଯ୍ୟାମୀ ପଣ୍ଡା, ଗୋପାଳପୁର ସରପଞ୍ଚ ଯୋଗେଶ ଚନ୍ଦ୍ର ପତି ପ୍ରମୁଖ ପ୍ରଶାସନଠାରେ ଦାବି ଜଣାଇଛନ୍ତି।
ସଲ୍ଟରୋଡରେ ପ୍ରଶାସନ ପକ୍ଷରୁ ଚେକପୋଷ୍ଟ କରାଗଲେ ପଶ୍ଚିମବଙ୍ଗ ଫେରାନ୍ତଙ୍କ ସମ୍ପର୍କରେ ସମ୍ପୂର୍ଣ୍ଣ ତଥ୍ୟ ଜଣାପଡନ୍ତା। ସେମାନଙ୍କୁ ସରକାରଙ୍କ ଦ୍ୱାରା କରାଯାଇଥିବା କ୍ୱାରାଣ୍ଟାଇନ୍ରେ ରଖାଯାଇପାରନ୍ତା। କଲିକତାରୁ ସାଇକେଲ, କାର ଓ ମାଲ ବୋଝେଇ ପିକ୍ଅପ୍ରେ ପଳାଇଆସୁଥିବା ଲୋକମାନେ ବାଲେଶ୍ୱରରେ ପହଞ୍ଚିବା ପରେ ସେମାନଙ୍କ ପରିବାର ଲୋକ ଗାଡି ନେଇ ରାତିରେ ତଳ ରାସ୍ତା ବା ସଲ୍ଟ ରୋଡ ଦେଇ ଘରକୁ ନେଇଯାଉଛନ୍ତି। ଫଳରେ ପ୍ରଶାସନ ପାଖରେ କିଛି ତଥ୍ୟ ରହୁନାହିଁ। ଲକ୍ଡାଉନ୍ ପରେ ବାଲେଶ୍ୱର ଜିଲା ବାହାନଗା ବ୍ଲକକୁ ବାହାର ରାଜ୍ୟ ତଥା କଲିକତା, କେରଳ, ବମ୍ବେ, ଚେନାଇ, ତାମିଲନାଡୁ, ହାଇଦ୍ରାବାଦ ଆଦି ଅଞ୍ଚଳରୁ ବୁଧବାର ସୁଦ୍ଧା ୧୩ଶହ ୧୯ ଜଣ ଘରକୁ ଫେରିଛନ୍ତି। ସେମାନଙ୍କ ମଧ୍ୟରୁ କଲିକତାରୁ ୫୦ଭାଗ ଆସିଥିବା ଜଣାପଡିଛି। ତେବେ ଦେଶ ବାହାରେ ଚାକିରି କରିଥିବା ୧୪ଜଣ ବାହାନଗା ବ୍ଲକର ବିଭିନ୍ନ ଗ୍ରାମର ସେମାନଙ୍କ ଘରକୁ ଫେରିଛନ୍ତି। ଫେରିଥିବା ଲୋକଙ୍କୁ ନେଇ ଏବେ ଗ୍ରାମବାସୀଙ୍କ ମଧ୍ୟରେ ଭୟ ଦେଖାଦେଇଛି ା
