ଭୁବନେଶ୍ୱର, ୩ା୧୦(ବ୍ୟୁରୋ): ପରିଚ୍ଛନ୍ନତା ଏକ ମାନସିକତା। ଆସନ୍ତୁ ଶପଥ ନେବା, ନିଜ ପରିବେଶ ଓ ସହରକୁ ସଫାସୁତୁରା ରଖିବା। ସ୍ବଚ୍ଛତାରେ ସାମୂହିକ ପରିବର୍ତ୍ତନ ଆଣିବା ଲାଗି ଏମିତି ସ୍ଲୋଗାନ ସହ ଭୁବନେଶ୍ୱର ମହାନଗର ନିଗମ (ବିଏମ୍ସି) ଆରମ୍ଭ କରିଛ ‘ମୁଁ ସଫେଇବାଲା’ ଅଭିଯାନ। ବୁଧବାର ପୂର୍ବାହ୍ନରେ ଏହି ଅଭିଯାନକୁ ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ସତ୍ୟନଗରଠାରେ ଆୟୋଜିତ ପ୍ରାଚୀର ଚିତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ରଙ୍ଗତୂଳୀ ଧରି ନିଜର ନାମ (ଏନ୍.ପି.)ଲେଖି ଏହାର ଉଦ୍ଘାଟନ କରିଥିଲେ। ଏଥିସହ ଅଭିଯାନର ମାସ୍କଟକୁ ମଧ୍ୟ ଲୋକାର୍ପଣ କରି ସହରକୁ ସ୍ବଚ୍ଛ ରଖିବା ଲାଗି ସହରବାସୀଙ୍କୁ ଆହ୍ବାନ ଦେଇଥିଲେ।
ଏହି ଅବସରରେ ସ୍ବଚ୍ଛତାକୁ ବ୍ୟବହାରିକ ପରିବର୍ତ୍ତନର ଧାରାରେ ପରିଣତ କରିବା ପାଇଁ ଉପସ୍ଥିତ ସମସ୍ତ ନାଗରିକଙ୍କୁ ଶପଥପାଠ କରାଯାଇଥିଲା। ୩ଶହ ଛାତ୍ରୀଛାତ୍ର ବିଭିନ୍ନ ପ୍ରକାରର ପ୍ରାଚୀର ଚିତ୍ର ଆଙ୍କି ‘ମୁଁ ସଫେଇବାଲା କାର୍ଯ୍ୟକ୍ରମ’କୁ ଆକର୍ଷଣୀୟ ରୂପ ଦେଇଥିଲେ। ଭୁବନେଶ୍ୱର-ମଧ୍ୟ ବିଧାୟକ ଅନନ୍ତ ନାରାୟଣ ଜେନା, ଉତ୍ତର ବିଧାୟକ ସୁଶାନ୍ତ ରାଉତ, ବିଏମ୍ସି ପ୍ରଶାସକ ସଂଗ୍ରାମଜିତ୍ ନାୟକ, କମିଶନର ପ୍ରେମଚନ୍ଦ୍ର ଚୌଧାରୀ, ଅତିରିକ୍ତ କମିଶନର ଅବନୀ ପଟ୍ଟନାୟକ, ଡେପୁଟି କମିଶନର ଶୁଭେନ୍ଦୁ ସାହୁ, ଶ୍ୟାମସୁନ୍ଦର ସେଠୀ ପ୍ରମୁଖ ଉପସ୍ଥିତ ଥିଲେ। ପରେ ୟୁନିଟ୍-୩ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ର ପରିସରରେ ଆୟୋଜିତ ଅନ୍ୟ ଏକ କାର୍ଯ୍ୟକ୍ରମରେ ଭୁବନେଶ୍ୱରରେ ସ୍ବଚ୍ଛତା ଆଣିବା କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିଥିବା ବିଏମ୍ସିର ୧୫୦ଜଣ ସଫେଇ କର୍ମଚାରୀଙ୍କୁ ସମ୍ବର୍ଦ୍ଧିତ କରାଯାଇଥିଲା। ସେମାନଙ୍କର ସ୍ବାସ୍ଥ୍ୟ ପରୀକ୍ଷା ପରେ କାର୍ଡ ପ୍ରଦାନ କରାଯାଇଥିଲା।
ଉଲ୍ଲେଖଯୋଗ୍ୟ, ଅଭିଯାନ ଆରମ୍ଭରୁ ସଫଳତା ପାଇଁ ବିଏମ୍ସି ପ୍ରାକ୍ ପ୍ରସ୍ତୁତି କାର୍ଯ୍ୟକ୍ରମର ଆୟୋଜନ କରିଥିଲା। ଗତ ୩୦ ତାରିଖରେ ବିଭିନ୍ନ ସରକାରୀ ଓ ବେସରକାରୀ ବିଦ୍ୟାଳୟର ଶିକ୍ଷୟିତ୍ରୀ, ଶିକ୍ଷକ ଓ ଆବାସିକ ସଂଘମାନଙ୍କୁ ‘ମୁଁ ସଫେଇବାଲା’ ଅଭିଯାନ ସଂକ୍ରାନ୍ତରେ ସଚେତନ କରାଯାଇଥିଲା। ପ୍ରାୟ ତିନିମାସ ଧରି ଲଗାତର ଭାବେ ଏହି ଅଭିଯାନ ଚାଲିବ। ୧୦ ନିୟମକୁ ଆଚରଣରେ ପରିବର୍ତ୍ତନ କରିପାରିଲେ ନିଶ୍ଚିତଭାବେ ଭୁବନେଶ୍ୱରର ବର୍ଜ୍ୟ ପରିଚାଳନାରେ ଉନ୍ନତି ଘଟିବ। ବିଶେଷକରି ଏହି ଅଭିଯାନରେ ଛୋଟପିଲାଙ୍କ ଦ୍ୱାରା ସଚେତନତା କାର୍ଯ୍ୟକ୍ରମକୁ ଗୁରୁତ୍ୱ ଦିଆଯାଇଥିବା ବିଏମ୍ସି ପକ୍ଷରୁ କୁହାଯାଇଛି।
